ନୂଆଦିଲ୍ଲୀ: ଆଇପିଏଲ୍ ୨୦୨୫ରେ ଆଜି ଦୁଇଟି ବଡ ମ୍ୟାଚ୍ ଖେଳାଯିବ । ପ୍ରଥମ ମ୍ୟାଚ୍ ଗୁଜରାଟ ଟାଇଟନ୍ସ ଓ ଦିଲ୍ଲୀ କ୍ୟାପିଟାଲ୍ସ ମଧ୍ୟରେ ଖେଳାଯିବ । ଏହି ମୁକାବିଲା ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଖେଳାଯିବ । ଏହା ପରେ ଦ୍ୱିତୀୟ ମ୍ୟାଚ୍ ରାଜସ୍ଥାନ ରୟାଲ୍ସ ଓ ଲଖନଉ ସୁପର ଜାଏଣ୍ଟଓ ମଧ୍ୟରେ ରହିଛି ।

ଗୁଜରାଟ ଓ ଦିଲ୍ଲୀର ମ୍ୟାଚ୍ ଆଜି ଅପରାହ୍ନ ୩ଟା ୩୦ରେ ଖେଳାଯିବ । ବର୍ତ୍ତମାନ ଅକ୍ଷର ପଟେଲଙ୍କ ଦିଲ୍ଲୀ କ୍ୟାପିଟାଲ୍ସ ପଏଣ୍ଟ ଟେବୁଲର ଶୀର୍ଷରେ ରହିଛି । ଦିଲ୍ଲୀ ଏ ପର୍ଯ୍ୟନ୍ତ ୬ଟି ଖେଳି ୫ଟି ଜିତିଛି । ଅନ୍ୟପଟେ ଶୁଭମନ ଗିଲଙ୍କ ଗୁଜରାଟ ଟାଇଟନ୍ସ ମଧ୍ୟରେ ପଛରେ ନାହିଁ । ଗୁଜରାଟ ଅଙ୍କ ତାଲିକାରେ ତୃତୀୟ ସ୍ଥାନରେ ରହିଛି । ଗୁଜରାଟ ଛଅଟି ମ୍ୟାଚ୍ ଖେଳି ଚାରୋଟି ଜିତିଛି ।

ଗୁଜରାଟ ଓ ଦିଲ୍ଲୀ ହେଡ ଟୁ ହେଡରେ ଅକ୍ଷର ପଟେଲଙ୍କ ଟିମ୍ ଆଗରେ ରହିଛି । ଦୁଇ ଦଳ ମଧ୍ୟରେ ଏ ପର୍ଯ୍ୟନ୍ତ ଆଇପିଏଲରେ ୫ଟି ମ୍ୟାଚ୍ ଖେଳା ଯାଇଛି । ଏଥିରୁ ଗୁଜରାଟ ୨ ଓ ଦିଲ୍ଲୀ ୩ଟି ମ୍ୟାଚ୍ ଜିତିଛି । 

ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମ ବ୍ୟାଟରଙ୍କୁ ବେଶ ସୁହାଇଥାଏ । କିନ୍ତୁ ଚଳିତ ସିଜିନରେ ଗୋଟିଏ ମ୍ୟାଚରେ କମ ରନ ଦେଖିବାକୁ ମିଳିଥିଲା । ତେଣୁ ଆଜି କେଉଁ ପିଚରେ ମ୍ୟାଚ୍ ଖେଳା ଯିବା ତାହା ଉପରେ ନିର୍ଭର କରେ ସ୍କୋର କେତେ ହେବ । ଲାଲ ମାଟିର ପିଚରେ ସହଜରେ ୨୦୦ ରନ ହୋଇ ପାରିବ । ଏହାକୁ ପିଛା କରିବା ମଧ୍ୟ ଏହି ଷ୍ଟାଡିୟମରେ ସହଜ । ତେଣୁ ଟସ୍ ଜିତିବା ଦଳ ପ୍ରଥମେ ବୋଲିଂ କରିବାକୁ ପସନ୍ଦ କରିବେ । 

ଆଜିର ମ୍ୟାଚରେ କେଉଁ ଦଳ ଜିତିବ ତାହା କହିବା ମୁସ୍କିଲ । କାରଣ ଉଭୟ ଦଳର ପ୍ରଦର୍ଶନ ବେଶ ଦମଦାର ରହିଛି । ସବୁ ବିଭାଗରେ ଦୁଇ ଦଳ ସନ୍ତୁଳିତ ରହିଛି । ତେଣୁ ମ୍ୟାଚ୍ ରୋମାଞ୍ଚକର ହୋଇପାରେ ।