ଭୁବନେଶ୍ୱର: ରାଜ୍ୟରେ ବନ୍ୟା ପରିସ୍ଥିତି ଗମ୍ଭୀର ଥିବାବେଳେ ବିରୋଧୀ ଦଳର ଭୂମିକାକୁ ନେଇ କଡ଼ା ପ୍ରତିକ୍ରିୟା ରଖିଛନ୍ତି ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ। ବନ୍ୟା ସମୟରେ ବିରୋଧୀ ଦଳର ନେତା ନବୀନ ପଟ୍ଟନାୟକ ଗ୍ରାଉଣ୍ଡକୁ ଯାଇ ବନ୍ୟା ବିପନ୍ନଙ୍କ ସ୍ଥିତି ବୁଝିବା ସହ ପ୍ରକୃତ ସମସ୍ୟାକୁ ବିଧାନସଭାରେ ଉଠାଇବା ଉଚିତ୍‌ ବୋଲି ସେ କହିଛନ୍ତି।

ସୁରେଶ ପୂଜାରୀ କହିଛନ୍ତି, ବିରୋଧୀ ଦଳର ପ୍ରତିବାଦ କରିବା ଓ ନିଜର ପ୍ରସଙ୍ଗ ଉଠାଇବାର ସମ୍ପୂର୍ଣ୍ଣ ଅଧିକାର ରହିଛି। ଏମ୍‌ବିବିଏସ୍‌, ପାଠ୍ୟପୁସ୍ତକ କିମ୍ବା ଅନ୍ୟାନ୍ୟ ଜନସ୍ୱାର୍ଥ ପ୍ରସଙ୍ଗରେ ଆଲୋଚନା ହେବାରେ କୌଣସି ଆପତ୍ତି ନାହିଁ। ତେବେ କେଉଁ ପ୍ରସଙ୍ଗ କେତେବେଳେ ଉଠାଯିବ, ସେଥିରେ ଦାୟିତ୍ୱବୋଧ ଓ ସମୟୋପଯୋଗୀ ନିଷ୍ପତ୍ତି ଆବଶ୍ୟକ ବୋଲି ସେ ମତ ଦେଇଛନ୍ତି।

୨୬ ଜିଲ୍ଲା ପ୍ରଭାବିତ, ବନ୍ୟା ହେଉ ପ୍ରାଥମିକତା

ମନ୍ତ୍ରୀଙ୍କ କହିବା ଅନୁସାରେ, ବର୍ତ୍ତମାନ ରାଜ୍ୟର ୨୬ଟି ଜିଲ୍ଲା ବନ୍ୟା ପରିସ୍ଥିତିରେ ପ୍ରଭାବିତ ରହିଛି। ହଜାର ହଜାର ଲୋକ ଜଳବନ୍ଦୀ ଓ ଚାଷଜମି କ୍ଷତିଗ୍ରସ୍ତ ହୋଇଥିବାରୁ ବିଧାନସଭାରେ ବନ୍ୟା ପ୍ରସଙ୍ଗ ହିଁ ସର୍ବାଧିକ ପ୍ରାଥମିକତା ପାଇବା ଦରକାର।

ସେ କହିଛନ୍ତି, ଯଦି ଗୃହରେ ବନ୍ୟା ନେଇ ବିସ୍ତୃତ ଆଲୋଚନା ହୁଏ, ତେବେ କେଉଁ ଅଞ୍ଚଳରେ ସରକାରୀ ସହାୟତା ପହଞ୍ଚିପାରିନାହିଁ, କେଉଁଠି ଅଧିକ ରିଲିଫ୍ ଓ ଉଦ୍ଧାର କାର୍ଯ୍ୟ ଆବଶ୍ୟକ, ସେସବୁ ତଥ୍ୟ ସାମ୍ନାକୁ ଆସିବ। ଏହାଦ୍ୱାରା ପ୍ରଶାସନ ଶୀଘ୍ର ପଦକ୍ଷେପ ନେଇ ପ୍ରଭାବିତ ଲୋକଙ୍କ ନିକଟରେ ସହାୟତା ପହଞ୍ଚାଇ ପାରିବ।

‘ଗ୍ରାଉଣ୍ଡ ରିପୋର୍ଟ ଆଣନ୍ତୁ’

ବନ୍ୟା ସମୟରେ ସରକାର ଓ ବିରୋଧୀ ଦଳ ଉଭୟଙ୍କର ଭୂମିକା ସମାନ ଗୁରୁତ୍ୱପୂର୍ଣ୍ଣ ବୋଲି ସୁରେଶ ପୂଜାରୀ କହିଛନ୍ତି। ବିରୋଧୀ ନେତାମାନେ ବନ୍ୟା ପ୍ରଭାବିତ ଅଞ୍ଚଳକୁ ଯାଇ ଲୋକଙ୍କ ସମସ୍ୟା ବୁଝନ୍ତୁ ଓ ସେହି ତଥ୍ୟକୁ ବିଧାନସଭାରେ ଉପସ୍ଥାପନ କରନ୍ତୁ ବୋଲି ସେ ଆହ୍ୱାନ ଜଣାଇଛନ୍ତି।

ବର୍ତ୍ତମାନ ବନ୍ୟା ପରିସ୍ଥିତିକୁ ନେଇ ବିଧାନସଭାରେ ରାଜନୈତିକ ତର୍କ ଜୋର ଧରିଥିବା ବେଳେ, ରାଜସ୍ୱ ମନ୍ତ୍ରୀଙ୍କ ଏହି ମନ୍ତବ୍ୟ ରାଜ୍ୟ ରାଜନୀତିରେ ନୂଆ ଚର୍ଚ୍ଚା ସୃଷ୍ଟି କରିଛି।