କଟକ : ବଦଳି ହେଲେ ଚୌଦ୍ବାର ଜେଲର ସନ୍ତୋଷିନୀ ଦାସ। ଚୌଦ୍ବାର କାରାଗାରରୁ କଏଦୀ ଫେରାର ଘଟଣା ପରେ ଚୌଦ୍ବାର ଜେଲର ସନ୍ତୋଷିନୀ ଦାସଙ୍କୁ ବଦଳି କରାଯାଇଛି। ସୋମବାର ଏନେଇ ଜେଲ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ଜାରି ବିଜ୍ଞପ୍ତି ଅନୁସାରେ ସନ୍ତୋଷିନୀ ଦାସଙ୍କୁ କଣ୍ଟାବାଞ୍ଝି ଜେଲକୁ ବଦଳି କରାଯାଇଛି। ତାଙ୍କ ବଦଳରେ ରଘୁରାଜ ମାଝୀଙ୍କୁ ଚୌଦ୍ବାର ଜେଲର ଦାୟିତ୍ବ ଦିଆଯାଇଛି।

ସୂଚନାଥାଉ କି ଗତ ଅକ୍ଟୋବର ୧ ତାରିଖ ଦିନ ଜେଲରୁ ଫେରାର ଦୁଇ ଦୁର୍ଦ୍ଦାନ୍ତ ଅପରାଧି ଫେରାର ହୋଇଯାଇଥିଲେ। ଏହି ଦୁଇ ଅପରାଧୀ ହେଉଛନ୍ତି ୨ ବିହାରୀ କୁଖ୍ୟାତ ଡକାୟତ ମଧୁକାନ୍ତ ଓ ରାଜା ସାହାଣୀ। ଲୁଟ ଓ ହତ୍ଯା ଘଟଣାରେ ଏମାନେ ଗିରଫ ହୋଇ ଚୌଦ୍ୱାର ଜେଲରେ ଥିଲେ। 

ଏହି ଦୁଇଜଣ ଗତ ଜାନୁଆରୀ ୪ରେ ଯାଜପୁର ଜିଲ୍ଲା ପାଣିକୋଇଲି ପଣ୍ଡା ଅଳଙ୍କାର ଲୁଟ ଉଦ୍ୟମ ସହ ଦୁଇ ଜଣଙ୍କୁ ହତ୍ୟା କରି ଫେରାର ହେଉଥିବାବେଳେ ସ୍ଥାନୀୟ ଲୋକେ କାବୁ କରି ପୋଲିସରେ ଜିମା ଦେଇଥିଲେ । ଜାନୁଆରୀ ମାସରେ ଘଟିଥିବା ଘଟଣା ଏବେବି ରହସ୍ୟ ଘେରରେ ଥିବାବେଳେ ମାତ୍ର ୯ ମାସ ପରେ ଦୁଇ ଅପରାଧୀ ଜେଲ ପାଚେରୀ ଡେଇଁ ଫେରାର ହେବା ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା । କଡ଼ା ପହରା ସତ୍ତ୍ବେ ଲୁହା ରଡ କାଟି କମ୍ବଳ ଜରିଆରେ ପାଚେରୀ ଡେଇଁ ଦୁଇ ବିହାରୀ ଅପରାଧି ଫେରାର ମାରିଥିଲେ। ଯାହା ଜେଲର ସୁରକ୍ଷା ଢିଲାକୁ ନେଇ ପ୍ରଶ୍ନ ଉଠିଥିଲା। ଘଟଣାକୁ ନେଇ ଏବେ ଜେଲରଙ୍କୁ ବଦଳି କରାଯାଇଛି।