ଯାଜପୁର: ବନ୍ଧା ହେଲେ ରୋଡ଼ ରୋମିଓ । ରାସ୍ତା ଉପରେ କଲେଜ ଛାତ୍ରୀଙ୍କୁ ମାଡ ମାରିବା ମହଙ୍ଗା ସାବ୍ୟସ୍ତ ହୋଇଛି । ଛାତ୍ରୀଙ୍କୁ ମାଡ଼ ମାରି ଭିଡିଓ ଭାଇରାଲ କରିବା ଦୁଇ ରୋଡ୍ ରୋମିଓଙ୍କ ଉପରେ ଭାରି ପଡ଼ିଛି । ଯାଜପୁର ଜିଲ୍ଲା ବରୀ ପୋଲିସ ଦୁଇ ଯୁବକଙ୍କୁ ଗିରଫ କରିଛି । ମୁଖ୍ୟ ଅଭିଯୁକ୍ତ ବରୀ ପଞ୍ଚାୟତର ଶିଶିର ସେଠୀଙ୍କ ପୁଅ ପ୍ରସନ୍ନଜିତ ସେଠୀ ଓ ତାଙ୍କ ସାଙ୍ଗ ସତ୍ୟରଞ୍ଜନ ଜେନା । ଅନ୍ୟ ଜଣେ ସହଯୋଗୀ ତାପସ ବେହେରା ଫେରାର ରହିଛି । 

ଗତ ଦୁଇ ଦିନ ତଳେ ଗୋପବନ୍ଧୁ ଚୌଧୁରୀ କଲେଜରୁ ଛାତ୍ରୀମାନେ ବରୀ-ବିଂଝାରପୂର୍ ରାସ୍ତା ଦେଇ ଫେରୁଥିବା ସମୟରେ ଯୁବକମାନେ ସେମାନଙ୍କୁ ଅଟକାଇଥିଲେ । କମେଣ୍ଟ ମରାକୁ ନେଇ ପ୍ରସନ୍ନଜିତ୍ ସେଠୀ, ତାଙ୍କ ସାଥୀ ସତ୍ୟରଞ୍ଜନ ଜେନା, ତାପସ ବେହେରା ଛାତ୍ରୀଙ୍କୁ ମାଡ଼ ମାରିଥିଲେ । ଆଉ ଏହି ମାଡ଼ ମାରିବାବେଳର ଭିଡ଼ିଓ ସୁଟିଂ କରି ସୋସିଆଲ୍ ମିଡ଼ିଆରେ ଭାଇରାଲ କରିଥିଲେ । ଯାହାକୁ ଦେଖିବା ପରେ ବିଭିନ୍ନ ଆଡ଼ୁ ପ୍ରତିକ୍ରିୟା ପ୍ରକାଶ ପାଇଥିଲା । 

ଜନୈକ ଛାତ୍ରୀଙ୍କ ପକ୍ଷରୁ ବରି ଥାନାରେ ଲିଖିତ ଅଭିଯୋଗ ହୋଇଥିଲା । ଏକ ମାମଲା ରୁଜୁ କରି ଘଟଣାର ତଦନ୍ତ କରିଥିଲା। ବିଭିନ୍ନ ସ୍ଥାନରେ ଚଢାଉ କରି ମୁଖ୍ୟ ଅଭିଯୁକ୍ତ ପ୍ରସନ୍ନଜିତକୁ ବାନ୍ଧିଥିଲା ପୋଲିସ । ଏହା ସହିତ ସହଯୋଗୀ ସତ୍ୟରଞ୍ଜନ ଜେନାକୁ ପୋଲିସ ଗିରଫ କରିଛି ।  ଅନ୍ୟ ଜଣେ ସହଯୋଗୀ ତାପସ ବେହେରା ଫେରାର ରହିଥିବା ବେଳେ ଖୁବ୍ ଶୀଘ୍ର ତାକୁ ଗିରଫ କରାଯିବ ବୋଲି କହିଛନ୍ତି ଥାନା ଅଧିକାରୀଣୀ ଜ୍ୟୋତିର୍ମୟୀ ସେଠୀ ।