ପ୍ରତୀକ ଯାଦବଙ୍କ ଆକସ୍ମିକ ମୃତ୍ୟୁ କେବଳ ଯାଦବ ପରିବାରକୁ ନୁହେଁ, ବରଂ ସେହି ସମସ୍ତ ଶୁଭେଚ୍ଛୁମାନଙ୍କୁ ମଧ୍ୟ ସ୍ତବ୍ଧ କରିଦେଇଛି, ଯେଉଁମାନେ ତାଙ୍କୁ ଜଣେ ଫିଟନେସ୍ ଆଇକନ୍ ଏବଂ ବ୍ୟବସାୟୀ ଭାବରେ ଦେଖୁଥିଲେ । ତାଙ୍କ ମୃତ୍ୟୁ ସହିତ ଜଡ଼ିତ ଅନେକ ଖବର ଆପଣଙ୍କ ପାଖରେ ପହଞ୍ଚି ସାରିଥିବ, କିନ୍ତୁ ଆଜି ଏହି ଦୁଃଖଦ ସମୟରେ ଆମେ ଆପଣଙ୍କୁ ପ୍ରତୀକଙ୍କ ଜୀବନର ସେହି ଅକୁହା କାହାଣୀ କହିବାକୁ ଯାଉଛୁ, ଯାହା ଭାରତୀୟ ରାଜନୀତିର ସବୁଠାରୁ ବଡ଼ ରହସ୍ୟ ମଧ୍ୟରୁ ଗୋଟିଏ ଥିଲା । ୨୦୦୭ ମସିହା ପୂର୍ବରୁ, ଦୁନିଆ ପାଇଁ ମୁଲାୟମ ସିଂହ ଯାଦବଙ୍କ ଅର୍ଥ ଥିଲା କେବଳ ଅଖିଳେଶ ଯାଦବ । ସୈଫଇର ଏହି ବଂଶରେ ଯେ ଆଉ ଏକ ପ୍ରଦୀପ ଅଛନ୍ତି, ଯାହାଙ୍କୁ ରାଜନୀତିଠାରୁ  ଦୂରେଇ ରଖାଯାଇଛି, ସେ ସମ୍ପର୍କରେ କାହାକୁ ଖବର ନଥିଲା । କିନ୍ତୁ ଏକ ଅଦାଲତି ସତ୍ୟପାଠ ସେହି ସତ୍ୟକୁ ସାର୍ବଜନୀନ କରିଥିଲା, ଯାହାକୁ ଦଶନ୍ଧି ଧରି ଲୁଚାଇ ରଖାଯାଇଥିଲା । ଏହା ଏମିତି ଜଣେ ପୁଅର କାହାଣୀ, ଯିଏ ନିଜ ପରିଚୟ ପାଇଁ ଏକ ଦୀର୍ଘ ଓ ନିରବ ଲଢ଼େଇ ଲଢ଼ିଥିଲେ ଏବଂ ଶେଷରେ ସୁପ୍ରିମକୋର୍ଟଙ୍କ ଏକ କାଗଜ ତାଙ୍କୁ ସେହି ନାମ ଦେଇଥିଲା, ଯାହା ପରେ ସେ ରାତାରାତି ଉତ୍ତର ପ୍ରଦେଶର ସବୁଠାରୁ ଚର୍ଚ୍ଚିତ ଚେହେରା ପାଲଟିଗଲେ ।

