IPL 2026: ଆଇପିଏଲ୍ ୨୦୨୬ର ଦ୍ୱିତୀୟ କ୍ୱାଲିଫାୟର୍ ମ୍ୟାଚ୍‌ରେ ଗୁଜରାଟ ଟାଇଟନ୍ସ ଏକ ଦମଦାର ବିଜୟ ହାସଲ କରି ସିଧା ଫାଇନାଲ୍‌ ଟିକେଟ୍ କାଟିଛି। ଏହି ଗୁରୁତ୍ୱପୂର୍ଣ୍ଣ ମୁକାବିଲାରେ ଗୁଜରାଟ ୭ ୱିକେଟରେ ରାଜସ୍ଥାନ ରୟାଲ୍ସକୁ ପରାସ୍ତ କରି ଚଳିତ ସିଜନର ଦ୍ୱିତୀୟ ଫାଇନାଲିଷ୍ଟ ବନିଛି। ଅଧିନାୟକ ଶୁଭମନ ଗିଲ୍‌ଙ୍କ ବିସ୍ଫୋରକ ଶତକୀୟ ପାଳି ବଳରେ ଗୁଜରାଟ ଏହି ବଡ଼ ସ୍କୋରକୁ ଖୁବ୍ ସହଜରେ ହାସଲ କରିନେଇଥିଲା। ଏବେ ଆସନ୍ତା ୩୧ ମଇ ରବିବାର ଗୁଜରାଟ ଟାଇଟନ୍ସ ଏବଂ ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ (RCB) ମଧ୍ୟରେ ଖେଳାଯିବ ଚଳିତ ବର୍ଷର ଫାଇନାଲ୍ ମୁକାବିଲା।

ଏହି ହାଇ-ଭୋଲଟେଜ୍ ମ୍ୟାଚ୍‌ରେ ରାଜସ୍ଥାନ ରୟାଲ୍ସର ଅଧିନାୟକ ରିୟାନ ପରାଗ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ। ଗୁଜରାଟ ବିପକ୍ଷରେ ଏକ ବଡ଼ ସ୍କୋର ଛିଡ଼ା କରି ଚାପରେ ରଖିବା ରାଜସ୍ଥାନର ମୂଳ ଲକ୍ଷ୍ୟ ଥିଲା। କିନ୍ତୁ ଦଳର ଆରମ୍ଭ ବହୁତ ଖରାପ ରହିଥିଲା ଏବଂ ଷ୍ଟାର୍ ଓପନର ଯଶସ୍ୱୀ ଜସୱାଲ ମାତ୍ର ୧ ରନ୍ କରି ଆଉଟ୍ ହୋଇଯାଇଥିଲେ। ଏହାପରେ ମଧ୍ୟ ଦଳର ଅନ୍ୟ ବ୍ୟାଟରମାନେ ବଡ଼ ସ୍କୋର କରିବାରେ ବିଫଳ ହୋଇଥିଲେ। ଧ୍ରୁବ ଜୁରେଲ ୭ ରନ୍, ଅଧିନାୟକ ରିୟାନ ପରାଗ ୧୧ ରନ୍, ଦାସୁନ ଶନାକା ୩ ରନ୍ ଏବଂ ଜୋଫ୍ରା ଆର୍ଚ୍ଚର ମାତ୍ର ୭ ରନ୍ କରି ପାଭିଲିୟନ ଫେରିଥିଲେ।

