ନୂଆଦିଲ୍ଲୀ: ଦିଲ୍ଲୀ ଜନ୍ତରମନ୍ତରରେ ଆନ୍ଦୋଳନରତ ଛାତ୍ରଙ୍କ ଉପରେ ହୋଇଥିବା କାର୍ଯ୍ୟାନୁଷ୍ଠାନ ମାମଲାର ତଦନ୍ତ ପାଇଁ ସର୍ବୋଚ୍ଚ ଅଦାଲତ ନୂତନ ଯାଞ୍ଚ କମିଟି ଗଠନ କରିଛନ୍ତି । ଜଣେ ଅବସରପ୍ରାପ୍ତ ସୁପ୍ରିମକୋର୍ଟ ବିଚାରପତିଙ୍କ ଅଧ୍ୟକ୍ଷତାରେ ଏକ ପାଞ୍ଚ ଜଣିଆ ଉଚ୍ଚ-କ୍ଷମତାପ୍ରାପ୍ତ ତଦନ୍ତ କମିଟି (HPEC) ଗଠନ ହୋଇଛି । ଯଥାଶୀଘ୍ର ତଦନ୍ତ କରି ପରବର୍ତ୍ତୀ ଶୁଣାଣି ପୂର୍ବରୁ ଅନ୍ତରୀଣ ତଦନ୍ତ ରିପୋର୍ଟ ଦାଖଲ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି । 

କମିଟିରେ ପୂର୍ବତନ ସୁପ୍ରିମକୋର୍ଟ ବିଚାରପତି ଆର. ସୁଭାଷ ରେଡ୍ଡୀ ଅଧ୍ୟକ୍ଷତା କରିବେ । ଅନ୍ୟ ସଦସ୍ୟଙ୍କ ମଧ୍ୟରେ ଅଛନ୍ତି ପଞ୍ଜାବ ଏବଂ ହରିୟାଣା ହାଇକୋର୍ଟର ପୂର୍ବତନ ମୁଖ୍ୟ ବିଚାରପତି ରବି ଶଙ୍କର ଝା, ଦିଲ୍ଲୀ ହାଇକୋର୍ଟର ପୂର୍ବତନ ବିଚାରପତି ଶଲିନ୍ଦର କୌର, ପୂର୍ବତନ ସିବିଆଇ ନିର୍ଦ୍ଦେଶକ ଋଷି କୁମାର ଶୁକ୍ଳା ଏବଂ ଜଣେ ଅବସରପ୍ରାପ୍ତ ଆଇପିଏସ୍ ତଥା ପୂର୍ବତନ ମେଘାଳୟ ଆରକ୍ଷୀ ମହାନିର୍ଦ୍ଦେଶକ ଡକ୍ଟର ଏଲ.ଆର. ବିଷ୍ଣୋଇ । ଏହି କମିଟି ଗତ ୨୦ ଜୁଲାଇରେ ଛାତ୍ର ଆନ୍ଦୋଳନବେଳେ ସୁରକ୍ଷାକର୍ମୀଙ୍କ ପକ୍ଷରୁ ହୋଇଥିବା କାର୍ଯ୍ୟାନୁଷ୍ଠାନ ଅଭିଯୋଗର ଯାଞ୍ଚ କରିବେ । କମିଟି ପେଲେଟ୍ ଗନ୍, ବୈଦ୍ୟୁତିକ ବାଡ଼ି, ଲାଠିଚାର୍ଜ ଏବଂ ଲୁହବୁହା ଗ୍ୟାସର ମାତ୍ରାଧିକ ବ୍ୟବହାର, ମହିଳା ବିକ୍ଷୋଭକାରୀଙ୍କ ବିରୁଦ୍ଧରେ ହିଂସା, ଭିଡ଼ ନିୟନ୍ତ୍ରଣର ପ୍ରକ୍ରିୟା , ପୀଡିତଙ୍କ ପାଇଁ ଚିକିତ୍ସା ସହାୟତା ଏବଂ କ୍ଷତିପୂରଣ ସମ୍ପର୍କିତ ପ୍ରସଙ୍ଗ ସମେତ ଅନେକ ଅଭିଯୋଗର ତଦନ୍ତ କରିବ ।

