ଭୁବନେଶ୍ୱର: ରାଜ୍ୟରେ ହାତୀ ମୃତ୍ୟୁର ବଡ଼ କାରଣ ହେଉଛି ବିଦ୍ୟୁତ ତାର । ଗତ ୫ ବର୍ଷ ରେ ବିଦ୍ୟୁତ ସଂସ୍ପର୍ଶରେ ଆସି ୨୭ ହାତୀଟି ମୃତ୍ୟୁବରଣ କରିଛନ୍ତି । ପଶ୍ଚିମ ଓଡ଼ିଶାରେ ଏହି ସଂଖ୍ୟା ସର୍ବାଧିକ ଅଟେ । ଅନ୍ୟପକ୍ଷରେ ଗତ ପାଞ୍ଚ ବର୍ଷରେ ବିଦ୍ୟୁତ ତାର ସଂସ୍ପର୍ଶରେ ଆସି ୯୧ ଲୋକଙ୍କ ମୃତ୍ୟୁ ହୋଇଛି । ସେହିପରି ଏ ନେଇ ଆଜି ଗୃହରେ ଉତ୍ତର ରଖିଛନ୍ତି ଉପ ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହ ଦେଓ । 

ବିଜେଡ଼ି ବିଧାୟକ ଅରୁଣ ସାହୁ ପ୍ରଶ୍ନ କରିଥିଲେ, ବିଜୁଳି ଆଘାତକାରଣରୁ ଟାଟା ପାୱାର ଡିସକମଗୁଡ଼ିକ ଅଧିନରେ ଗତ ୫ ବର୍ଷ ମଧ୍ୟରେ କେତେ ଜଣ ମଣିଷ ଓ କେତୋଟି ହାତୀଙ୍କର ମୃତ୍ୟୁ ହୋଇଛି ? ଏହାର ବର୍ଷ ୱାରୀ, ଡିସକମ୍ ୱାରୀ ବିବରଣୀ ପ୍ରଦାନ କରିବାକୁ ଉପ ମୁଖ୍ୟମନ୍ତ୍ରୀ କହିଥିଲେ । ଏଥିପାଇଁ କେଉଁ ଅଧିକାରୀମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ବୋଲି ପଚାରିଥିଲେ । ମନ୍ତ୍ରୀ ଉତ୍ତର ରଖିଛନ୍ତି, ଗତ ୫ ବର୍ଷରେ ବିଦ୍ୟୁତ ସଂସ୍ପର୍ଶରେ ଆସି ୨୭ ହାତୀଟି ମୃତ୍ୟୁବରଣ କରିଛନ୍ତି । ୨୦୨୪-୨୫ରେ ସର୍ବାଧିକ ୧୧ ଟି ହାତୀ ମୃତ୍ୟୁବରଣ କରିଥିବାବେଳେ ୨୦୨୩-୨୪ ବର୍ଷରେ ୨ଟି, ୨୦୨୨-୨୩ରେ ୧ ଟି, ୨୦୨୧-୨୨ରେ ୨ଟି ଓ ୨୦୨୦-୨୧ରେ ୧ଟି ହାତୀର ମୃତ୍ୟୁ ହୋଇଛି । କେବଳ ପଶ୍ଚିମ ଓଡ଼ିଶାରେ ସର୍ବାଧିକ ୧୭ଟି ହାତୀଙ୍କର ମୃତ୍ୟୁ ହୋଇଛି । ସେହିପରି ଦକ୍ଷିଣ ଓଡ଼ିଶାରେ ୧ଟି ହାତୀ ଓ ଉତ୍ତର ଓଡ଼ିଶାରେ ବିଦ୍ୟୁତ ସଂସ୍ପର୍ଶରେ ଆସି ୯ଟି ହାତୀ ମୃତ୍ୟୁ ବରଣ କରିଛନ୍ତି । 

ଏଥିପାଇଁ ଦାୟୀ ଥିବା ୧୦୭ ଜଣ ଅଧିକାରୀଙ୍କ ବିରୁଦ୍ଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ବୋଲି ଉପମୁଖ୍ୟମନ୍ତ୍ରୀ ଲିଖିତ ଉତ୍ତର ରଖିଛନ୍ତି ।