ବର୍ଷ ୨୦୦୭, ସତ୍ୟପାଠ ଏବଂ  ସ୍ୱୀକାରୋକ୍ତି

୨୦୦୭ ମସିହାରେ, ଯେତେବେଳେ ଉତ୍ତର ପ୍ରଦେଶର ରାଜନୀତି ଚରମ ସୀମାରେ ଥିଲା । ସେହି ସମୟରେ ଆୟ ବର୍ହିଭୂତ ସମ୍ପତ୍ତି (DA Case) ର ଏକ ମାମଲା ମୁଲାୟମ ସିଂହ ଯାଦବଙ୍କ ଅସୁବିଧା ବଢ଼ାଇ ଦେଇଥିଲା । ମିଡିଆ ରିପୋର୍ଟ ଅନୁଯାୟୀ, ବିଶ୍ୱନାଥ ଚତୁର୍ବେଦୀଙ୍କ ଆବେଦନ ଉପରେ ଶୁଣାଣି କରି ସୁପ୍ରିମକୋର୍ଟ ନେତାଜୀଙ୍କ ପାଖରୁ ତାଙ୍କ ପରିବାରର ସମ୍ପୂର୍ଣ୍ଣ ବିବରଣୀ ମାଗିଥିଲେ । ଏହି ଆଇନଗତ ଜାଲ ମଧ୍ୟରେ ମୁଲାୟମ ସିଂହ ଯାଦବ ଏକ ଏମିତି ସତ୍ୟପାଠ ଦାଖଲ କଲେ, ଯାହା ସାରା ଦେଶକୁ ଚକିତ କରିଦେଇଥିଲା । ସେହି ହଲଫନାମାରେ ପ୍ରଥମ ଥର ପାଇଁ ଆଧିକାରିକ ଭାବେ ସାଧନା ଗୁପ୍ତାଙ୍କୁ ତାଙ୍କ ପତ୍ନୀ ଏବଂ ପ୍ରତୀକ ଯାଦବଙ୍କୁ ତାଙ୍କ ପୁଅ ଭାବରେ ଗ୍ରହଣ କରାଯାଇଥିଲା । ତାହା କେବଳ ଏକ ଆଇନଗତ କାଗଜ ନଥିଲା, ବରଂ ଜଣେ ପିତାଙ୍କର ସେହି ସାର୍ବଜନୀନ ସ୍ୱୀକାରୋକ୍ତି ଥିଲା ଯାହା ପ୍ରତୀକଙ୍କୁ ସମାଜରେ ତାଙ୍କର ପ୍ରକୃତ ପରିଚୟ ଏବଂ ଯାଦବ ଖାନ୍ଦାନରେ ତାଙ୍କର ଅଧିକାର ଦେଇଥିଲା ।

ସ୍କୁଲ୍ ରେକର୍ଡ ଏବଂ ପିତାଙ୍କ ନାମ

ପ୍ରତୀକ ଯାଦବଙ୍କ ପ୍ରାରମ୍ଭିକ ବର୍ଷଗୁଡ଼ିକ ବହୁତ ଭିନ୍ନ ଥିଲା । ମିଡିଆ ରିପୋର୍ଟ ଏବଂ ସେହି ସମୟର ଦଲିଲଗୁଡ଼ିକୁ ଯଦି ବିଶ୍ୱାସ କରାଯାଏ,ତେବେ ପ୍ରତୀକଙ୍କ ସ୍କୁଲ ସାର୍ଟିଫିକେଟ୍ ଏବଂ ଅନ୍ୟାନ୍ୟ କାଗଜପତ୍ରରେ ପିତାଙ୍କ ନାମ ସ୍ଥାନରେ ପ୍ରଥମେ ‘ଚନ୍ଦ୍ର ପ୍ରକାଶ ଗୁପ୍ତା’ ଲେଖା ହୋଇଥିଲା । ଚନ୍ଦ୍ର ପ୍ରକାଶ ଗୁପ୍ତା ସାଧନା ଗୁପ୍ତାଙ୍କ ପ୍ରଥମ ସ୍ୱାମୀ ଥିଲେ । କୁହାଯାଏ ଯେ ଏହା ପରେ ମୁଲାୟମ ସିଂହ ଯାଦବ ଏହି ସ୍ଥିତିକୁ ବଦଳାଇବା ପାଇଁ ଆଇନର ପଥ ଆପଣେଇଥିଲେ । ସେ ଲକ୍ଷ୍ନୌ ନିକଟସ୍ଥ ଏକ ଗ୍ରାମର ‘ମ୍ୟୁଟେସନ୍ ରେକର୍ଡ୍ସ’ (Mutation Records) ରେ ପରିବର୍ତ୍ତନ କରାଇଲେ ଏବଂ ପ୍ରତୀକଙ୍କୁ ଆଇନଗତ ଭାବେ ନିଜର ନାମ ଦେଲେ । ଏହି ଗୋଟିଏ ପରିବର୍ତ୍ତନ ପ୍ରତୀକଙ୍କ ସମ୍ପୂର୍ଣ୍ଣ ଜୀବନ ବଦଳାଇ ଦେଇଥିଲା । ଯେଉଁ ପୁଅ କାଲି ପର୍ଯ୍ୟନ୍ତ ଜଣେ ସାଧାରଣ ଛାତ୍ର ପରି ପରିଚୟ ଖୋଜୁଥିଲା, ସେ ହଠାତ୍ ଦେଶର ସବୁଠାରୁ ବଡ଼ ରାଜନୈତିକ ପରିବାରର ଅଂଶ ପାଲଟିଗଲା ।

