କେନ୍ଦୁଝର: ଲାଞ୍ଚୁଆ ସରକାରୀ ବାବୁଙ୍କ ବିରୋଧରେ ଓଡ଼ିଶା ଭିଜିଲାନ୍ସର କଡ଼ା କାର୍ଯ୍ୟାନୁଷ୍ଠାନ। କେନ୍ଦୁଝର ଜିଲ୍ଲା ଶ୍ରମ ଅଧିକାରୀ (DLO) ଆକାଶ ବିଷୋୟୀ ଲାଞ୍ଚ ନେଉଥିବା ବେଳେ ଭିଜିଲାନ୍ସ ଟିମ୍‌ ହାତରେ ଧରାପଡ଼ିଛନ୍ତି। ଏକ ସରକାରୀ ଶ୍ରମ ଲାଇସେନ୍ସ ମଞ୍ଜୁର କରିବା ବାବଦକୁ ୨୦ ହଜାର ଟଙ୍କା ଦାବି କରି ଗ୍ରହଣ କରୁଥିବା ସମୟରେ ତାଙ୍କୁ ଗିରଫ କରାଯାଇଛି।

ମିଳିଥିବା ସୂଚନା ମୁତାବକ, ଟାଟା ପାୱାର ଉତ୍ତର ଓଡ଼ିଶା ବିତରଣ ଲିମିଟେଡ୍ (TPNODL) ଅଧୀନରେ ବିଦ୍ୟୁତ ସଂସ୍ଥାପନ କାମ ପାଇଥିବା ଜଣେ ଠିକାଦାର ଶ୍ରମିକ ନିୟୋଜିତ କରିବା ପାଇଁ ଶ୍ରମ ଲାଇସେନ୍ସ ଆବଶ୍ୟକ କରୁଥିଲେ। ଏଥିପାଇଁ ସେ ଗତ ଅଗଷ୍ଟ ୧୪ ତାରିଖରେ ଅନଲାଇନ୍ ଆବେଦନ କରିଥିଲେ।

ପରେ ଅଗଷ୍ଟ ୧୬ ରେ ଠିକାଦାର ଜଣକ ଶ୍ରମ ଅଧିକାରୀ ଆକାଶ ବିଷୋୟୀଙ୍କୁ ସାକ୍ଷାତ କରି ଲାଇସେନ୍ସ କାମ ଆଗେଇବାକୁ ନିବେଦନ କରିଥିଲେ। କିନ୍ତୁ କାମ କରାଇଦେବା ବଦଳରେ DLO ବିଷୋୟୀ ୨୦,୦୦୦ ଟଙ୍କା ଲାଞ୍ଚ ଦାବି କରିଥିଲେ ଏବଂ ଟଙ୍କା ନଦେଲେ କାମ ନକରାଇ ଦେବାକୁ ହଇରାଣ କରୁଥିଲେ।

ଭିଜିଲାନ୍ସର ସ୍ୱତନ୍ତ୍ର ଫାନ୍ଦ

ଶ୍ରମ ଅଧିକାରୀଙ୍କ ଶୋଷଣରେ ଅତିଷ୍ଠ ହୋଇ ଠିକାଦାର ଜଣକ ସମ୍ପୂର୍ଣ୍ଣ ଘଟଣା ସମ୍ପର୍କରେ ଭିଜିଲାନ୍ସ ବିଭାଗକୁ ଲିଖିତ ଭାବେ ଜଣାଇଥିଲେ। ଅଭିଯୋଗକୁ ଭିତ୍ତି କରି ଭିଜିଲାନ୍ସ ପକ୍ଷରୁ ଏକ ସ୍ୱତନ୍ତ୍ର ଜାଲ ବିଛାଯାଇଥିଲା। ଆଜି ସନ୍ଧ୍ୟାରେ ଠିକାଦାରଙ୍କଠାରୁ ୨୦,୦୦୦ ଟଙ୍କା ଲାଞ୍ଚ ନେଉଥିବା ବେଳେ ଛକି ରହିଥିବା ଭିଜିଲାନ୍ସ ଟିମ୍‌ ଶ୍ରୀ ବିଷୋୟୀଙ୍କୁ ରଙ୍ଗେହାତ କାବୁ କରିଥିଲା। ଘଟଣାସ୍ଥଳରୁ ସମସ୍ତ ଦାଗୀ ଟଙ୍କା ଜବତ କରାଯାଇଛି।

ଘର ଓ କାର୍ଯ୍ୟାଳୟରେ ଏକକାଳୀନ ତଲାସି

ଗିରଫଦାରୀ ପରେ ଅଭିଯୁକ୍ତ ଜିଲ୍ଲା ଶ୍ରମ ଅଧିକାରୀଙ୍କ ଦୁଇଟି ନିର୍ଦ୍ଦିଷ୍ଟ ସ୍ଥାନ କେନ୍ଦୁଝରସ୍ଥିତ ତାଙ୍କ ସରକାରୀ ବାସଭବନ ଓ ବ୍ରହ୍ମପୁରସ୍ଥିତ ପୈତୃକ ଘର ଉପରେ ଭିଜିଲାନ୍ସ ଟିମ୍ ଏକକାଳୀନ ଚଢ଼ାଉ ଜାରି ରଖିଛି। ଏହି ମାମଲାରେ ବାଲେଶ୍ୱର ଭିଜିଲାନ୍ସ ଥାନାରେ କେସ୍ ରୁଜୁ କରାଯାଇ ଅଭିଯୁକ୍ତଙ୍କ ଆୟବହିର୍ଭୂତ ସମ୍ପତ୍ତିର ଖୋଳତାଡ଼ ସହ ଅଧିକ ତଦନ୍ତ ପ୍ରକ୍ରିୟା ଜାରି ରହିଛି।