ମହିଳା ଏସିଆ କପ୍ ୨୦୨୪ ର ପ୍ରଥମ ମ୍ୟାଚରେ ୟୁଏଇକୁ ପରାସ୍ତ କରି ନେପାଳ ଇତିହାସ ସୃଷ୍ଟି କରିଛି । ନେପାଳ ପ୍ରଥମ ଥର ପାଇଁ ମହିଳା ଏସିଆ କପରେ ପ୍ରଥମ ବିଜୟ ହାସଲ କରିଛି। ଅଧିନାୟକ ଇନ୍ଦୁ ବର୍ମାଙ୍କ ବୋଲିଂ ଓ ସମଜାନା ଖଡକାଙ୍କ ଅର୍ଦ୍ଧଶତକ ବଳରେ ନେପାଳ ୟୁଏଇକୁ ୬ ୱିକେଟରେ ପରାସ୍ତ କରିଛି । 

ପ୍ରଥମେ ବ୍ୟାଟିଂ କରି ୟୁଏଇ ୮ ୱିକେଟ୍ ହରାଇ ୧୧୫ ରନ ସଂଗ୍ରହ କରିଥିଲା। ୟୁଏଇ ପକ୍ଷରୁ ଖୁସି ଶର୍ମା ସର୍ବାଧିକ ୩୬ ରନ ସଂଗ୍ରହ କରିଥିଲେ । କବିଶା ୨୨ , ସମାଇରା ୧୩ ଓ ଇଷା ୧୦ ରନ ସଂଗ୍ରହ କରିଥିଲେ । ନେପାଳ ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିବାବେଳେ ଅଧିନାୟକ ଇନ୍ଦୁ ବର୍ମା ଚମତ୍କାର ବୋଲିଂର ପ୍ରଦର୍ଶନ କରିଥିଲେ । ୪ ଓଭର ବୋଲିଂ କରି ୧୯ ରନ ଦେଇ ୩ ଟି ୱିକେଟ୍ ନେଇଥିଲେ । କୃତ୍ତିକା, କବିତା ଓ ସବନମ ଗୋଟିଏ ଲେଖାଏଁ ୱିକେଟ୍ ନେଇଥିଲେ । 

ଦ୍ଵିତୀୟ ଇନିଂସରେ ସମଜାନା ଖଡକା ଅପରାଜିତ ରହି ଅର୍ଦ୍ଧଶତକ ହାସଲ କରିବା ସହ ଦଳକୁ ପ୍ରଥମ ବିଜୟ ହାସଲ କରିବାରେ ମୁଖ୍ୟ ଭୂମିକା ଗ୍ରହଣ କରିଥିଲେ । ୪୫ ବଲରେ ୭୨ ରନ ସଂଗ୍ରହ କରିଥିଲେ ଖଡକା ଯେଉଁଥିରେ ୧୧ ଟି ଚୌକା ସାମିଲ ଥିଲା । ସାଥି ଖେଳାଳି ସୀତା ରାଣା ୭, କବିତା ୨, ଇନ୍ଦୁ ୬, ରୁବିନା ୧୦ ଓ ପୂଜା ୭ ରନ ସଂଗ୍ରହ କରିଥିଲେ । ଏହାସହ ନେପାଳ ବିଜୟ ସହ ଅଭିଯାନ ଆରମ୍ଭ କରିଛି । ନିଜ ବ୍ୟାଟିଂ ବଳରେ ନେପାଳକୁ ମ୍ୟାଚ ଜିତାଇଥିବା ସମଜାନା ଖଡକାଙ୍କୁ ମ୍ୟାଚର ଶ୍ରେଷ୍ଠ ଖେଳାଳି ରୂପେ ଚୟନ କରାଯାଇଛି ।