ନୂଆଦିଲ୍ଲୀ: ଆସାମରେ ପହଲଗାମ ଆକ୍ରମଣକାରୀଙ୍କ ସମର୍ଥକଙ୍କୁ ଦେଖିବାକୁ ମିଳିଛି । ଆତଙ୍କବାଦୀଙ୍କୁ ସମର୍ଥନ କରୁଥିବା ବ୍ୟକ୍ତିଙ୍କୁ ବାଂଲାଦେଶୀ ଛଡ଼ାଇ ନେଇଥିବା ଜଣାପଡ଼ିଛି । ଆସାମ ପୋଲିସ ୧୦ ଜଣଙ୍କୁ ଗିରଫ କରିଛି । ଏହା ସମ୍ପୂର୍ଣ୍ଣ ଯୋଜନା ବଦ୍ଧ ଷଡ଼ଯନ୍ତ୍ର ଥିଲା ବୋଲି କହିଛି ପୋଲିସ । 

ଏହି ଘଟଣା ଡିସେମ୍ବର ୨୭ ତାରିଖରେ ଲଖିମପୁରର ବୋଙ୍ଗାଲମୋରା ଅଞ୍ଚଳରେ ଘଟିଥିଲା। ବାହାରୁଲ ଇସଲାମ ନାମକ ଜଣେ ବ୍ୟକ୍ତି ପହଲଗାମ ଆତଙ୍କବାଦୀଙ୍କ ସମର୍ଥନରେ ସାମାଜିକ ଗଣମାଧ୍ୟମରେ ଏକ ପୋଷ୍ଟ କରିଥିଲା । ସେ ଆତଙ୍କବାଦୀ ଆକ୍ରମଣକୁ ପ୍ରଶଂସା କରି ଏକ ନକଲି ଆକାଉଣ୍ଟରୁ ପୋଷ୍ଟ କରିଥିଲା । ପୋଲିସ ମାମଲା ରୁଜୁ କରି ଦୀର୍ଘ ଦିନ ହେବ ଖୋଜୁଥିଲା । ମାତ୍ର ସେ ଫେରାର ଥିଲା । ପୋଲିସକୁ ଗୁପ୍ତ ସୂଚନା ମିଳିଥିଲା ଯେ ବାହାରୁଲ ଇସଲାମ ସୋନାପୁର ଅଞ୍ଚଳରେ ଲୁଚି ରହିଛି। ପୋଲିସ ସୋନାପୁର ଅଞ୍ଚଳରୁ ବାହାରୁଲକୁ ଧରିଥିଲା । କିନ୍ତୁ ୧୦ରୁ ଅଧିକ ଲୋକ ଏକାଠି ହୋଇ ସଂଘବଦ୍ଧଭାବେ ପୋଲିସ ଟିମକୁ ଆକ୍ରମଣ କରି ବାହାରୁଲକୁ ଛଡ଼ାଇ ନେଇଥିଲେ । ପୋଲିସ ଉପରେ ଲାଠି ଓ ଢେଲା ମାଡ଼ କରିଥିଲେ । 

ଲଖିମପୁର ଏସଏସପି ଗୁଣେନ୍ଦ୍ର ଡେକା କହିଛନ୍ତି ଯେ  ଆତଙ୍କବାଦୀ ଆକ୍ରମଣ ପରେ, ଅନେକ ଲୋକ ସୋସିଆଲ ମିଡିଆରେ ସମର୍ଥନ ଜଣାଇଥିଲେ। ବାହାରୁଲ ଇସଲାମ ସେମାନଙ୍କ ମଧ୍ୟରୁ ଜଣେ ଥିଲେ। ଯେତେବେଳେ ତାଙ୍କୁ ଗିରଫ କରାଯାଇଥିଲା, ଆତାବୁର ରହମାନଙ୍କ ନେତୃତ୍ୱରେ ଏକ ଗୋଷ୍ଠୀ ପୋଲିସ ଦଳ ଉପରେ ଆକ୍ରମଣ କରି ତାଙ୍କୁ ମୁକ୍ତ କରିଦେଇଥିଲେ। ଏହା ଏକ ଯୋଜନାବଦ୍ଧ ଆକ୍ରମଣ ଥିଲା। ଆକ୍ରମଣରେ ସବ-ଇନ୍ସପେକ୍ଟର ଗୋକୁଳ ଜୟଶ୍ରୀ ଏବଂ ଡ୍ରାଇଭର ଗୁରୁତର ଆହତ ହୋଇଛନ୍ତି। ପୋଲିସ ଭାରତୀୟ ଦଣ୍ଡ ସଂହିତା (ଆଇପିସି)ର ବିଭିନ୍ନ ଧାରା ଅନୁଯାୟୀ ଏକ ମାମଲା ରୁଜୁ କରିଛି । ୧୦ ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି । ଗିରଫ ଅଭିଯୁକ୍ତମାନେ ଆଫାଜୁଦ୍ଦିନ, ଇକରାମୁଲ ହୁସେନ, ଫଖରୁଦ୍ଦିନ ଅହମ୍ମଦ, ନୁର ହୁସେନ, ଗୁଲଜାର ହୁସେନ, ନଜରୁଲ ହକ୍, କାଜିମୁଦ୍ଦିନ, ମହମ୍ମଦ ଅବଦୁଲ ହମିଦ, ବିଲାଲ ହୁସେନ ଏବଂ ଆତାବୁର ରହମାନ ବୋଲି ଚିହ୍ନଟ କରାଯାଇଛି।

ଅଧିକ ପଢ଼ନ୍ତୁ:-ବାଂଲାଦେଶର ପ୍ରଥମ ମହିଳା ପ୍ରଧାନମନ୍ତ୍ରୀ ଖାଲେଦା ଜିଆଙ୍କ ବିୟୋଗ