ଯାଜପୁର/କଳିଙ୍ଗନଗର: ଓଡ଼ିଶାର ଶିଳ୍ପାୟନ ଯାତ୍ରାରେ ଯୋଡ଼ିହୋଇଛି ଆଉ ଏକ ସ୍ୱର୍ଣ୍ଣିମ ଅଧ୍ୟାୟ। ଯାଜପୁର ଜିଲ୍ଲା କଳିଙ୍ଗନଗରଠାରେ ଆୟୋଜିତ ବୃହତ୍ ଶିଳ୍ପ ସମାରୋହରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ରାଜ୍ୟର ୧୪ଟି ଜିଲ୍ଲାରେ ମୋଟ ୩୯,୩୮୩ କୋଟି ଟଙ୍କାର ୪୬ଟି ଗୁରୁତ୍ୱପୂର୍ଣ୍ଣ ଶିଳ୍ପ ପ୍ରକଳ୍ପର ଭୂମିପୂଜନ, ଶିଳାନ୍ୟାସ ଓ ଉଦ୍ଘାଟନ କରିଛନ୍ତି। ଏହି ପ୍ରକଳ୍ପଗୁଡ଼ିକ କାର୍ଯ୍ୟକ୍ଷମ ହେଲେ ରାଜ୍ୟର ୪୨,୫୧୨ ଜଣ ଯୁବକଯୁବତୀଙ୍କ ପାଇଁ ପ୍ରତ୍ୟକ୍ଷ ଓ ପରୋକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବ।

ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି ଯେ, କଳିଙ୍ଗନଗରରୁ ରାଜ୍ୟରେ ‘ଦ୍ୱିତୀୟ ଶିଳ୍ପ ବିପ୍ଳବ’ର ଶୁଭାରମ୍ଭ ହୋଇଛି। "ପୂର୍ବ ସରକାର ସମୟରେ ଶିଳ୍ପ ନିବେଶ କେବଳ ସ୍ଲୋଗାନ ଓ ପ୍ରଚାରରେ ସୀମିତ ଥିଲା। କିନ୍ତୁ ଆମ ସରକାର ପ୍ରତିଟି ବୁଝାମଣାପତ୍ରକୁ ବାସ୍ତବ ରୂପ ଦେଇ ଶିଳ୍ପ କାରଖାନା ନିର୍ମାଣ ସହ ଓଡ଼ିଆ ପୁଅଝିଅଙ୍କୁ ରୋଜଗାର ଦେବାକୁ ସମର୍ଥ ହୋଇଛନ୍ତି।"

୧୪ଟି ଜିଲ୍ଲାରେ ବ୍ୟାପିବ ଶିଳ୍ପାୟନ:

ଶିଳ୍ପ କେବଳ କେତେକ ନିର୍ଦ୍ଦିଷ୍ଟ ଜିଲ୍ଲାରେ ସୀମିତ ନ ରହି ସାରା ରାଜ୍ୟରେ ପ୍ରସାରିତ ହେବା ଉଚିତ ବୋଲି ମୁଖ୍ୟମନ୍ତ୍ରୀ ଗୁରୁତ୍ୱାରୋପ କରିଛନ୍ତି। ଏହି ନୂତନ ପ୍ରକଳ୍ପଗୁଡ଼ିକ ରାଜ୍ୟର ୧୪ଟି ଜିଲ୍ଲା ଯଥା— ଅନୁଗୋଳ, ବରଗଡ଼, ବାଲେଶ୍ୱର, ବୌଦ୍ଧ, କଟକ, ଢେଙ୍କାନାଳ, ଯାଜପୁର, ଜଗତସିଂହପୁର, କେନ୍ଦୁଝର, ଖୋର୍ଦ୍ଧା, ମୟୂରଭଞ୍ଜ, ପୁରୀ, ସମ୍ବଲପୁର ଏବଂ ସୁନ୍ଦରଗଡ଼ରେ ସ୍ଥାପନ କରାଯାଉଛି।

କେନ୍ଦୁଝର ଓ ସୁନ୍ଦରଗଡ଼: ଇସ୍ପାତ ଶିଳ୍ପ

ଅନୁଗୋଳ ଓ ଢେଙ୍କାନାଳ: ଅକ୍ଷୟ ଶକ୍ତି (Renewable Energy)

ଖୋର୍ଦ୍ଧା: ଖାଦ୍ୟ ପ୍ରସଂସ୍କରଣ (Food Processing)

ପୁରୀ, କଟକ, ବରଗଡ଼, ବାଲେଶ୍ୱର ଓ ମୟୂରଭଞ୍ଜ: ପର୍ଯ୍ୟଟନ ଓ ହସ୍ପିଟାଲିଟି ଶିଳ୍ପ

୫୦୦ ବିଲିୟନ ଡଲାର ଅର୍ଥନୀତିର ଲକ୍ଷ୍ୟ:

