ଓଭାଲ: ଭାରତୀୟ ଅଧିନାୟକ ଶୁଭମନ ଗିଲ ଇଂଲଣ୍ଡ ବିପକ୍ଷ ସିରିଜରେ ସମସ୍ତ ପାଞ୍ଚଟି ମ୍ୟାଚ୍ରେ ଟସ୍ ହାରିଛନ୍ତି। ପଞ୍ଚମ ଟେଷ୍ଟରେ ମଧ୍ୟ ଇଂଲଣ୍ଡ ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଛି। ଟେଷ୍ଟ କ୍ରିକେଟରେ ଏହା ପ୍ରଥମ ଥର ନୁହେଁ ଯେଉଁଠି କୌଣସି ଦଳ ପାଞ୍ଚ ମ୍ୟାଚ୍ ବିଶିଷ୍ଟ ସିରିଜରେ ସମସ୍ତ ଟସ୍ ହାରିଛି। ଏମିତି ମୋଟ୍ ୧୪ ଥର ଘଟି ସାରିଛି। ୨୧ଶ ଶତାବ୍ଦୀରେ  ପ୍ରଥମ ଥର ପାଇଁ ୨୦୧୮ରେ ଭାରତୀୟ ଦଳର ଇଂଲଣ୍ଡ ଗସ୍ତ ସମୟରେ ଘଟିଥିଲା। ସେତେବେଳେ ଇଂଲଣ୍ଡର ଅଧିନାୟକ ଥିବା ଜୋ ରୁଟ୍ ଭାରତ ବିପକ୍ଷରେ ସମସ୍ତ ଟସ୍ ଜିତିଥିଲେ।

୨୧ଶ ଶତାବ୍ଦୀରେ କେବଳ ଚାରି ଥର

୨୧ଶ ଶତାବ୍ଦୀରେ ଏହା କେବଳ ଚାରି ଥର ଘଟିଛି ଯେତେବେଳେ ଜଣେ ଅଧିନାୟକ ପାଞ୍ଚ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜରେ ସମସ୍ତ ଟସ୍ ହାରିଛନ୍ତି। ଏହି ଶତାବ୍ଦୀରେ ପ୍ରଥମ ଥର ପାଇଁ ବିରାଟ କୋହଲି ସହ ଏମିତି ଘଟିଥିଲା। କୋହଲି ୨୦୧୮ରେ ଟିମ୍ ଇଣ୍ଡିଆର ଇଂଲଣ୍ଡ ଗସ୍ତ ସମୟରେ ସମସ୍ତ ୫ଟି ମ୍ୟାଚରେ ଟସ୍ ହାରିଥିଲେ। ସେହି ସମୟରେ ଶୁଭମନ ଗିଲ୍ ୨୧ଶ ଶତାବ୍ଦୀରେ ଦ୍ୱିତୀୟ ଏପରି ଅଧିନାୟକ ହୋଇଛନ୍ତି। ୨୦୧୮ରେ କୋହଲିଙ୍କ ସମୟରେ ଇଂଲଣ୍ଡ ଭାରତ ବିପକ୍ଷରେ ଟେଷ୍ଟ ସିରିଜରେ ୪-୧ରେ ବିଜୟୀ ହୋଇଥିଲା। ବର୍ତ୍ତମାନର ସିରିଜରେ ଇଂଲଣ୍ଡ ୪ଟି ମ୍ୟାଚ୍ ପରେ ୨-୧ରେ ଆଗୁଆ ଅଛି।

ଭାରତର ଟସ୍ ହାରିବାର ଧାରା ଜାରି ରହିଛି

ପୁରୁଷ ଅନ୍ତର୍ଜାତୀୟ କ୍ରିକେଟରେ ଭାରତୀୟ ଦଳ ଲଗାତାର ୧୫ତମ ଥର ଟସ୍ ହାରିଛି। ଯାହାକି ଏକ ବିଶ୍ଵ ରେକର୍ଡ। ଟିମ୍ ଇଣ୍ଡିଆର ଟସ୍ ହାରିବା ଧାରା ଚଳିତ ବର୍ଷ ଜାନୁଆରୀ ୩୧ରୁ ଜାରି ରହିଛି। ପ୍ରଥମେ  ସୂର୍ଯ୍ୟକୁମାର ଯାଦବ ଇଂଲଣ୍ଡ ବିପକ୍ଷରେ ଚତୁର୍ଥ ଟି-୨୦ ମ୍ୟାଚରେ ଅଧିନାୟକ ଭାବରେ ଟସ୍ ହାରିଥିଲେ। ଏହା ପରେ ଭାରତୀୟ କ୍ରିକେଟ ଦଳ ଅନ୍ତର୍ଜାତୀୟ ମ୍ୟାଚରେ ଗୋଟିଏ ବି ଟସ୍ ଜିତିପାରିନାହିଁ। ଭାରତ ପୂର୍ବରୁ ସର୍ବାଧିକ ଟସ୍ ହାରିବାର ରେକର୍ଡ ୱେଷ୍ଟଇଣ୍ଡିଜ୍ ନାମରେ ଥିଲା, ଯାହା ୧୯୯୯ ମସିହାରେ ଲଗାତାର ୧୨ ଥର ଟସ୍ ହାରିବା ପରେ ବିଜୟୀ ହୋଇଥିଲା।