ଯାଜପୁର: ଯାଜପୁର ଜିଲ୍ଲା ବାଲିଚନ୍ଦ୍ରପୁର ଥାନାରେ ଦଳିତ ଯୁବକଙ୍କୁ ଥାର୍ଡ ଡିଗ୍ରୀ ଘଟଣାରେ ପୋଲିସ ନୂଆ ଖୁଲାସା କରିଛି । ଥାନାରେ ଯୁବକଙ୍କୁ କୌଣସି ପ୍ରକାରର ଥାର୍ଡ ଡିଗ୍ରୀ ହୋଇନି । ଯୁବକ ବିଷ ବି ପିଇ ନାହାନ୍ତି । ଘଟଣାରେ ଆଇଆଇସି ସଂପୂର୍ଣ୍ଣ ନିର୍ଦ୍ଦୋଷ । ଜେଲ୍ ଯିବା ଭୟରେ ରବୀନ୍ଦ୍ର ଏମିତି ନାଟକ ରଚିଥିଲା । ଏ ନେଇ ସାମ୍ବାଦିକ ସମ୍ମିଳନୀରେ ଶୁକ୍ରବାର ସୂଚନା ଦେଇଛନ୍ତି ଯାଜପୁର ଏସପି ।

ସୂଚନା ଅନୁଯାୟୀ, ରବିନ୍ଦ୍ର ମଲ୍ଲିକ ଜମି ବିବାଦକୁ ନେଇ ବାଲିଚନ୍ଦ୍ରପୁର ଥାନା ଆସିଥିଲେ । ହେଲେ ପୂର୍ବରୁ ତାଙ୍କ ନାଁରେ ମାମଲା ଥିଲା । ଯେଉଁ କାରଣରୁ ପୋଲିସ ରବିନ୍ଦ୍ରଙ୍କୁ ଥାନାରେ ଅଟକ ରଖିଥିଲେ ।  ହେଲେ ରବିନ୍ଦ୍ର ଅସୁସ୍ଥ ହେବାରୁ ତାଙ୍କୁ ବଡଚଣା ମେଡିକାଲରେ ଭର୍ତ୍ତି କରାଯାଇଥିଲା । ସ୍ୱାସ୍ଥ୍ୟବସ୍ଥା ଅଧିକ ବିଗିଡିବାରୁ ତାଙ୍କୁ କଟକ ବଡ ମେଡିକାଲ୍ ସ୍ଥାନାନ୍ତର କରାଯାଇଥିଲା । ସୁସ୍ଥ ହେବା ପରେ ପୋଲିସ ତାଙ୍କୁ ପଚରାଉଚୁରା କରି ଛାଡି ଦେଇଥିଲା ।

ହେଲେ ରବିନ୍ଦ୍ର ଥାନାରେ ତାଙ୍କୁ ମାଡ ମରାଯାଇଥିବା ଏବଂ ବିଷ ପିଇ ଦେଇଥିବା ଥାନାରେ ଅଭିଯୋଗ କରିଥିଲେ ପରିବାର ଲୋକ । ଅଭିଯୋଗ କ୍ରମରେ ତିନି ଜଣ ପୋଲିସ କର୍ମଚାରୀଙ୍କୁ ନିଲମ୍ବନ କରାଯାଇଥିଲା । ତେବେ ଘଟଣାର ସବୁ ଖୁଲାସା କରିଛନ୍ତି ଯାଜପୁର ଏସପି । ସିସିଟିଭି ଫୁଟେଜ୍ ଯାଞ୍ଚ ପରେ ଘଟଣାର ପୂରା ସତ୍ୟାସତ୍ୟ ପଦାକୁ ଆସିଛି । ଫୁଟେଜରୁ ଜଣା ପଡିଛି ଯେ, ନା ରବିନ୍ଦ୍ରଙ୍କୁ ପୋଲିସ ଥାର୍ଡ ଡିଗ୍ରୀ କରିଛି ନା ସେ ବିଷ ପିଇଛନ୍ତି ।