ନୂଆଦିଲ୍ଲୀ: ୟୁଏଇରେ ହେବାକୁ ଥିବା କ୍ରିକେଟ ଏସିଆ କପ୍-୨୦୨୫ର କାର୍ଯ୍ୟସୂଚୀ ରେ ସାମାନ୍ୟ ପରିବର୍ତ୍ତନ କରାଯାଇଛି । ଅତ୍ୟଧିକ ଗରମ ଯୋଗୁଁ କେତେ ମ୍ୟାଚର ସମୟ ପରିବର୍ତ୍ତନ କରାଯାଇଛି । ଖେଳାଯିବାକୁ ଥିବା ୧୯ଟି ମ୍ୟାଚ ମଧ୍ୟରୁ ୧୮ଟି ମ୍ୟାଚ୍ ନିର୍ଦ୍ଧାରିତ ସମୟର ୩୦ ମିନିଟ୍ ପରେ ଆରମ୍ଭ ହେବ । ସଂଶୋଧିତ ସମୟ ଅନୁସାରେ ସ୍ଥାନୀୟ ସମୟ ସନ୍ଧ୍ୟା ୬ଟା ୩୦ (ଭାରତୀୟ ସମୟ ରାତି ୮)ରେ ମ୍ୟାଚ୍ ଆରମ୍ଭ ହେବ । ପୂର୍ବରୁ ସନ୍ଧ୍ୟା ୬ଟାରେ ଖେଳାଯିବାକୁ ସ୍ଥିର ହୋଇଥିଲା । 

ଏସିଆ କପ୍ ସେପ୍ଟେମ୍ବର ୯ ତାରିଖରୁ ଆରମ୍ଭ ହୋଇ ସେପ୍ଟେମ୍ବର ୨୮ ଯାଏଁ ଚାଲିବ । ଉଭୟ ଦୁବାଇ ଏବଂ ଆବୁ ଦାବୀରେ ଟୁର୍ଣ୍ଣାମେଣ୍ଟ ଚାଲିବ । ସେପ୍ଟେମ୍ବରରେ ସେଠାକାର ଦିନର ତାପମାତ୍ରା ୪୦ ଡିଗ୍ରୀ ପର‌୍ୟ୍ୟନ୍ତ ରହିବ । ବିଳମ୍ବିତ ସନ୍ଧ୍ୟା ପର୍ଯ୍ୟନ୍ତ ଏହିଭଳି ତାପମାତ୍ରା ରହିବ । ଅତ୍ୟଧିକ ଗରମରୁ ରକ୍ଷା କରିବା ପାଇଁ କ୍ରିକେଟ୍ ବୋର୍ଡ ସମୟରେ ପରିବର୍ତ୍ତନ କରିବାକୁ ନିଷ୍ପତ୍ତି ନେଇଛି । ପରିବର୍ତ୍ତିତ ସମୟ ଅନୁସାରେ ସମସ୍ତ ଦିବା-ରାତ୍ର ମ୍ୟାଚ୍ ଭାରତୀୟ ସମୟ ଅନୁସାରେ ରାତି ୮ଟାରେ ଖେଳାଯିବ । 

ମାତ୍ର ଗୋଟିଏ ମ୍ୟାଚ ଦିନରେ ଖେଳାଯିବ । ୟୁଏଇ ଏବଂ ଓମାନ ମଧ୍ୟରେ ହେବାକୁ ଥିବା ମ୍ୟାଚ ସମୟରେ ପରିବର୍ତ୍ତନ କରାଯାଇ ନାହିଁ । ଏହି ମ୍ୟାଚ୍ ସ୍ଥାନୀୟ ସମୟ ଅନୁସାରେ ଦିବା ୫ଟା ୩୦ରେ ଖେଳାଯିବ । ସେପ୍ଟେମ୍ବର ୧୫ ତାରିଖ ଆବୁ ଧାବିର ଜାୟେଦ କ୍ରିକେଟ୍ ଷ୍ଟାଡିୟମରେ ମ୍ୟାଚ୍ ଖେଳାଯିବ ।