ଫୁଲବାଣୀ: କନ୍ଧମାଳ ଜିଲ୍ଲା ବ୍ରାହ୍ମଣୀଗାଁ ଥାନା ଅଞ୍ଚଳରେ ସିରିଜ୍ ଦୁର୍ଘଟଣା ଘଟିଛି । ବେପୁରୁଆ ଗାଡ଼ି ଚାଳନା ଯୋଗୁଁ ଜଣଙ୍କର ମୃତ୍ୟୁ ହେବା ସହିତ ଦୁଇ ଜଣ ଗୁରୁତର ହୋଇଛନ୍ତି । ମୃତ ବ୍ୟକ୍ତି ଜଣକ ବଣ୍ଡାସା ମାଝୀ । ଆହତ ଦ୍ବୟଙ୍କୁ ଉଦ୍ଧାର କରାଯାଇ ଚିକିତ୍ସା ପାଇଁ ବ୍ରହ୍ମପୁର ସ୍ଥାନାନ୍ତର କରଯାଇଛି ।
ସୂଚନା ଅନୁସାରେ, ପେଟା ମାଝୀ ଓ ତାଙ୍କ ସ୍ତ୍ରୀ ବଣ୍ଡା ବୁଡ଼ି ମାଝୀ ଚା ଦୋକାନ ଖୋଲି ଥିଲେ ବଣ୍ଡାସା ମାଝୀ ସେହି ଦୋକାନକୁ ଚା ପିଇବାକୁ ଯାଇଥିଲେ। ସେହି ସମୟରେ ସରାମୁଳୀରୁ ବ୍ରହ୍ମପୁର ଅଭିମୁଖେ ଯାଉଥିବା ଏକ ବସ ଦ୍ରୁତଗତିରେ ଆସି ଅନ୍ୟ ଏକ ବସକୁ ଓଭର ଟେକ୍ କରିଥିଲା । ଏହି ସମୟରେ ପ୍ରଥମେ ସେଠାରେ ଥିବା ଏକ କାର୍ କୁ ଧକ୍କା ଦେଇ ଚା ଦୋକାନକୁ ମାଡିଯାଇଥିଲା । ଚା ପିଇବାକୁ ଯାଇଥିବା ବଣ୍ଡାସା ମାଝୀଙ୍କ ଉପରକୁ ଗାଡ଼ି ଚଢ଼ି ଯାଇ ଥିଲା ।
ଘଟଣାସ୍ଥଳରେ ବଣ୍ଡାସାଙ୍କ ମୃତ୍ୟୁ ଘଟିଥିବା ବେଳେ ପେଟା ଓ ତାଙ୍କ ସ୍ତ୍ରୀ ଗୁରୁତର ଆହତ ହୋଇଥିଲେ। ସ୍ଥାନୀୟ ଲୋକେ ଉଦ୍ଧାର କରି ତାଙ୍କୁ ପ୍ରଥମେ ବ୍ରାହ୍ମଣୀଗାଁ ମେଡ଼ିକାଲରେ ଭର୍ତ୍ତି କରିଥିଲେ କିନ୍ତୁ ଅବସ୍ଥା ଗୁରୁତର ଥିବାରୁ ବ୍ରହ୍ମପୁର ବଡ ମେଡ଼ିକାଲକୁ ସ୍ଥାନାନ୍ତର କରାଯାଇଥିଲା । ଦୁର୍ଘଟଣାର ଖବର ପାଇ, ବ୍ରାହ୍ମଣୀଗାଁ ଥାନା ଆଇଆଇସି ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି । କ୍ଷତିପୂରଣ ଦାବି କରି ସ୍ଥାନୀୟ ଲୋକେ ମୃତଦେହ ରଖି ରାସ୍ତା ଅବରୋଧ କରିଛନ୍ତି ।