ନୂଆଦିଲ୍ଲୀ: ସୁପ୍ରିମକୋର୍ଟରେ ଏକ ଛାଡ଼ପତ୍ର ମାମଲାର ଶୁଣାଣୀ ବେଳେ ମହିଳାଙ୍କ ଉପରେ କଠୋର ଆଭିମୁଖ୍ୟ ଗ୍ରହଣ କରି କୋର୍ଟ କହିଛନ୍ତି, ଉଚ୍ଚଶିକ୍ଷିତା ମହିଳା ମାନେ ସ୍ୱାମୀଙ୍କୁ ଭରଣପୋଷଣ ମାଗିବା ଅପେକ୍ଷା ନିଜେ ଟଙ୍କା ରୋଜଗାର କରି ଚଳିବା ଉଚିତ୍ । 

ଏକ ମାମଲାରେ ମହିଳା ଜଣକ ବିବାହର ୧୮ ମାସ ପରେ ସ୍ୱାମୀଙ୍କ ଠାରୁ ଛାଡପତ୍ର ନେଇଥିଲେ । ଏଥିସହ ସେ ଭରଣପୋଷଣ ବାବଦରେ ୧୨ କୋଟି ଟଙ୍କା ସହ ଏକ  BMW କାର୍ ଏବଂ ମୁମ୍ବାଇରେ ଏକ ଘର ଦାବି କରିଥିଲେ । ଏହି ମାମଲାରେ ମୁଖ୍ୟ ବିଚାରପତି ଗଭାଇ ମହିଳାଙ୍କୁ କହିଥିଲେ, ‘ଆପଣ ଆଇଟି ସହ ଏମବିଏ କରିଛନ୍ତି ।ବାଙ୍ଗାଲୋର ଏବଂ ହାଇଦ୍ରାବାଦ ଭଳି ସହରରେ ଆଇଟି ବ୍ୟକ୍ତିଙ୍କ ପାଇଁ ବହୁତ ଚାହିଦା ଅଛି, ତେବେ ଆପଣ ସେଠାରେ କାମ କରି ଟଙ୍କା ରୋଜଗାର କରିପାରିବେ ।

ଏହା ଉପରେ ମହିଳା ଜଣକ କହିଥିଲେ, 'କିନ୍ତୁ ମୋ ସ୍ୱାମୀ ଜଣେ ଧନୀ ବ୍ୟକ୍ତି ଏବଂ ବିବାହ ଭାଙ୍ଗିବା ପାଇଁ ସେ ମୋତେ ସ୍କିଜୋଫ୍ରେନିଆରେ ପୀଡିତ ବୋଲି ଘୋଷଣା କରିଛନ୍ତି। ସିଜେଆଇ ଗଭାଇ ମହିଳାଙ୍କୁ କହିଥିଲେ ଯେ କିନ୍ତୁ ତୁମେ ତୁମ ସ୍ୱାମୀଙ୍କ ବାପାଙ୍କ ସମ୍ପତ୍ତି ଦାବି କରିପାରିବ ନାହିଁ। ସିଜେଆଇ ଗଭାଇ ମହିଳାଙ୍କୁ ସ୍ପଷ୍ଟ ଭାବରେ କହିଥିଲେ ଯେ ଘର ନେଇ ସନ୍ତୁଷ୍ଟ ହୁଅ ନଚେତ୍ ୪ କୋଟି ଟଙ୍କା ନେଇ ଚାକିରି ଖୋଜ। ସିଜେଆଇ ଗଭାଇ ଏହି ମାମଲାରେ ଏକ ଗୁରୁତ୍ୱପୂର୍ଣ୍ଣ ମନ୍ତବ୍ୟ ଦେଇ କହିଥିଲେ, 'ତୁମେ ଏତେ ଶିକ୍ଷିତ। ତୁମେ ନିଜ ପାଇଁ କିଛି ମାଗିବା ଉଚିତ୍ ନୁହେଁ, ବରଂ ନିଜେ ରୋଜଗାର କରିବା ଉଚିତ୍‌।' 

ସୁପ୍ରିମକୋର୍ଟଙ୍କ ନିର୍ଦ୍ଦେଶରେ ମହିଳା ଜଣକ କହିଥିଲେ ଯେ ତାଙ୍କ ସ୍ୱାମୀ ତାଙ୍କ ବିରୋଧରେ ଅନେକ ଅଭିଯୋଗ ଆଣିଛନ୍ତି ଏବଂ ତାଙ୍କ ବିରୋଧରେ ଏଫଆଇଆର ମଧ୍ୟ ଦାୟର କରାଯାଇଛି। ଏପରି ପରିସ୍ଥିତିରେ ମୁଁ କେଉଁ ଚାକିରି ପାଇବି। ସିଜେଆଇ ବିଆର ଗଭାଇ ସେତେବେଳେ କହିଥିଲେ ଯେ ଆମେ ସମସ୍ତ ଅଭିଯୋଗକୁ ଖାରଜ କରୁଛୁ।