ବୈଭବ ସୂର୍ଯ୍ୟବଂଶୀଙ୍କ ବିସ୍ଫୋରକ ବ୍ୟାଟିଂ ଏବଂ ରାଜସ୍ଥାନର ବଡ଼ ସ୍କୋର

ଗୋଟିଏ ପଟେ ୱିକେଟ ପଡ଼ୁଥିଲେ ମଧ୍ୟ ଅପରପକ୍ଷରେ ରାଜସ୍ଥାନର ୧୫ ବର୍ଷୀୟ ଯୁବ ଓପନର ବୈଭବ ସୂର୍ଯ୍ୟବଂଶୀ ପଡ଼ିଆରେ ରନ୍‌ର ବର୍ଷା କରି ଚାଲିଥିଲେ। ସେ ଗୁଜରାଟର ବୋଲରମାନଙ୍କୁ ନିର୍ଧୁମ ପ୍ରହାର କରି ମାତ୍ର ୪୭ ବଲ୍‌ରୁ ୮ଟି ଚୌକା ଓ ୭ଟି ବିରାଟ ଛକା ସହାୟତାରେ ୯୬ ରନ୍‌ର ଏକ ଅଦ୍ଭୁତପୂର୍ବ ପାଳି ଖେଳିଥିଲେ। ମାତ୍ର ୪ ରନ୍ ପାଇଁ ସେ ନିଜର ଶତକରୁ ବଞ୍ଚିତ ହୋଇଥିଲେ। ତାଙ୍କ ବ୍ୟତୀତ ଅଭିଜ୍ଞ ରବୀନ୍ଦ୍ର ଜାଡେଜା ୪୫ ରନ୍ କରିଥିବା ବେଳେ ଶେଷ ଓଭରଗୁଡ଼ିକରେ ଡେନୋଭନ ଫରେରା ମାତ୍ର ୧୧ ବଲ୍‌ରେ ୨ଟି ଚୌକା ଓ ୪ଟି ଛକା ମାରି ୩୮* ରନ୍‌ର ଧୂଆଁଧାର ପାଳି ଖେଳିଥିଲେ। ଏହି ସମସ୍ତ ପ୍ରଦର୍ଶନ ବଳରେ ରାଜସ୍ଥାନ ୨୦ ଓଭରରେ ୬ ୱିକେଟ ହରାଇ ୨୧୪ ରନ୍‌ର ଏକ ବିଶାଳ ସ୍କୋର ଛିଡ଼ା କରିଥିଲା।

୨୧୫ ରନ୍‌ର ପାହାଡ଼ ସଦୃଶ ଲକ୍ଷ୍ୟକୁ ପିଛା କରି ଗୁଜରାଟ ଟାଇଟନ୍ସ ପଡ଼ିଆକୁ ଓହ୍ଲାଇଥିଲା। ଦଳର ଦୁଇ ଓପନର ଅଧିନାୟକ ଶୁଭମନ ଗିଲ୍ ଏବଂ ସାଇ ସୁଦର୍ଶନ ଆରମ୍ଭରୁ ହିଁ ଆକ୍ରମଣାତ୍ମକ ବ୍ୟାଟିଂ କରିଥିଲେ। ଦୁହେଁ ମିଶି ରାଜସ୍ଥାନର ବୋଲିଂ ଆଟାକକୁ ସମ୍ପୂର୍ଣ୍ଣ ଭାବେ ଧ୍ୱସ୍ତ କରିଦେଇଥିଲେ। ଗିଲ୍ ଏବଂ ସୁଦର୍ଶନ ପ୍ରଥମ ୱିକେଟ ପାଇଁ ମାତ୍ର ୭୭ ବଲ୍‌ରେ ୧୬୭  ରନ୍‌ର ଏକ ବିରାଟ ଏବଂ ସ୍ମରଣୀୟ ସାଜେଦାରୀ କରି ଗୁଜରାଟର ବିଜୟ ପଥକୁ ଏକପ୍ରକାର ସହଜ କରିଦେଇଥିଲେ। ସାଇ ସୁଦର୍ଶନ ୩୨ ବଲ୍‌ରେ ୮ଟି ଚୌକା ଓ ୧ଟି ଛକା ସହ ୫୮ ରନ୍‌ର ଏକ ଚମତ୍କାର ପାଳି ଖେଳିଥିଲେ, କିନ୍ତୁ ଗତ ମ୍ୟାଚ୍ ଭଳି ଏହି ମ୍ୟାଚ୍‌ରେ ମଧ୍ୟ ସେ ଦୁର୍ଭାଗ୍ୟଜନକ ଭାବେ ଆଉଟ୍ ହୋଇଥିଲେ।

