ନୂଆଦିଲ୍ଲୀ: ପୂର୍ବତନ କ୍ରିକେଟର୍ ତଥା ପୂର୍ବତନ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ପାଇଁ ଏବେ ବିଶ୍ୱର ଦିଗ୍ଗଜ କ୍ରିକେଟର୍ ମାନେ ଏକାଠି ହୋଇଛନ୍ତି । ଭାରତୀୟ ପୂର୍ବତନ କ୍ରିକେଟର୍ କପିଲ ଦେବ ଏବଂ ସୁନୀଲ ଗାଭାସ୍କରଙ୍କ ସମେତ ବିଶ୍ୱର ୧୪ ଜଣ ପୂର୍ବତନ ଅଧିନାୟକ ଇମ୍ରାନ ଖାନଙ୍କ ସମର୍ଥନରେ ବାହାରିଛନ୍ତି। ଜେଲରେ ଥିବା ଇମ୍ରାନଙ୍କୁ ଉତ୍ତମ ଚିକିତ୍ସା ସୁବିଧା ଯୋଗାଇ ଦେବାକୁ ପାକିସ୍ତାନ ସରକାରଙ୍କୁ ଅନୁରୋଧ କରିଛନ୍ତି । 

ଇମ୍ରାନଙ୍କ ସ୍ୱାସ୍ଥ୍ୟ ଅବସ୍ଥାକୁ ନେଇ ଗମ୍ଭୀର ରିପୋର୍ଟ ପ୍ରକାଶ ପାଇବା ପରେ ସାରା ବିଶ୍ୱର ପୂର୍ବତନ କ୍ରିକେଟର୍ ମାନେ ଚିନ୍ତା ପ୍ରକଟ କରିଛନ୍ତି । ତାଙ୍କୁ ଆବଶ୍ୟକୀୟ ଚିକିତ୍ସା ସୁବିଧା ଯୋଗାଇ ଦେବାକୁ ଏକ ୧୪ ଜଣିଆ ପୂର୍ବତନ କ୍ରିକେଟ୍ ଅଧିନାୟକ ପ୍ରତିନିଧି ମଣ୍ଡଳୀ ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫଙ୍କୁ ଚିଠି ଲେଖିଛନ୍ତି । ୧୭ ଫେବୃଆରୀ, ୨୦୨୬ରେ, ୧୪ ଜଣ ପୂର୍ବତନ ଅନ୍ତର୍ଜାତୀୟ କ୍ରିକେଟ ଅଧିନାୟକ ପାକିସ୍ତାନ ସରକାରଙ୍କୁ ଏକ ଚିଠି ଲେଖିଛନ୍ତି । ଜେଲରେ ବ୍ୟକ୍ତିଗତ ଡାକ୍ତରଙ୍କ ଦ୍ୱାରା ଇମ୍ରାନ ଖାନଙ୍କ ତୁରନ୍ତ ଚିକିତ୍ସା, ତାଙ୍କ ପରିବାରକୁ ନିୟମିତ ଭେଟିବା ଏବଂ ବିଳମ୍ବ ନକରି ଏକ ନିରପେକ୍ଷ ଏବଂ ସ୍ୱଚ୍ଛ ଆଇନଗତ ପ୍ରକ୍ରିୟା ପାଇବାର ଅଧିକାର ଦେବାକୁ ଚିଠିରେ ଦାବି କରିଛନ୍ତି । ଯେଉଁଥିରେ ଭାରତରୁ ସୁନୀଲ ଗାଭାସ୍କର ଏବଂ କପିଲ ଦେବ, ଅଷ୍ଟ୍ରେଲିଆରୁ ଗ୍ରେଗ୍ ଚାପେଲ, ଇଆନ୍ ଚାପେଲ, ଆଲାନ୍ ବର୍ଡର, ଷ୍ଟିଭ୍ ୱା, କିମ୍ ହ୍ୟୁଗ୍ସ ଏବଂ ବେଲିଣ୍ଡା କ୍ଲାର୍କ, ଇଂଲଣ୍ଡରୁ ମାଇକେଲ୍ ଆଥରଟନ୍, ନାସେର ହୁସେନ୍, ମାଇକେଲ୍ ବ୍ରେଆର୍ଲି ଏବଂ ଡେଭିଡ୍ ଗାୱର୍, ୱେଷ୍ଟଇଣ୍ଡିଜର କ୍ଲାଇଭ୍ ଲଏଡ୍ ଏବଂ ନ୍ୟୁଜିଲାଣ୍ଡର ଜନ୍ ରାଇଟ୍ ଚିଠିରେ ସ୍ୱାକ୍ଷର କରିଛନ୍ତି । 

