ଇରାନର ସର୍ବୋଚ୍ଚ ନେତା ମୋଜତବା ଖାମେନେଇ 'ଷ୍ଟ୍ରେଟ୍ ଅଫ୍ ହୋର୍ମୁଜ୍' (Strait of Hormuz) ରୁ ଆମେରିକୀୟ ସେନାକୁ ପଛକୁ ଠେଲି ଦେଇଥିବା ଦାବି କରିଛନ୍ତି। ସେ କହିଛନ୍ତି ଯେ ଇରାନର ବାହାଦୁର ଯୋଦ୍ଧା ଏବଂ ହୋର୍ମୁଜ୍ର ରକ୍ଷକମାନଙ୍କଠାରୁ ପରାଜୟ ମିଳିବା ପରେ ଏବେ ଆମେରିକାର ଆରବ ସାଗରରୁ ଆଗକୁ ବଢ଼ିବାକୁ ସାହସ ନାହିଁ। ସେ କହିଛନ୍ତି ଯେ ଖୁବ୍ ଶୀଘ୍ର ଆରବ ସାଗର ମଧ୍ୟ ସେମାନଙ୍କ ଉପସ୍ଥିତିରୁ ମୁକ୍ତ ହୋଇଯିବ। ଖାମେନେଇଙ୍କ ଏହି ବିବୃତି ଏପରି ସମୟରେ ଆସିଛି ଯେତେବେଳେ US ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଷ୍ଟ୍ରେଟ୍ ଅଫ୍ ହୋର୍ମୁଜ୍ର ନାମ ବଦଳାଇ 'ଟ୍ରମ୍ପ ଷ୍ଟ୍ରେଟ୍' (Trump Strait) କରିଦେଇଛନ୍ତି।

ଇରାନ କହିଛି ଯେ ହୋର୍ମୁଜ୍ ଷ୍ଟ୍ରେଟ୍ ଉପରେ ତା’ର ପୂର୍ଣ୍ଣ ଅଧିକାର ରହିଛି ଏବଂ କାହାର ବିବୃତି ଦ୍ୱାରା ଏହାର ସ୍ଥିତି ଉପରେ କୌଣସି ପ୍ରଭାବ ପଡ଼ିବ ନାହିଁ। ଇରାନୀ ସେନାର ଚିଫ୍ ଅଫ୍ ଷ୍ଟାଫ୍ ରିୟର୍ ଆଡମିରାଲ୍ ହବିବୋଲ୍ଲାହ ସୟ୍ୟାରୀ କହିଛନ୍ତି ଯେ ଶତ୍ରୁର ବୟାନବାଜି ସତ୍ତ୍ୱେ ହୋର୍ମୁଜ୍ ଇରାନର ପୂର୍ଣ୍ଣ ନିୟନ୍ତ୍ରଣରେ ଅଛି। ସେହିପରି ହୋର୍ମୁଜ୍ର ପୂର୍ବ ଭାଗ ଏବଂ ଉତ୍ତର ଭାରତ ମହାସାଗରର ଦାୟିତ୍ୱ ଇରାନୀ ନୌସେନା ପାଖରେ ରହିଛି।

ଆମେରିକାର ସାମରିକ ଚାପକୁ କମ୍ କରିବା ଏବଂ ନିଜ ବନ୍ଦରଗୁଡ଼ିକ ଉପରେ ଲାଗିଥିବା କଟକଣା ହଟାଇବା ସ୍ଥିତିରେ ସାତ ଦିନ ମଧ୍ୟରେ ଷ୍ଟ୍ରେଟ୍କୁ ପୁଣି ଥରେ ଖୋଲିବାର ଅଫର୍ ଦେଇଥିଲା ଇରାନ। ଆମେରିକା ରାଷ୍ଟ୍ରପତି ଟ୍ରମ୍ପ ଇରାନର ଏହି ପ୍ରସ୍ତାବକୁ ପ୍ରତ୍ୟାଖ୍ୟାନ କରିଦେଇଛନ୍ତି। ତେବେ, ଟ୍ରମ୍ପ କହିଛନ୍ତି ଯେ ଆଗାମୀ ଦିନଗୁଡ଼ିକରେ ଆମେରିକା ଏବଂ ଇରାନ ମଧ୍ୟରେ କଥାବାର୍ତ୍ତା ହୋଇପାରେ। ଅନ୍ୟପଟେ, ଇରାନର ସରକାରୀ ମିଡିଆ IRNA ସୋମବାର (୨୮ ସେପ୍ଟେମ୍ବର) ରେ କହିଛି ଯେ ଜାତିସଂଘର ସାଧାରଣ ସଭା (UNGA) ପାଇଁ ନ୍ୟୁୟର୍କରେ ପହଞ୍ଚିଥିବା ଇରାନୀ ପ୍ରତିନିଧିମଣ୍ଡଳୀ ବର୍ତ୍ତମାନ ଆମେରିକା ସହ କୌଣସି ନୂଆ କଥାବାର୍ତ୍ତାର ଯୋଜନା କରୁନାହାନ୍ତି।

ଇରାନର ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କର୍ପସ (IRGC) ହୋର୍ମୁଜ୍ ଷ୍ଟ୍ରେଟ୍ରେ ଏକ ଆମେରିକୀୟ ଚାଳକବିହୀନ ସବ୍ମେରାଇନ୍ (ପନଡୁବୀ) କୁ ଜବତ କରିଥିବା ଦାବି କରିଛି। IRNA ର ରିପୋର୍ଟ ଅନୁଯାୟୀ, IRGC ପ୍ରବକ୍ତା ବ୍ରିଗେଡିୟର୍ ଜେନେରାଲ୍ ହୁସେନ୍ ମୋହବ୍ବୀ କହିଛନ୍ତି, "ହୋର୍ମୁଜ୍ ଷ୍ଟ୍ରେଟ୍ ଆମେରିକାର ଚାଳକବିହୀନ ସବ୍ମେରାଇନ୍ଗୁଡ଼ିକ ପାଇଁ ଶିକାରସ୍ଥଳୀ ପାଲଟିଯାଇଛି। ଏଠାରେ US ର 'MK 18 Mod 2 Kingfish' କୁ ଜବତ କରାଯାଇଛି।" ଏହା ଏକ ଆଡଭାନ୍ସଡ୍ AUV ଅର୍ଥାତ୍ ଚାଳକବିହୀନ ବୁଡ଼ାଜାହଜ ଥିଲା।  ଯେଉଁଥିରେ ସୋନାର୍ ଏବଂ ସଠିକ୍ ନେଭିଗେସନ୍ ସିଷ୍ଟମ୍ ଲାଗିଛି।