ଅଧିନାୟକ ଶୁଭମନ ଗିଲ୍‌ଙ୍କ ମାରାଥନ ଶତକ

ସାଇ ସୁଦର୍ଶନ ଆଉଟ୍ ହେବା ପରେ ମଧ୍ୟ ଅଧିନାୟକ ଶୁଭମନ ଗିଲ୍ ଗୋଟିଏ ପଟେ ନିଜର ଦମଦାର ବ୍ୟାଟିଂ ଜାରି ରଖିଥିଲେ। ସେ ପଡ଼ିଆର ଚାରିଆଡ଼କୁ ଚୌକା ଓ ଛକାର ବର୍ଷା କରି ମାତ୍ର ୫୩ ବଲ୍‌ରେ ୧୦୪ ରନ୍‌ର ଏକ ଅପରାଜେୟ ଶତକୀୟ ପାଳି ଖେଳିଥିଲେ। ଏହି ଆକର୍ଷଣୀୟ ପାଳିରେ ୧୫ଟି ଚୌକା ଏବଂ ୩ଟି ଚମତ୍କାର ଛକା ସାମିଲ ଥିଲା। ଗିଲ୍‌ଙ୍କ ଏହି ଦାୟିତ୍ୱବାନ ଏବଂ ବିସ୍ଫୋରକ ବ୍ୟାଟିଂ ଯୋଗୁଁ ରାଜସ୍ଥାନ ହାତରୁ ମ୍ୟାଚ୍ ସମ୍ପୂର୍ଣ୍ଣ ଭାବେ ଖସି ଯାଇଥିଲା।

ଗୁଜରାଟର ରୋମାଞ୍ଚକର ବିଜୟ ଏବଂ ଫାଇନାଲ ପ୍ରବେଶ

ଦଳର ଦୁଇ ମୁଖ୍ୟ ଓପନର ଆଉଟ୍ ହେବା ପରେ ଏବଂ ମଝିରେ ୱାଶିଂଟନ ସୁନ୍ଦର ୧୬ ରନ୍ କରି ଆଉଟ୍ ହେବା ପରେ ମ୍ୟାଚ୍ ସାମାନ୍ୟ ରୋମାଞ୍ଚକର ମୋଡ଼କୁ ଆସିଥିଲା। କିନ୍ତୁ କ୍ରିଜ୍‌ରେ ଥିବା ଅଭିଜ୍ଞ ଜୋସ୍ ବଟଲର ଏବଂ ଫିନିସର୍ ରାହୁଲ ତେୱାତିଆ କୌଣସି ଅଘଟଣ ଘଟିବାକୁ ଦେଇନଥିଲେ। ତେୱାତିଆ ୧୭* ରନ୍ ଏବଂ ବଟଲର ୯* ରନ୍ କରି ଧୈର୍ଯ୍ୟର ସହ ଖେଳ ଶେଷ କରିଥିଲେ। ଗୁଜରାଟ ଟାଇଟନ୍ସ ୧୮.୪ ଓଭରରେ ମାତ୍ର ୩ଟି ଉଇକେଟ୍ ହରାଇ ୨୧୯ ରନ୍ କରିନେଇଥିଲା ଏବଂ ୭ ଉଇକେଟ୍‌ରେ ମ୍ୟାଚ୍ ଜିତି ସଗର୍ବେ ଫାଇନାଲ୍‌ରେ ପ୍ରବେଶ କରିଥିଲା। ଏହି ହାର ସହ ରାଜସ୍ଥାନର ଆଇପିଏଲ୍ ୨୦୨୬ ଯାତ୍ରା ସମାପ୍ତ ହୋଇଛି ଏବଂ ଆସନ୍ତା ରବିବାର (୩୧ ମଇ) ଦିନ ଗୁଜରାଟ ଓ ବେଙ୍ଗାଲୁରୁ (RCB) ମଧ୍ୟରେ ଟ୍ରଫି ପାଇଁ ମହାଲଢ଼େଇ ହେବ।