ସାଧନା ଗୁପ୍ତାଙ୍କ ସେହି ନିରବ ତପସ୍ୟା

ପ୍ରତୀକ ଯାଦବଙ୍କୁ ତାଙ୍କର ଅଧିକାର ଦେବା ପଛରେ ତାଙ୍କ ମାଆ ସାଧନା ଗୁପ୍ତାଙ୍କର ବହୁତ ବଡ଼ ସଂଘର୍ଷ ରହିଛି । ୮୦ ଦଶକରୁ ଆରମ୍ଭ ହୋଇଥିବା ଏହି କାହାଣୀ ୨୦୦୭ରେ ଯାଇ ନିଜର ଶେଷ ସୀମାରେ ପହଞ୍ଚିଥିଲା । ମିଡିଆରେ ପ୍ରକାଶିତ ରିପୋର୍ଟ ଅନୁଯାୟୀ, ସାଧନା ଗୁପ୍ତା ବହୁ ବର୍ଷ ଧରି ପରଦା ପଛରେ ରହି ମୁଲାୟମ ସିଂହ ଯାଦବଙ୍କ ସାଥ୍ ଦେଇଥିଲେ, କିନ୍ତୁ ସେ କେବେବି ନିଜ ପୁଅର ଅଧିକାର ସହ ବୁଝାମଣା କରିନଥିଲେ । ୨୦୦୩ରେ ମୁଲାୟମଙ୍କ ପ୍ରଥମ ପତ୍ନୀ ମାଳତୀ ଦେବୀଙ୍କ ନିଧନ ପରେ ଘରେ ସାଧନା ଗୁପ୍ତାଙ୍କ ପ୍ରଭାବ ବଢ଼ିଲା, କିନ୍ତୁ ତାଙ୍କୁ ଏବଂ ପ୍ରତୀକଙ୍କୁ ‘ରାଜକୁମାର’ର ମାନ୍ୟତା ସେହି ୨୦୦୭ର ହଲଫନାମା ପରେ ମିଳିଥିଲା । ପ୍ରତୀକଙ୍କୁ ମୁଲାୟମଙ୍କ ନିକଟତର କରିବା ଏବଂ ତାଙ୍କୁ ପରିବାରରେ ସ୍ଥାପିତ କରିବା ପାଇଁ ସାଧନା ଗୁପ୍ତା ପ୍ରତ୍ୟେକ ରାଜନୈତିକ ଏବଂ ପାରିବାରିକ ଝଡ଼ର ସାମ୍ନା କରିଥିଲେ ।

