ସୁନ୍ଦରଗଡ଼ ଜିଲ୍ଲାର ରାଜଗାଙ୍ଗପୁରରେ ଏକ ଲଜ୍ଜାଜନକ ଖବର ସାମ୍ନାକୁ ଆସିଛି। ଜଣେ ସାତ ବର୍ଷର ଝିଅକୁ ଦୁଷ୍କର୍ମ କରିବା ପରେ ହତ୍ୟା କରାଯାଇଛି। ହତ୍ୟା ପରେ ମୃତଦେହଟିକୁ ଜଙ୍ଗଲ ଫୋପାଡ଼ି ଦେଇଛି ଦୁର୍ବୁତ୍ତ। ଏଭଳି ଘଟଣା ଘଟିଛି ସୁନ୍ଦରଗଡ଼ ଜିଲ୍ଲା ମାଲଡିହି ପଞ୍ଚାୟତରେ।

ମୃତ ନାବାଳିକା ଝିଅଟି ଦ୍ୱିତୀୟ ଶ୍ରେଣୀର ଛାତ୍ରୀ ହୋଇଥିବା ବେଳେ ସେ ତାଙ୍କ ମାମୁଁଙ୍କ ଘରେ ରହୁଥିଲେ। ମାର୍ଚ୍ଚ ୯ ତାରିଖରେ ଘର ପାଖରେ ଝିଅଟି ଖେଳୁଥିବା ସମୟରେ ନିଖୋଜ ହୋଇଯାଇଥିଲା। ତାଙ୍କ ପରିବାର ବହୁତ ଖୋଜାଖୋଜି କରିଥିଲେ ମଧ୍ୟ ତାଙ୍କୁ ପାଇନଥିଲେ। ମାର୍ଚ୍ଚ ୧୦ ତାରିଖରେ ତାଙ୍କ ମାମୁଁ ଏନେଇ ରାଜଗାଙ୍ଗପୁର ଥାନାରେ ନିଖୋଜ ଅଭିଯୋଗ କରିଥିଲେ।

ସୁନ୍ଦରଗଡ଼ ଏସ୍ପି ଅମୃତପାଲ କୌରଙ୍କ ତତ୍ତ୍ୱାବଧାନରେ ପୋଲିସ ଏକ ଟିମ ତଦନ୍ତ ଆରମ୍ଭ କରିଥିଲା। ଅତିରିକ୍ତ ଏସ୍ପି କେପି ମିଶ୍ର ଏବଂ ଏସ୍ଡିପିଓ ବିଭୂତି ଭୂଷଣ ଭୋଇଙ୍କ ନେତୃତ୍ୱରେ ଏହି ଟିମ ସ୍ଥାନୀୟ ଅଧିକାରୀଙ୍କ ସହିତ ସ୍ନିଫର କୁକୁର ସାହାଯ୍ୟରେ ଅଞ୍ଚଳର ତଲାସି କରିଥିଲେ। ପଚରାଉଚରା ସମୟରେ, ୨୪ ବର୍ଷ ବୟସ୍କ ଜଣେ ଗ୍ରାମବାସୀ ମାଇକେଲ କିଣ୍ଡୋଙ୍କ ଉପରେ ସନ୍ଦେହ ହୋଇଥିଲା। ପୋଲିସ ତାଙ୍କୁ ସାମ୍ନା କରିବା ମାତ୍ରେ କିଣ୍ଡୋ ସେଠାରୁ ଖସିଯିବାକୁ ଚେଷ୍ଟା କରିଥିଲା, କିନ୍ତୁ ପୋଲିସ ଟିମ ତାକୁ ଧରିବାରେ ସକ୍ଷମ ହୋଇଛନ୍ତି। 

ତେବେ ପଚରାଉଚରାରୁ ଜଣାପଡିଥିଲା ସେ ହିଁ ଅଭିଯୁକ୍ତ। ନାବାଳିକାକୁ ସେ ପ୍ରଲୋଭିତ କରି, ଦୁଷ୍କର୍ମ କରିବା ପରେ ଏବଂ ଗଳାକାଟି ହତ୍ୟା କରିବା କଥା ସ୍ୱୀକାର କରିଥିଲା। ପରେ ସେ ମୃତଦେହକୁ ପ୍ରାୟ ଚାରି କିଲୋମିଟର ଦୂରରେ ଏକ ପଥର ଖଣି ଭିତରେ ଲୁଚାଇ ଦେଇଥିଲା। ପୋଲିସ ମୃତଦେହକୁ ଉଦ୍ଧାର କରି  ପୋଷ୍ଟମର୍ଟମ କରିବା ପରେ ପରିବାରକୁ ହସ୍ତାନ୍ତର କରିଛି।