ରାୟଗଡ଼ା: ଚଳନ୍ତା ଟ୍ରେନରୁ ଖସି ପଡ଼ି ମା’ ଏବଂ ଝିଅ ଗୁରୁତର ହୋଇପଡ଼ିଛନ୍ତି । ଏଭଳି ଏକ ଦୁର୍ଘଟଣା ଘଟିଛି ରାୟଗଡ଼ା ଜିଲ୍ଲା ସିଙ୍ଗାପୁର ଷ୍ଟେସନ ରୋଡ଼ରେ । ଗୁରୁତର ମା ହେଲେ ରତିକା ଚନ୍ଦନା ଏବଂ ତାଙ୍କର ୪ ବର୍ଷର ଝିଅ ହସ୍ତିନା ଚନ୍ଦନା । ଦୁଇ ଜଣଙ୍କୁ ବ୍ରହ୍ମପୁର ଏମକେସିଜି ମେଡ଼ିକାଲକୁ ସ୍ଥାନାନ୍ତର କରାଯାଇଛି । 

ମିଳିଥିବା ପ୍ରାଥମିକ ସୂଚନା ମୁତାବକ, କଳାହାଣ୍ଡି ଜିଲ୍ଲା ଜୁନାଗଡ଼ର ରତିକା ଚନ୍ଦନା, ତାଙ୍କ ସ୍ୱାମୀ ଏବଂ ଝିଅ ହସ୍ତିନା ଚନ୍ଦନା ରାୟଗଡ଼ାକୁ ଗୋଟିଏ ଏକାଦଶ କାମରେ ଯୋଗ ଦେବାକୁ ଆସିଥିଲେ । ଶୁକ୍ରବାର ସକାଳୁ ସେମାନେ ପୁଣି ଜୁନାଗଡ଼ ଫେରିବାକୁ ସିଙ୍ଗାପୁର ଷ୍ଟେସନ ରୋଡ଼ରେ ଅପେକ୍ଷା କରିଥିଲେ । କୋରବା ଟ୍ରେନ ଷ୍ଟେସରେ ପହଁଚିଥିଲା । ଉକ୍ତ ଟ୍ରେନ ସେହି ଷ୍ଟେସନରେ ମାତ୍ର ଗୋଟିଏ ମିନିଟ୍ ରହିଥାଏ । ତେବେ ମାତ୍ର ଗୋଟିଏ ମିନିଟ ରହିବା ପରେ ଟ୍ରେନଟି ଛାଡ଼ିଦେଇଥିଲା । ସେହି ସମୟରେ ପରିବାରଟି ଚଢ଼ିବାକୁ ଉଦ୍ୟମ କରୁଥିବା ବେଳେ ଚଳନ୍ତା ଟ୍ରେନରୁ  ମା ଏବଂ ଝିଅ ତଳେ ପଡ଼ିଯାଇଥିଲେ । ଫଳରେ  ରତିକାଙ୍କର ୨ଟି ହାତ ଓ ଗୋଟିଏ ଗୋଡ଼ କଟିଯାଇଥିଲା । ସେହପରି ଝିଅ ରତିକାର ଗୋଟିଏ ହାତ ଓ ଗୋଟିଏ ଗୋଡ଼ କଟିଯାଇଥିଲା । 

ରେଳ ବିଭାଗ ପୁଲିସ ସେମାନଙ୍କୁ ଗୁରୁତର ଅବସ୍ଥାରେ ତୁରନ୍ତ ଉଦ୍ଧାର କରି ରାୟଗଡ଼ା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲା । କିନ୍ତୁ ଦୁଇ ଜଣଙ୍କ ସ୍ୱାସ୍ଥ୍ୟ ଅବସ୍ଥା ସଙ୍କଟାପନ୍ନ ହେବାରୁ ବ୍ରହ୍ମପୁର ଏମକେସିଜିକୁ ସ୍ଥାନାନ୍ତର କରାଯାଇଥିବା ଜଣପଡ଼ିଛି ।