ମୁଖ୍ୟମନ୍ତ୍ରୀ କହିଛନ୍ତି, "ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ 'ପୂର୍ବୋଦୟ' ପରିକଳ୍ପନାର କେନ୍ଦ୍ରବିନ୍ଦୁ ହେଉଛି ଓଡ଼ିଶା। ଆଗାମୀ ୧୦ ବର୍ଷ ମଧ୍ୟରେ ରାଜ୍ୟର ଅର୍ଥନୀତିକୁ ୫୦୦ ବିଲିୟନ ଆମେରିକୀୟ ଡଲାରରେ ପହଞ୍ଚାଇବା ଆମର ମୁଖ୍ୟ ଲକ୍ଷ୍ୟ।" ନିତି ଆୟୋଗର ସୂଚକାଙ୍କ ଅନୁଯାୟୀ, ଭାରତରେ ପୁଞ୍ଜି ଆକର୍ଷଣ କ୍ଷେତ୍ରରେ ଓଡ଼ିଶା ବର୍ତ୍ତମାନ ଦ୍ୱିତୀୟ ସ୍ଥାନ ହାସଲ କରିଛି।

ଏହି କାର୍ଯ୍ୟକ୍ରମରେ ଜିନ୍ଦଲ ଷ୍ଟେନ୍ଲେସ୍ ଗ୍ରୁପ୍, ଟାଟା ଷ୍ଟିଲ୍, ଇମ୍ଫା (IMFA), ଜଟିଆ ଷ୍ଟିଲ୍, ବିକେ ଉତ୍କଳ ଷ୍ଟିଲ୍ ଏବଂ ଶ୍ରୀଏମ୍କେ ଷ୍ଟିଲ୍ ଭଳି ପ୍ରତିଷ୍ଠିତ କମ୍ପାନୀଗୁଡ଼ିକର ବିଭିନ୍ନ ପ୍ରକଳ୍ପର ଉଦ୍ଘାଟନ ଓ ଶୁଭାରମ୍ଭ ହୋଇଛି।

ଦୁଇ ବର୍ଷରୁ କମ୍ ସମୟରେ ୩.୫ ଲକ୍ଷ କୋଟିର ପ୍ରକଳ୍ପ:

ରାଜ୍ୟ ସରକାର ଦୁଇ ବର୍ଷରୁ କମ୍ ସମୟ ମଧ୍ୟରେ ୧୫୧ଟି ପ୍ରକଳ୍ପର ଭୂମିପୂଜନ ଓ ଉଦ୍ଘାଟନ କରିସାରିଛନ୍ତି। ଆଜିର ପ୍ରକଳ୍ପଗୁଡ଼ିକୁ ମିଶାଇଲେ ମୋଟ ୩.୫ ଲକ୍ଷ କୋଟିରୁ ଅଧିକ ଟଙ୍କାର ପ୍ରକଳ୍ପ କାର୍ଯ୍ୟକାରୀ ହୋଇଛି, ଯାହାଦ୍ୱାରା ୨.୪ ଲକ୍ଷରୁ ଅଧିକ ଯୁବବର୍ଗଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି ହୋଇଛି। ଓଡ଼ିଆ ଯୁବକଯୁବତୀ ଯେପରି ରୋଜଗାର ପାଇଁ ବାହାର ରାଜ୍ୟକୁ ନ ଯାଆନ୍ତି, ସେଥିପାଇଁ ବୟନଶିଳ୍ପ, ଖାଦ୍ୟ ପ୍ରସଂସ୍କରଣ ଓ ଫାର୍ମାସ୍ୟୁଟିକାଲ୍ସ ଭଳି ଶ୍ରମଭିତ୍ତିକ ଶିଳ୍ପକୁ ବିଶେଷ ଗୁରୁତ୍ୱ ଦିଆଯାଉଛି।

ଏହି ସମାରୋହରେ ମନ୍ତ୍ରୀ ଡ. ପ୍ରଦୀପ ବଳସାମନ୍ତ, ମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁ, ଯାଜପୁର ସାଂସଦ ଡ. ରବୀନ୍ଦ୍ର ନାରାୟଣ ବେହେରା, କୋରେଇ ବିଧାୟକ ଆକାଶ ଦାସନାୟକ, ଧର୍ମଶାଳା ବିଧାୟକ ହିମାଂଶୁ ଶେଖର ସାହୁ, ବଡ଼ଚଣା ବିଧାୟକ ଅମର ନାୟକ, ମୁଖ୍ୟ ଶାସନ ସଚିବ ଅନୁ ଗର୍ଗ, ଶିଳ୍ପପତି ଅଭ୍ୟୁଦୟ ଜିନ୍ଦଲ, ଶୁଭ୍ରକାନ୍ତ ପଣ୍ଡା ଏବଂ ଶିଳ୍ପ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ହେମନ୍ତ ଶର୍ମାଙ୍କ ସମେତ ବହୁ ବରିଷ୍ଠ ଅଧିକାରୀ ଉପସ୍ଥିତ ଥିଲେ।