ହିମାଚଳ ପ୍ରଦେଶର ମଣ୍ଡି ଜିଲ୍ଲାରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏଠାରେ ହିମାଚଳ ସଡ଼କ ପରିବହନ ନିଗମ  (HRTC) ର ଏକ ବସ୍ ନିୟନ୍ତ୍ରଣ ହରାଇ ଖାଇକୁ ଖସି ପଡ଼ିଛି। ଏହି ଦୁର୍ଘଟଣାରେ ୮ ଜଣ ଯାତ୍ରୀ ପ୍ରାଣ ହରାଇଛନ୍ତି ଓ ୨୦ ଜଣ ଆହତ ହୋଇଛନ୍ତି। ଆହତମାନଙ୍କୁ ୧୦୮ ଆମ୍ବୁଲାନ୍ସ ଏବଂ ସ୍ଥାନୀୟ ଲୋକମାନେ ସେମାନଙ୍କ ବ୍ୟକ୍ତିଗତ ଯାନରେ ସରକାଘାଟ ହସ୍ପିଟାଲକୁ ନିଆଯାଇଥିଲା। ଏଠାରୁ ୧୮ ଜଣଙ୍କୁ ନେରଚୌକ୍ ମେଡିକାଲ କଲେଜ ଏବଂ ଏମ୍ସ ବିଳାସପୁରକୁ ରେଫର କରାଯାଇଥିଲା। ଆହତଙ୍କ ମଧ୍ୟରୁ ଅନେକଙ୍କ ଅବସ୍ଥା ଗୁରୁତର ବୋଲି କୁହାଯାଉଛି।

ମଣ୍ଡି ଜିଲ୍ଲାରୁ ୬୦ କିଲୋମିଟର ଦୂର ସରକାଘାଟ ସବ-ଡିଭିଜନର ମସେରନ୍ ନିକଟ ତରଙ୍ଗାଲାରେ ଏହି ସଡ଼କ ଦୁର୍ଘଟଣା ଘଟିଥିଲା। ଦୁର୍ଘଟଣା ପରେ ଘଟଣାସ୍ଥଳରେ ସ୍ଥାନୀୟ ଲୋକମାନେ ଆହତମାନଙ୍କୁ ବସ୍ ରୁ ବାହାର କରି ଡାକ୍ତରଖାନା ନେବାରେ ସାହାଯ୍ୟ କରିଥିଲେ। ସେହି ସମୟରେ, ସରକାଘାଟ ପୋଲିସ ଷ୍ଟେସନ୍ ଏବଂ ଡିଏସ୍ପିଙ୍କ ଦଳ ମଧ୍ୟ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ଡାକ୍ତରଖାନା ନେଇଥିଲେ।

ଦୁର୍ଘଟଣା ପରେ ଉପମୁଖ୍ୟମନ୍ତ୍ରୀ ଏବଂ ପରିବହନ ମନ୍ତ୍ରୀ ମୁକେଶ ଅଗ୍ନିହୋତ୍ରୀ ମଧ୍ୟ ଦୁର୍ଘଟଣାସ୍ଥଳରେ ପହଞ୍ଚିଥିଲେ। ଉପମୁଖ୍ୟମନ୍ତ୍ରୀ ଆହତମାନଙ୍କ ଅବସ୍ଥା ପଚାରି ବୁଝିଥିଲେ ଏବଂ ଅଧିକାରୀଙ୍କଠାରୁ ଦୁର୍ଘଟଣାର କାରଣ ମଧ୍ୟ ପଚାରି ବୁଝିଥିଲେ। ପ୍ରଶାସନ ମୃତକଙ୍କ ପରିବାରବର୍ଗଙ୍କୁ ତୁରନ୍ତ ୨୫୦୦୦ ଟଙ୍କା ସହାୟତା ପ୍ରଦାନ କରିଛି। ବସ୍ ଡ୍ରାଇଭରଙ୍କ ବିରୋଧରେ ମାମଲା ରୁଜୁ କରାଯାଇଛି। ସରକାର ଦୁର୍ଘଟଣାର ନ୍ୟାୟିକ ତଦନ୍ତ ନିର୍ଦ୍ଦେଶ ଦେଇଛନ୍ତି।