ଅଖିଳେଶ ଏବଂ ପ୍ରତୀକ: ଦୁଇ ଭାଇ, ଦୁଇ ଦୁନିଆ

ଯେତେବେଳେ ୨୦୦୭ରେ ଦୁନିଆ ଜାଣିବାକୁ ପାଇଲା ଯେ ପ୍ରତୀକ ମଧ୍ୟ ମୁଲାୟମଙ୍କ ପୁଅ, ସେତେବେଳେ ସବୁଠାରୁ ଅଧିକ ଚର୍ଚ୍ଚା ଏହି କଥାକୁ ନେଇ ହୋଇଥିଲା ଯେ ଏହା ଉପରେ ଅଖିଳେଶ ଯାଦବଙ୍କ ଆଭିମୁଖ୍ୟ କ’ଣ ରହିବ । ଯେଉଁଠି ଅଖିଳେଶ ରାଜନୀତିର ମଙ୍ଗ ଧରୁଥିଲେ, ସେଇଠି ପ୍ରତୀକ ନିଜକୁ ଆଖଡ଼ା ଏବଂ ରାଜନୀତିରୁ ଦୂରେଇ ରଖିଥିଲେ । ଦୁଇ ଭାଇଙ୍କ ଦୁନିଆ ସମ୍ପୂର୍ଣ୍ଣ ଅଲଗା ଥିଲା । ପ୍ରତୀକଙ୍କୁ ଜିମ୍, ମହଙ୍ଗା କାର୍ ଏବଂ ରିଅଲ୍ ଇଷ୍ଟେଟ୍ର ସଉକ ଥିଲା । ସେ କେବେବି ସମାଜବାଦୀ ପାର୍ଟିର ମଞ୍ଚରେ ସ୍ଥାନ ମାଗି ନଥିଲେ, କିନ୍ତୁ ନେତାଜୀଙ୍କ ହୃଦୟରେ ତାଙ୍କ ପାଇଁ ସବୁବେଳେ ଏକ କୋମଳ ସ୍ଥାନ ରହିଥିଲା । ପ୍ରତୀକଙ୍କ ପରିଚୟ ପଛରେ ଜଣାପଡ଼ିଥିଲେ ମଧ୍ୟ, ମୁଲାୟମ ସିଂହ ତାଙ୍କୁ ସେହି ସମସ୍ତ ସୁଖ-ସୁବିଧା ଏବଂ ଭଲପାଇବା ଦେଇଥିଲେ ଯାହା ଜଣେ ପିତା ନିଜ ପୁଅକୁ ଦେଇପାରେ ।

ନୀଳ ଲମ୍ବୋର୍ଗିନି ଏବଂ ସମାଜବାଦର ବିବାଦ

ପ୍ରତୀକ ଯାଦବଙ୍କ ପରିଚୟ କେବଳ ମୁଲାୟମଙ୍କ ପୁଅ ଭାବରେ ନଥିଲା, ବରଂ ତାଙ୍କର ବିଳାସପୂର୍ଣ୍ଣ ଜୀବନଶୈଳୀ ପାଇଁ ମଧ୍ୟ ଥିଲା । ଯେତେବେଳେ ସେ ୫ କୋଟି ଟଙ୍କାର ନୀଳ ଲମ୍ବୋର୍ଗିନି (Lamborghini) କିଣିଥିଲେ, ସେତେବେଳେ ସାରା ଦେଶର ମିଡିଆରେ ବିତର୍କ ଆରମ୍ଭ ହୋଇଯାଇଥିଲା । ବିରୋଧୀମାନେ ପ୍ରଶ୍ନ ଉଠାଇଥିଲେ ଯେ ସମାଜବାଦର ନାରା ଦେଉଥିବା ନେତାଙ୍କ ପୁଅ ଏତେ ମହଙ୍ଗା କାର୍ରେ କିପରି ବୁଲିପାରୁଛି? ସେହି ସମୟରେ ମଧ୍ୟ ପ୍ରତୀକ ବହୁତ ନିର୍ଭୀକତାର ସହ ଜବାବ ଦେଇଥିଲେ ଯେ ସେ ଜଣେ ପେସାଦାର ବ୍ୟବସାୟୀ ଏବଂ ନିଜର ଖର୍ଚ୍ଚ ନିଜେ ତୁଲାନ୍ତି । ଯେଉଁ ହଲଫନାମା ତାଙ୍କୁ ‘ଯାଦବ’ ନାମ ଦେଇଥିଲା, ତାହା ହିଁ ତାଙ୍କୁ ଏହିଭଳି ସମାଲୋଚନାର ସାମ୍ନା କରିବାକୁ ଶକ୍ତି ଦେଇଥିଲା । ପ୍ରତୀକ ସବୁବେଳେ ଏହା ପ୍ରମାଣ କରିବାକୁ ଚେଷ୍ଟା କରିଥିଲେ ଯେ ସେ ନିଜର ପରିଚୟ ନିଜ ବଳରେ ତିଆରି କରିବାକୁ ଚାହାଁନ୍ତି ।

