ବଲାଙ୍ଗୀର: ସ୍ୱାମୀର ଟାଙ୍ଗିଆ ଚୋଟରେ ସ୍ତ୍ରୀ ମୃତ। ଏପରି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ବଲାଙ୍ଗିର ଜିଲ୍ଲା ଦେଓଗାଁ ଥାନା ଅନ୍ତର୍ଲା ଗାଁରେ। ଗତକାଲି ବିଳମ୍ବିତ ରାତିରେ ଶୋଇଥିବା ଅବସ୍ଥାରେ ସ୍ତ୍ରୀ ଅମୁଲ୍ୟ ବିଶ୍ୱାଳକୁ ଟାଙ୍ଗିଆରେ ହାଣୀ ହତ୍ୟା କରିଛି ସ୍ବାମୀ ଗୌତମ ବିଶ୍ୱାଳ। ଖବର ପାଇ ଦେଓଗାଁ ପୋଲିସ ରକ୍ତ ଜୁଡୁବୁଡୁ ଶବକୁ ଉଦ୍ଧାର କରିବା ସହିତ ପୋଷ୍ଟମୋର୍ଟମ ପାଇଁ ପଠାଇ ଦେଇଛି।

ସୂଚନା ଅନୁସାରେ,ମଦ ପିଇ ସ୍ତ୍ରୀ ସହିତ କଲିକଜିଆ କରୁଥିଲା ସ୍ୱାମୀ ଗୌତମ। ନିଶାଶକ୍ତ ଅବସ୍ଥାରେ ସ୍ତ୍ରୀକୁ ହତ୍ୟା କରିଥିବା ସନ୍ଦେହ କରାଯାଉଛି। ଦେଓଗାଁ ପୋଲିସ ହତ୍ୟାକାରୀ ଗୌତମକୁ ଅଟକ ରଖି ଅଧିକ ପଚାର ଉଚୁରା ଜାରୀ ରଖିଛି। ହତ୍ୟାକାଣ୍ଡରେ ବ୍ୟବହୃତ ଟାଙ୍ଗିଆକୁ ଜବତ କରି ଶବକୁ ବ୍ୟବଚ୍ଛେଦ ପାଇଁ ବଲାଙ୍ଗୀର ଭୀମ ଭୋଇ ମେଡିକାଲ କୁ ପଠାଇଥିବା ସୂଚନା ରହିଛି।