ଭୁବନେଶ୍ୱର: ରାଜ୍ୟସଭା ନିର୍ବାଚନ ଯେତିକି ପାଖେଇ ଆସୁଛି ସମସ୍ତ ଦଳରେ ସେତିକି ଭୟ ବଢ଼ୁଛି । ଦିଲ୍ଲୀପ ରାୟଙ୍କ ପ୍ରାର୍ଥୀତ୍ୱ ଉଭୟ ବିଜେଡ଼ି ଏବଂ କଂଗ୍ରେସ ପାଇଁ ମୁଣ୍ଡ ବିନ୍ଧାର କାରଣ ପାଲଟିଛି । ଉଭୟ ଦଳ ଘୋଡ଼ା ବେପାର ଭୟରେ ଘଡ଼ିକି ଘଡ଼ି ବିଧାୟକଙ୍କୁ ତାଗିଦ କରୁଛନ୍ତି । ଏହାରି ମଧ୍ୟରେ କଂଗ୍ରେସର ୯ ଜଣ ବିଧାୟକ ପିସିସି ସଭାପତିଙ୍କ ସହିତ ରାଜ୍ୟ ବାହାରକୁ ପଳାଇ ଯାଇଛନ୍ତି । ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ ଏହାକୁ ସ୍ୱୀକାର କରିଛନ୍ତି । ଯାହାକୁ ନାପସନ୍ଦ କରିଛନ୍ତି ଦଳର ବିଧାୟିକା ସୋଫିଆ ଫିର୍ଦ୍ଦୋସ ।

ଗତକାଲି ରାତିରେ ପିସିସି ସଭାପତି ୮ ଜଣ ବିଧାୟକଙ୍କୁ ନେଇ ବେଙ୍ଗାଲୁରୁ ଗସ୍ତ କରିଛନ୍ତି । ସେଠାରେ ଏକ ଘରୋଇ ରିସର୍ଟରେ ରହଣି କରିଛନ୍ତି । ରାଜ୍ୟ ବାହାରକୁ ଯାଇଥିବା କଂଗ୍ରେସ ବିଧାୟକଙ୍କ ମଧ୍ୟରେ ଅଶୋକ କୁମାର ଦାସ, ପବିତ୍ର ସାଉଁନ୍ତା, ଡାକ୍ତର ସିଏସ୍ ରାଜନ ଏକ୍କା, ପ୍ରଫୁଲ୍ଲ ପ୍ରଧାନ, କାଡ୍ରାକା ଆପଲା ସ୍ୱାମୀ, ନୀଳ ମାଧବ ହିକ୍କକା, ସତ୍ୟଜିତ ଗମାଙ୍ଗୋ ଓ ମଙ୍ଗୁ ଖିଲ ପ୍ରମୁଖ ସାମିଲ । ମାର୍ଚ୍ଚ ୧୬ରେ ରାଜ୍ୟସଭା ନିର୍ବାଚନ ହେବାକୁ ଯାଉଥିବା ବେଳେ ବିଧାୟକଙ୍କୁ ନେଇ ମାର୍ଚ୍ଚ ୧୫ରେ ଓଡ଼ିଶା ଫେରିବେ ଭକ୍ତ ଦାସ । କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ୍, ରମେଶ ଜେନା, ତାରା ବାହିନୀପତି, ସୋଫିଆ ଫିର୍ଦ୍ଦୋସ, ସାଗର ଚରଣ ଦାସ ଓ ଦାଶରଥି ଗମାଙ୍ଗ ବେଙ୍ଗାଲୁରୁ ଯାଇ ନଥିବା ଜଣା ପଡ଼ିଛି।

କାଡ଼ାମ କହିଛନ୍ତି ଯେ ତାଙ୍କ ଦଳର ବିଧାୟକମାନଙ୍କୁ ବିଜେପି ପ୍ରଲୋଭିତ କରୁଛି । ତେଣୁ ସୁରକ୍ଷିତ ରହିବାକୁ ଚେଷ୍ଟା କରାଯାଉଛି । ଯେଉଁମାନେ କ୍ରସ ଭୋଟିଂ କରିବାର ସମ୍ଭାବନା ରହିଛି ସେମାନେ ବେଙ୍ଗାଲୁରୁ ଯାଇଛନ୍ତି । ଯେଉଁ ୫ ଜଣ ବିଧାୟକ ଭୁବନେଶ୍ୱର ଯାଇନାହାଁନ୍ତି ସେମାନେ କ୍ରସ୍ ଭୋଟିଂ କରିବେ ନାହିଁ ବୋଲି କାଡ଼ାମ କହିଛନ୍ତି । 

ଗୋଟିଏ ପଟେ ଦଳ ପକ୍ଷରୁ ହ୍ୱିପ୍ ଜାରି କରି ଭୁବନେଶ୍ୱର ନ ଛାଡ଼ିବାକୁ ନିର୍ଦ୍ଦେଶ ଦିଆଯାଇଥିବାବେଳେ ଅନ୍ୟପଟେ ବେଙ୍ଗାଲୁରୁ ଗସ୍ତ କରିବାକୁ ନେଇ ଅସନ୍ତୋଷ ପ୍ରକାଶ ପାଇଛି । ସେହିପରି ସୋଫିଆ ଫିର୍ଦ୍ଦୋସ୍ ଏହାକୁ ନାପସନ୍ଦ କରିଛନ୍ତି । ବେଙ୍ଗାଲୁରୁ ଗସ୍ତ ନେଇ ତାଙ୍କୁ କୌଣସି ସୂଚନା ଦିଆଯାଇ ନାହିଁ । ଗଣମାଧ୍ୟମରୁ ଏସବୁ ସୂଚନା ମିଳିଛି । ସେ କହିଛନ୍ତି ମୁଁ ବେଙ୍ଗାଲୁରୁ ଯିବାର କୌଣସି ଆବଶ୍ୟକତା ନାହିଁ । କଟକ ସହର ଭଳି ଏକ ଶିକ୍ଷିତ ସହରରୁ ଆସିଛୁ । ତେଣୁ ଆମେ ସଠିକ୍ ନିଷ୍ପତ୍ତି ନେବୁ । 

ସେପଟେ ତାରାପ୍ରସାଦ ବାହିନୀପତି କହିଛନ୍ତି ବିଧାୟକମାନେ ବୁଲିବାକୁ ଯାଉଛନ୍ତି । ସେମାନେ ବହୁତ ଦିନ ହେଲାଣି ବୁଲିବାକୁ ଯାଇନଥିଲେ ସେଥିପାଇଁ ଯାଇଛନ୍ତି । କୌଣସି କ୍ରସ୍ ଭୋଟିଂର ଭୟ ନ ଥିବା ତାରା ସଫେଇ ଦେଇଛନ୍ତି ।