ବିବାଦ ମଧ୍ୟରେ ଅପର୍ଣ୍ଣା ଯାଦବଙ୍କ ଏଣ୍ଟ୍ରି

ପ୍ରତୀକ ଯାଦବଙ୍କ କାହାଣୀରେ ଆଉ ଏକ ମୋଡ଼ ସେତେବେଳେ ଆସିଲା ଯେତେବେଳେ ତାଙ୍କର ବିବାହ ଅପର୍ଣ୍ଣା ଯାଦବଙ୍କ ସହ ହେଲା । ଅପର୍ଣ୍ଣା, ପ୍ରତୀକଙ୍କ ବିପରୀତ ରାଜନୀତିରେ ଗଭୀର ଆଗ୍ରହ ଦେଖାଇଲେ । ଅପର୍ଣ୍ଣାଙ୍କ ଜରିଆରେ ପ୍ରତୀକଙ୍କ ପରିବାର ପୁଣିଥରେ ଚର୍ଚ୍ଚାରେ ରହିବାକୁ ଲାଗିଲା । ଯଦିଓ ପ୍ରତୀକ ପରଦା ପଛରେ ରହିଲେ, କିନ୍ତୁ ଅପର୍ଣ୍ଣା ବିଧାନସଭା ନିର୍ବାଚନ ଲଢ଼ି ଏବଂ ପରେ ବିଜେପିରେ ସାମିଲ ହୋଇ ଏହା ସ୍ପଷ୍ଟ କରିଦେଲେ ଯେ ଯାଦବ ପରିବାରର ଦ୍ୱିତୀୟ ଶାଖା ମଧ୍ୟ ସେତିକି ପ୍ରଭାବଶାଳୀ । ଆଜି ପ୍ରତୀକଙ୍କ ମୃତ୍ୟୁ ପରେ ଅପର୍ଣ୍ଣା ଏବଂ ତାଙ୍କ ପରିବାର ଉପରେ ଦୁଃଖର ପାହାଡ଼ ଭାଙ୍ଗି ପଡ଼ିଛି, କିନ୍ତୁ ଲୋକମାନେ ଆଜି ମଧ୍ୟ ସେହି ୨୦୦୭ର ଘଟଣାକୁ ମନେ ପକାଉଛନ୍ତି ଯାହା ଏହି ସମ୍ପୂର୍ଣ୍ଣ ପରିବାରର ଦିଗ ବଦଳାଇ ଦେଇଥିଲା ।

ଏକ ଅଧୁରା ଯାତ୍ରାର  ଅନ୍ତ

ପ୍ରତୀକ ଯାଦବଙ୍କ ମୃତ୍ୟୁ ସହିତ ହିଁ ମୁଲାୟମ ସିଂହ ଯାଦବଙ୍କ ସେହି ବ୍ୟକ୍ତିଗତ ଉତ୍ତରାଧିକାରର ଏକ ଅଂଶ ଚିରଦିନ ପାଇଁ ନିରବ ହୋଇଯାଇଛି । ୨୦୦୭ରେ ଯେଉଁ ‘ରାଜକୁମାର’ର ପରିଚୟ ଦୁନିଆ ସହ ହୋଇଥିଲା, ତାଙ୍କର ଯାତ୍ରା ଏତେ ଶୀଘ୍ର ଶେଷ ହୋଇଯିବ ବୋଲି କେହି ଭାବି ନଥିଲେ । ସେହି ହଲଫନାମା ଆଜି ମଧ୍ୟ ସୁପ୍ରିମକୋର୍ଟର ରେକର୍ଡରେ ମହଜୁଦ୍ ଅଛି, ଯାହା କହେ ଯେ କିପରି ଜଣେ ଶକ୍ତିଶାଳୀ ପିତା ନିଜ ପୁଅ ପାଇଁ ସାରା ଦୁନିଆର ପ୍ରଶ୍ନର ସାମ୍ନା କରିଥିଲେ । ପ୍ରତୀକ ଆଜି ଆମ ଗହଣରେ ନାହାନ୍ତି ସତ, କିନ୍ତୁ ଯାଦବ ପରିବାରର ଇତିହାସରେ ତାଙ୍କ ନାମ ସେହି ପୁଅ ଭାବରେ ଲିପିବଦ୍ଧ ରହିବ, ଯାହାଙ୍କ ପାଇଁ ଜଣେ ମୁଖ୍ୟମନ୍ତ୍ରୀ ନିଜର ସମ୍ପୂର୍ଣ୍ଣ ବ୍ୟକ୍ତିଗତ ଜୀବନକୁ ସାର୍ବଜନୀନ ମଞ୍ଚରେ ରଖିଦେଇଥିଲେ