ଗଞ୍ଜାମ: ବିଦ୍ୟାଳୟ ବିବାଦକୁ ନେଇ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ହୋଇଛି। ଦୁଇଟି ସାହିର ପିଲାଙ୍କୁ ସ୍କୁଲ ଆସିବାକୁ ମନା କରିବାରୁ ମହାଭାରତ। ଗଞ୍ଜାମ ଜିଲ୍ଲା ଖଲ୍ଲିକୋଟ ନିକଟ ପଥରା ଗାଁରେ ଉଡ଼ିଲା ଟେକା ପଥର। ଗୋଷ୍ଠୀ ସଂଘର୍ଷକୁ ନେଇ ଚାପା ଉତ୍ତେଜନା ସୃଷ୍ଟି ହୋଇଥିବା ବେଳେ ପୁଲିସ ଗାଁରେ ପହଞ୍ଚି ସ୍ଥିତି ନିୟନ୍ତ୍ରଣ ପାଇଁ ଉଦ୍ୟମ କରୁଛନ୍ତି। 

ଅଭିଯୋଗ ଅନୁସାରେ ପଥରା ଗାଁର କଣ୍ଡରାପଡ଼ା ସ୍କୁଲରେ ପାଠ ପଢ଼ିବାକୁ ଆସୁଥିବା ତଳସାହି ଓ କପିଳେଶ୍ୱର ସାହିର ପିଲାଙ୍କୁ ମନା କରିବାରୁ ବିବାଦ ଦେଖାଦେଇଛି। ସ୍କୁଲରେ ପିଲା ଅଧିକ ହେଉଥିବାରୁ ପାଠ ଭଲ ହେଉନି ବୋଲି କଣ୍ଡରାପଡ଼ାର କିଛି ଲୋକ ତଳସାହି ଓ କପିଳେଶ୍ୱର ସାହି ପିଲାଙ୍କୁ ସ୍କୁଲ ନଆସିବାକୁ କହିଥିଲେ। ଏହାକୁ ନେଇ ବିବାଦ ପରେ ଗୋଷ୍ଠୀ ଶିକ୍ଷା ଅଧିକାରୀ ସମାଧାନ କରିବାକୁ ଯାଇଥିଲେ।ଏହି ସମୟରେ ଉତ୍ୟକ୍ତ ଲୋକ ତାଙ୍କୁ ୪ ଘଣ୍ଟା ଅଟକ ରଖିଥିଲେ। କୌଣସି ସମାଧାନ ନହେବାରୁ ଫେରି ଆସିଥିଲେ ଗୋଷ୍ଠୀ ଶିକ୍ଷା ଅଧିକାରୀ। ଏହାପରେ ପଥରା ଗାଁର ତଳସାହି ଓ କଣ୍ଡରା ସାହିର ଦୁଇ ଗୋଷ୍ଠୀ ମାରପିଟ ହେବା ସହ ପରସ୍ପର ଉପରକୁ ଢେଳାପଥର ମାଡ଼ କରିଛନ୍ତି। ଆକ୍ରମଣ ପ୍ରତି ଆକ୍ରମଣରେ କିଛି ଆହତ ହୋଇଛନ୍ତି, ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ସ୍ଥିତି ନିୟନ୍ତ୍ରଣ କରିଛି।

ଅଭଯୋଗ ମୁତାବିକ, ଗତ ୧୭ ତାରିଖ ଦିନ କଣ୍ଡରାପଡ଼ା ସ୍ଥିତ ପ୍ରାଥମିକ ବିଦ୍ୟାଳୟରେ ଅନୁଷ୍ଠିତ ଅଭିଭାବକ, ଛାତ୍ରଛାତ୍ରୀ, ଶିକ୍ଷକଙ୍କ ଏକ ମିଳିତ ବୈଠକ ବସିଥିଲା। ସେ ବୈଠକରେ ତଳସାହିର କିଛି ଅଭିଭାବକ ଯୋଗ ଦେବାକୁ ଯାଇଥିବା ବେଳେ ସେମାନଙ୍କୁ ବିଭିନ୍ନ ଆପତ୍ତିଜନକ ଭାଷାରେ ଗଲି ହୋଇଥିଲା, ଫଳରେ ଏହାର ପ୍ରତିବାଦରେ ତଳସାହିର ଅଭିଭାବକମାନେ ଖଲ୍ଲିକୋଟ ଗୋଷ୍ଠୀ ଶିକ୍ଷାଅଧିକାରୀଙ୍କ କାର୍ଯ୍ୟାଳୟକୁ ୫୦ରୁ ଉର୍ଦ୍ଧ ମହିଳା ଓ ପୁରୁଷ ଆସି ଅଭିଯୋଗ ଜଣାଇବା ସହିତ ପିଲାମାନଙ୍କ ସାର୍ଟିଫିକେଟ ଦେବା ପାଇଁ ଦାବି କରିଥିଲେ ତେବେ ଏହି ଘଟଣାକୁ ନେଇ ଉଭୟ ଗୋଷ୍ଠୀ ମଧ୍ୟରେ ବିବାଦ ଉପୁଜି ଗଣ୍ଡଗୋଳର ରୂପ ନେଇଥିଲା। 

ଅଧିକ ପଢନ୍ତୁ: କୁକି ଯୁବତୀଙ୍କୁ ବିବାହ କରିଥିବା ମୈତେଇ ଯୁବକଙ୍କୁ ଅପହରଣ କରି ଗୁଳି କରି ହତ୍ୟା