ଭୁବନେଶ୍ୱର: ଉଚ୍ଚଶିକ୍ଷା ବିଭାଗ ଅଧୀନରେ ଥିବା ସରକାରୀ ବିଶ୍ୱବିଦ୍ୟାଳୟ, ସ୍ୱୟଂଶାସିତ ମହାବିଦ୍ୟାଳୟ ଏବଂ ଅନୁଦାନପ୍ରାପ୍ତ କଲେଜଗୁଡ଼ିକରେ ଆଜି ଅନୁଷ୍ଠିତ ହେଉଛି ବହୁପ୍ରତୀକ୍ଷିତ ଛାତ୍ର ସଂସଦ ନିର୍ବାଚନ। ସକାଳ ୮ଟାରୁ ଅପରାହ୍ଣ ୨ଟା ପର୍ଯ୍ୟନ୍ତ ଚାଲିବାକୁ ଥିବା ଏହି ଭୋଟଗ୍ରହଣ ପ୍ରକ୍ରିୟାରେ ଲକ୍ଷାଧିକ ଛାତ୍ରଛାତ୍ରୀ ନିଜ ନିଜର ପସନ୍ଦର ନେତା ବାଛିବେ।

ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ରାଜେନ୍ଦ୍ର ବିଶ୍ୱବିଦ୍ୟାଳୟରେ ନିର୍ବାଚନ ବାତିଲ କରାଯାଇଥିବା ବେଳେ ଚଳିତ ବର୍ଷ ୧୨ଟି ବିଶ୍ୱବିଦ୍ୟାଳୟ ଓ ୩୪୬ଟି ମହାବିଦ୍ୟାଳୟକୁ ମିଶାଇ ମୋଟ ୩୫୮ଟି ଉଚ୍ଚ ଶିକ୍ଷାନୁଷ୍ଠାନରେ ପ୍ରତ୍ୟକ୍ଷ ନିର୍ବାଚନ ହେଉଛି। ଏଥିରେ ମୋଟ ୬,୮୯୧ ଜଣ ପ୍ରାର୍ଥୀ ନିଜର ଭାଗ୍ୟ ପରୀକ୍ଷା କରୁଛନ୍ତି। ୧୨ଟି ବିଶ୍ୱବିଦ୍ୟାଳୟରେ ୩୫୮ ଜଣ ଏବଂ ବିଭିନ୍ନ କଲେଜଗୁଡ଼ିକରେ ୬,୫୩୩ ଜଣ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଛନ୍ତି। ସେଥିମଧ୍ୟରୁ ସଭାପତି ପଦ ପାଇଁ ୮୬୬, ଉପସଭାପତି ପାଇଁ ୭୧୬ ଏବଂ ସାଧାରଣ ସମ୍ପାଦକ ପଦବୀ ପାଇଁ ୬୧୬ ଜଣ ପ୍ରାର୍ଥୀ ସମ୍ମୁଖ ରଣଙ୍ଗନରେ ଅଛନ୍ତି।

ସୁରକ୍ଷା ଓ ଶାନ୍ତିପୂର୍ଣ୍ଣ ଭୋଟିଂ ପାଇଁ କଡ଼ା କଟକଣା:

• କ୍ୟାମ୍ପସ୍ରେ ପୋଲିସ୍ ଓ ସୁରକ୍ଷା: ଶାନ୍ତିପୂର୍ଣ୍ଣ ଭୋଟିଂ ପାଇଁ ବ୍ୟାପକ ପୋଲିସ୍ ବଳ ସହ ସ୍ୱତନ୍ତ୍ର ସୁରକ୍ଷା କର୍ମୀ ନିୟୋଜିତ ଅଛନ୍ତି।

• ଅଣଛାତ୍ର ପ୍ରବେଶ ନିଷେଧ: ବୈଧ ପରିଚୟପତ୍ର (ID Card) ଥିବା ଛାତ୍ରଛାତ୍ରୀଙ୍କୁ ହିଁ କ୍ୟାମ୍ପସ୍ ଭିତରକୁ ଛଡ଼ାଯାଉଛି।

• ଇସ୍ତାହାର ଓ ଖାଦ୍ୟ ବଣ୍ଟନ ବାରଣ: ଭୋଟରଙ୍କୁ ଆକୃଷ୍ଟ କରିବା ପାଇଁ ଖାଦ୍ୟ, ପାନୀୟ କିମ୍ବା ନିର୍ବାଚନୀ ଇସ୍ତାହାର ବଣ୍ଟନ ଉପରେ ସମ୍ପୂର୍ଣ୍ଣ କଟକଣା ଲଗାଯାଇଛି।

• ବୁଥ୍ ଓ ଶୃଙ୍ଖଳା: ପ୍ରତି ଶ୍ରେଣୀ ଓ ବିଭାଗ ପାଇଁ ସ୍ୱତନ୍ତ୍ର ବୁଥ୍ କରାଯାଇଥିବା ବେଳେ ଭୋଟ୍ ଦେବା କ୍ଷଣି ଛାତ୍ରଛାତ୍ରୀମାନେ କ୍ୟାମ୍ପସ୍ ବାହାରକୁ ଯିବା ବାଧ୍ୟତାମୂଳକ କରାଯାଇଛି।

ବୁଧବାର ସମସ୍ତ କ୍ୟାମ୍ପସରେ ‘ମୁଁ କାହିଁକି ପ୍ରାର୍ଥୀ ହୋଇଛି’ (Why I Stand For) ବୈଠକ ଶେଷ ହେବା ପରେ ପ୍ରାର୍ଥୀମାନେ ଶେଷଥର ପାଇଁ ଶ୍ରୋତାଙ୍କ ସମ୍ମୁଖରେ ନିଜ ନିଜର ପକ୍ଷ ରଖି ଭୋଟ୍ ମାଗିଥିଲେ। ଅପରାହ୍ଣ ୨ଟାରେ ଭୋଟିଂ ଶେଷ ହେବା ପରେ ଗଣତି ପ୍ରକ୍ରିୟା ଆରମ୍ଭ ହୋଇ ଆଜି ସନ୍ଧ୍ୟା ସୁଦ୍ଧା ସମସ୍ତ ଫଳାଫଳ ପ୍ରକାଶ ପାଇବ।