ସେହିପରି ପୋଲିସ ପକ୍ଷରୁ ହୋଇଥିବା ଅଭିଯୋଗର ମଧ୍ୟ କମିଟି ଯାଞ୍ଚ କରିବ । ପୋଲିସ ଉପରକୁ ପଥର ମାଡ଼, ସାର୍ବଜନୀନ ସମ୍ପତ୍ତିକୁ କ୍ଷତି ପହଁଚାଇବା ଭଳି ଅଭିଯୋଗର ଯାଞ୍ଚ କରି ସୁପ୍ରିମକୋର୍ଟକୁ ରିପୋର୍ଟ ପ୍ରଦାନ କରିବେ । 

ଆଜି ମୁଖ୍ୟ ବିଚାରପତି ସୂର୍ଯ୍ୟକାନ୍ତ, ବିଚାରପତି ଜୟମାଲ୍ୟ ବାଗଚୀ ଏବଂ ବିଚାରପତି ଭି. ମୋହନାଙ୍କ ଦ୍ୱାରା ଗଠିତ ଖଣ୍ଡପୀଠ ଛାତ୍ର ପ୍ରତିବାଦ ସମୟରେ ଘଟିଥିବା ହିଂସା ସମ୍ପର୍କିତ ଅନେକ ରିଟ୍ ଆବେଦନର ଶୁଣାଣି କରିଛନ୍ତି। ଖଣ୍ଡପୀଠ ଉଭୟ ପକ୍ଷରୁ ହୋଇଥିବା ଅଭିଯୋଗର ଗୁରୁତ୍ୱକୁ ଦୃଷ୍ଟିରେ ରଖି ଏହି ଉଚ୍ଚ ସ୍ତରୀୟ କମିଟି ଗଠନ କରିବାକୁ ନିର୍ଦ୍ଦେଶ ଦେଇଛନ୍ତି । 

ଏହି କମିଟି ଫୋରେନସିକ୍, ବୈଷୟିକ ଏବଂ ଅନ୍ୟାନ୍ୟ କ୍ଷେତ୍ର ବିଶେଷଜ୍ଞଙ୍କଠାରୁ ସହାୟତା ନେଇପାରିବେ । ଉଭୟ ପକ୍ଷ ଅଭିଯୋଗକାରୀ ଏବଂ ସାକ୍ଷୀଙ୍କ ପରିଚୟକୁ ସୁରକ୍ଷା ଦେବା ପାଇଁ ଆବଶ୍ୟକ ସ୍ଥଳେ ଗୁପ୍ତ ଭାବରେ କମିଟି ନିକଟରେ ଦସ୍ତାବିଜ ଆକାରରେ ପ୍ରମାଣ, ସାମଗ୍ରୀ ଏବଂ ପରାମର୍ଶ ଦାଖଲ କରିପାରିବେ । କୋର୍ଟ ପୋଲିସ, ଅର୍ଦ୍ଧସାମରିକ ବାହିନୀ ଏବଂ ତଦନ୍ତକାରୀ ସଂସ୍ଥାଗୁଡ଼ିକୁ ଛାତ୍ର ପ୍ରତିବାଦ ସହିତ ଜଡିତ ସିସି ଟିଭି ଏବଂ ଡ୍ରୋନ୍ ଫୁଟେଜ୍, ବଡି କ୍ୟାମେରା ରେକର୍ଡିଂ, ଭିଡିଓଗ୍ରାଫି, ତାରହୀନ ଯୋଗାଯୋଗ ରେକର୍ଡ ଏବଂ ପିସିଆର୍ କଲ୍ ଲଗ୍ ସଂରକ୍ଷଣ କରିବାକୁ ପୁନର୍ବାର ନିର୍ଦ୍ଦେଶ ଦେଇଛନ୍ତି । ସମସ୍ତ ରେକର୍ଡଗୁଡ଼ିକୁ ଉଚ୍ଚସ୍ତରୀୟ କମିଟିକୁ ପ୍ରଦାନ କରିବାକୁ ପଡ଼ିବ । ସମ୍ପୃକ୍ତ କର୍ତ୍ତୃପକ୍ଷମାନେ ତଦନ୍ତରେ ପୂର୍ଣ୍ଣ ସହଯୋଗ କରିବାକୁ ସୁପ୍ରିମକୋର୍ଟ କଡ଼ା ନିର୍ଦ୍ଦେଶ ଦେଇଛନ୍ତି । ଆସନ୍ତା ସେପ୍ଟେମ୍ବର ୧୦ ତାରିଖରେ ମାମଲାର ପରବର୍ତ୍ତୀ ଶୁଣାଣି କରିବାକୁ କୋର୍ଟ ଧାର୍ଯ୍ୟ କରିଛନ୍ତି ।