କଟକ ସଦର ନଛିପୁରରୁ ଗତ ଶୁକ୍ରବାର ଘଟିଥିବା ନାବାଳକ ଅପହରଣ ଘଟଣାର ପର୍ଦ୍ଦାଫାସ କରିଛି କମିଶନରେଟ ପୋଲିସ। ଅପହୃତ ୬ ବର୍ଷର ନାବାଳକକୁ ନୟାଗଡ ଦଶପଲ୍ଲାରୁ ଉଦ୍ଧାର କରାଯାଇ ଥିବା ବେଳେ ଅପହରଣରେ ସଂପୃକ୍ତ ୬ ଜଣଙ୍କୁ କଟକ ସଦର ପୋଲିସ ଗିରଫ କରି କୋର୍ଟ ଚାଲାଣ କରିଛି। 

ଅଭିଯୋଗ ଅନୁସାରେ, ନିଛିପୁରଠାରେ ଏକ ଇଟାଭାଟିରେ ନବରଙ୍ଗପୁରର ମଙ୍ଗଳ ସିଂ କାମ କରୁଥିଲେ। ଗତ ଶୁକ୍ରବାର ତାଙ୍କ ଦୁଇ ପୁଅ ଖେଳୁଥିବା ସମୟରେ ସେହି ଅଞ୍ଚଳରେ କାମ କରୁଥିବା ବଲାଙ୍ଗୀର ଜିଲ୍ଲାର ଜଣେ ମହିଳା ଅନ୍ୟ ଜଣଙ୍କ ସହାୟତାରେ ଉଭୟଙ୍କୁ ଅପହରଣ କରି ନେଇଥିଲେ। ଉଭୟଙ୍କୁ ଅପହରଣ କରି ନେଇ ସେ କାମ କରୁଥିବା ଏକ ପାଣିପାଉଚ୍ କମ୍ପାନୀରେ ଲୁଚାଇ ରଖିଥିଲେ। 

ଅପହୃତା ମହିଳାଙ୍କ କବଳରୁ ୯ ବର୍ଷର ନାବାଳକ ଶନିବାର ଖସି ଆସି ସବୁ କଥା ପରିବାର ଲୋକଙ୍କୁ କହିଥିଲା। ତେବେ ମହିଳା ଜଣଙ୍କ ୬ ବର୍ଷୀୟ ନାବାଳକକୁ ନୟାଗଡ଼ ଜିଲ୍ଲା ଦଶପଲ୍ଲାରେ ବିକ୍ରି କରିଦେଇଥିବା କହିଥିଲେ ଅନ୍ୟଜଣେ ଅପହୃତ ନାବାଳକ। ମହିଳା ଜଣଙ୍କ କେଉଁ ଉଦେଶ୍ୟରେ ନାବାଳକଙ୍କୁ ଅପହରଣ କରିଥିଲେ ଏବଂ ତାଙ୍କ ସହ ଆଉ କିଏ ସଂପୃକ୍ତ ଅଛି  ସେ ନେଇ ତଦନ୍ତ କରୁଛି ପୋଲିସ।