କିନ୍ତୁ ଆଶ୍ଚର୍ଯ୍ୟକର କଥା କୌଣସି ପୂର୍ବତନ ପାକିସ୍ତାନୀ ଅଧିନାୟକ ଚିଠିରେ ସ୍ୱାକ୍ଷର କରିନାହାଁନ୍ତି । ତଥାପି, ଗତ ସପ୍ତାହରେ, ୱାସିମ୍ ଆକ୍ରମ, ୱାକାର ୟୁନିସ୍ ଏବଂ ଶାହିଦ୍ ଆଫ୍ରିଦିଙ୍କ ସମେତ ଅନେକ ପୂର୍ବତନ ପାକିସ୍ତାନୀ କ୍ରିକେଟର ସୋସିଆଲ ମିଡିଆରେ ଇମ୍ରାନ ଖାନଙ୍କ ଉତ୍ତମ ଯତ୍ନ ଦାବି କରିଥିଲେ।

ନିକଟରେ ଇମ୍ରାନ ଖାନଙ୍କ ସ୍ୱାସ୍ଥ୍ୟାବସ୍ଥା ସମ୍ପର୍କରେ ଗମ୍ଭୀର ରିପୋର୍ଟ ପ୍ରକାଶ ପାଇଥିଲା । ତାଙ୍କ ଡାହାଣ ଆଖିରେ ୮୫ ପ୍ରତିଶତ ଦୃଷ୍ଟିଶକ୍ତି ହ୍ରାସ ପାଇଛି। ପାକିସ୍ତାନ ସୁପ୍ରିମକୋର୍ଟଙ୍କ ନିର୍ଦ୍ଦେଶରେ ହୋଇଥିବା ତଦନ୍ତରେ ଏହା ପ୍ରକାଶ ପାଇଛି । ତାଙ୍କ ପୁଅ ସୁଲେମାନ ଡିସେମ୍ବର ୨୦୨୫  ରେ ରିପୋର୍ଟ କରିଥିଲେ ଯେ ତାଙ୍କ ପିତାଙ୍କୁ "ମରଣ କୋଠରୀ" ନାମରେ ଜଣାଶୁଣା ଏକ ଛୋଟ କୋଠରୀରେ ରଖାଯାଇଛି। ତାଙ୍କ ଓକିଲ ତାଙ୍କୁ ଭେଟିବା ପରେ କହିଥିଲେ ଯେ ସେ ଅତ୍ୟନ୍ତ ମାନସିକ ଚାପରେ ରହିଛନ୍ତି । ଓକିଲ କହିଥିଲେ ଯେ ଇମ୍ରାନଙ୍କୁ ବ୍ୟକ୍ତିଗତ ଡାକ୍ତରଙ୍କଠାରୁ ଚିକିତ୍ସା କରିବାକୁ ଅନୁମତି ଦିଆଯାଇ ନଥିଲା ଏବଂ ପ୍ରତିଦିନ ରକ୍ତ ପରୀକ୍ଷା କରାଯାଉନଥିଲା । ବାରମ୍ବାର ଅନୁରୋଧ ସତ୍ତ୍ୱେ ତାଙ୍କୁ ଦୁଇ ବର୍ଷ ପର୍ଯ୍ୟନ୍ତ ଦନ୍ତ ଚିକିତ୍ସକଙ୍କ ପାଖକୁ ମଧ୍ୟ ନିଆଯାଇ ନଥିଲା।