ଟି-୨୦ ବିଶ୍ୱକପ ୨୦୨୪ ପରେ ଅନ୍ତର୍ଜାତୀୟ କ୍ରିକେଟରୁ ବିଦାୟ ନେଇଛନ୍ତି ଡେଭିଡ ୱାର୍ଣ୍ଣର । କିଛି ଦିନ ପୂର୍ବରୁ ସେ ଇନଷ୍ଟାଗ୍ରାମରେ ଏକ ପୋଷ୍ଟ ଲେଖି ଅବସର ଘୋଷଣା କରିଥିଲେ। କିନ୍ତୁ ସମାନ ପୋଷ୍ଟରେ ୱାର୍ଣ୍ଣର ମଧ୍ୟ ଫେରିବାକୁ ଇଚ୍ଛା ପ୍ରକାଶ କରିଥିଲେ। ସେ ଲେଖିଛନ୍ତି ଯେ ଯଦି ଚୟନକର୍ତ୍ତା ଚାହାଁନ୍ତି, ତେବେ ସେ ଆସନ୍ତା ବର୍ଷ ଅନୁଷ୍ଠିତ ହେବାକୁ ଥିବା ଚାମ୍ପିଅନ୍ସ ଟ୍ରଫିରେ ସେ ନିଶ୍ଚିତ ଖେଳିବେ। ବର୍ତ୍ତମାନ କ୍ରିକେଟ ଅଷ୍ଟ୍ରେଲିଆର ମୁଖ୍ୟ ଚୟନକର୍ତ୍ତା ଏହି ପ୍ରସଙ୍ଗରେ ନିଜର ମତ ଦେଇଛନ୍ତି।

ଚୟନକର୍ତ୍ତା କମିଟିର ମୁଖ୍ୟ ଜର୍ଜ ବେଲି ୱାର୍ନରଙ୍କ ୨୦୨୫ ଚାମ୍ପିଅନ୍ସ ଟ୍ରଫି ସ୍ବପ୍ନ ଉପରେ ପୂର୍ଣ୍ଣଛେଦ ପକାଇଛନ୍ତି । ସେ କହିଛନ୍ତି ଡେଭିଡ ୱାର୍ନର ଜଣେ ଭଲ ଖେଳାଳି ଓ ଅଷ୍ଟ୍ରେଲିଆ ପାଇଁ ୩ ଟି ଫର୍ମାଟରେ ୱାର୍ନର ଭଲ ପ୍ରଦର୍ଶନ କରିଛନ୍ତି କିନ୍ତୁ ଆମ ପାଇଁ ସେ ଅବସର ନେଇସାରିଛନ୍ତି । ଅର୍ଥାତ ଚୟନକର୍ତ୍ତା କମିଟି ୱାର୍ନରଙ୍କ ଉପରୁ ନଜର ହଟାଇ ସାରିଛି । ସେ କହିଛନ୍ତି ୱାର୍ନରଙ୍କ ଅବଦାନ ଅଷ୍ଟ୍ରେଲିଆ ପାଇଁ ବେଶ ସ୍ମରଣୀୟ ହୋଇ ରହିବ ।

ତେବେ ଅଷ୍ଟ୍ରେଲିଆର ମହାନ ବ୍ୟାଟ୍ସମ୍ୟାନ ମାନଙ୍କ ମଧ୍ୟରେ ୱାର୍ଣ୍ଣରଙ୍କ ଗଣନା କରାଯାଏ । ସେ ଅଷ୍ଟ୍ରେଲିଆ ସହିତ ତିନୋଟି ବିଶ୍ୱକପ ବିଜୟୀ ଦଳରେ ସାମିଲ ଥିଲେ। ୨୦୧୫ ଓ ୨୦୧୯ ରେ ଅଷ୍ଟ୍ରେଲିଆ ଜିତିଥିବା ଦିନିକିଆ ବିଶ୍ୱକପରେ ଏବଂ ୨୦୨୧ ମସିହାରେ ଖେଳାଯାଇଥିବା ଟି-୨୦ ବିଶ୍ୱକପରେ ମଧ୍ୟ ସାମିଲ ଥିଲେ ୱାର୍ନର । ୱାର୍ଣ୍ଣର ଅଷ୍ଟ୍ରେଲିଆ ପାଇଁ ୧୧୨ ଟି ଟେଷ୍ଟ ମ୍ୟାଚ ଖେଳିଥିଲେ ଯେଉଁଥିରେ ସେ ୮୭୮୬ ରନ ସଂଗ୍ରହ କରିଛନ୍ତି । ସେ ୧୬୧ ଟି ଦିନିକିଆ ମ୍ୟାଚରେ ୬୯୩୨ ରନ ସ୍କୋର କରିଛନ୍ତି ।ୱାର୍ଣ୍ଣର ଅଷ୍ଟ୍ରେଲିଆ ପାଇଁ ୧୧୦ ଟି-୨୦ ମ୍ୟାଚ ଖେଳି  ୩୨୭୭ ରନ ସ୍କୋର କରିଥିଲେ।