ହିନ୍ଦୁ ଧର୍ମ ଉପରେ ଏକ ଗୁରୁତ୍ୱପୂର୍ଣ୍ଣ ଟିପ୍ପଣୀ କରି ସୁପ୍ରିମକୋର୍ଟ କହିଛନ୍ତି ଯେ, ଏହା କେବଳ ଏକ ପୂଜା-ପଦ୍ଧତି ନୁହେଁ, ବରଂ ଜୀବନ ଜିଇଁବାର ଏକ ଶୈଳୀ। କୋର୍ଟ କହିଛନ୍ତି ଯେ ହିନ୍ଦୁ ହୋଇ ରହିବା ପାଇଁ ମନ୍ଦିର ଯିବା କିମ୍ବା କୌଣସି ନିର୍ଦ୍ଦିଷ୍ଟ ରୀତିନୀତି ପାଳନ କରିବା ଅନିର୍ବାର୍ଯ୍ୟ ନୁହେଁ; ଘରେ ପ୍ରଦୀପଟିଏ ଜାଳିବା ମଧ୍ୟ ଆସ୍ଥାର ପ୍ରମାଣ।

ଧାର୍ମିକ ସ୍ୱାଧୀନତା ଏବଂ ଧାର୍ମିକ ସ୍ଥଳରେ ମହିଳାଙ୍କ ପ୍ରବେଶ ସମ୍ପର୍କିତ ମାମଲାର ଶୁଣାଣି ବେଳେ ବୁଧବାର (୧୩ ମଇ, ୨୦୨୬) ସୁପ୍ରିମକୋର୍ଟ ଏହି ମନ୍ତବ୍ୟ ଦେଇଛନ୍ତି। କୋର୍ଟ ସ୍ପଷ୍ଟ କରିଛନ୍ତି ଯେ, କୌଣସି ବ୍ୟକ୍ତିର ହିନ୍ଦୁତ୍ୱକୁ ପ୍ରମାଣିତ କରିବା ପାଇଁ ତାଙ୍କର ବିଶ୍ୱାସ ହିଁ ଯଥେଷ୍ଟ।

ମୁଖ୍ୟ ବିଚାରପତି ଜଷ୍ଟିସ ସୂର୍ଯ୍ୟକାନ୍ତଙ୍କ ଅଧ୍ୟକ୍ଷତାରେ ଗଠିତ ୯ ଜଣିଆ ସମ୍ବିଧାନ ପୀଠ ଏହି ଶୁଣାଣି କରୁଛନ୍ତି। ଏହି ପୀଠରେ ଜଷ୍ଟିସ ବି.ଭି. ନାଗରତ୍ନ, ଏମ.ଏମ. ସୁନ୍ଦରେଶ, ଅହସାନୁଦ୍ଦିନ ଅମାନୁଲ୍ଲା, ଅରବିନ୍ଦ କୁମାର, ଅଗଷ୍ଟିନ ଜର୍ଜ ମସିହ, ପ୍ରସନ୍ନ ବି. ବରାଲେ, ଆର. ମହାଦେବନ ଏବଂ ଜୟମାଲ୍ୟ ବାଗଚି ସାମିଲ ଅଛନ୍ତି। ଏହି ପୀଠ ଶବରୀମାଳା ମନ୍ଦିରରେ ମହିଳାଙ୍କ ପ୍ରବେଶ ଏବଂ ବିଭିନ୍ନ ଧର୍ମରେ ପ୍ରଚଳିତ ପରମ୍ପରା ସହ ଜଡ଼ିତ ବ୍ୟାପକ ପ୍ରସଙ୍ଗର ବିଚାର କରୁଛନ୍ତି।

୧୯୬୬ର ପୁରୁଣା ନିଷ୍ପତ୍ତିର ଉଦାହରଣ

ଶୁଣାଣି ବେଳେ ବରିଷ୍ଠ ଆଇନଜୀବୀ ଡକ୍ଟର ଜି. ମୋହନ ଗୋପାଳ ୧୯୬୬ର ଏକ ପୁରୁଣା ନିଷ୍ପତ୍ତିର ସୂଚନା ଦେଇଥିଲେ, ଯେଉଁଥିରେ ଅଦାଲତ ହିନ୍ଦୁର ସଂଜ୍ଞା ଦେଇ କହିଥିଲେ ଯେ- "ଯିଏ ବେଦକୁ ଧର୍ମ ଏବଂ ଦର୍ଶନ କ୍ଷେତ୍ରରେ ସର୍ବୋଚ୍ଚ ବୋଲି ମାନନ୍ତି, ସେ ହିଁ ହିନ୍ଦୁ"। ସେ ପ୍ରଶ୍ନ କରିଥିଲେ ଯେ ଆଜିର ସମାଜରେ ସମସ୍ତେ ବେଦକୁ ସର୍ବୋଚ୍ଚ ପ୍ରାମାଣିକତା ଦିଅନ୍ତି କି? ସାମାଜିକ ବାସ୍ତବତା ଏହାଠାରୁ ଅଧିକ ବ୍ୟାପକ।

'ହିନ୍ଦୁ ଧର୍ମ ଏକ ଜୀବନ ଜିଇଁବାର ଶୈଳୀ'

ଏହାର ଜବାବରେ ଜଷ୍ଟିସ ବି.ଭି. ନାଗରତ୍ନ କହିଥିଲେ, "ସେଥିପାଇଁ ହିନ୍ଦୁ ଧର୍ମକୁ ଜୀବନ ଜିଇଁବାର ଏକ ଶୈଳୀ (Way of Life) କୁହାଯାଏ। ଜଣେ ହିନ୍ଦୁ ପାଇଁ ମନ୍ଦିର ଯିବା କିମ୍ବା ରୀତିନୀତି କରିବା ଜରୁରୀ ନୁହେଁ।" ପ୍ରତ୍ୟେକ ବ୍ୟକ୍ତି ନିଜ ଢଙ୍ଗରେ ଆସ୍ଥା ପ୍ରକଟ କରିପାରିବେ ଏବଂ ଏଥିରେ କେହି ବାଧା ଦେଇପାରିବେ ନାହିଁ।

'କୁଡ଼ିଆରେ ଦୀପ ଜାଳିବା ବି ଯଥେଷ୍ଟ'

ମୁଖ୍ୟ ବିଚାରପତି ଜଷ୍ଟିସ ସୂର୍ଯ୍ୟକାନ୍ତ କହିଥିଲେ ଯେ, ଯଦି ଜଣେ ବ୍ୟକ୍ତି ନିଜ କୁଡ଼ିଆ ଭିତରେ ମଧ୍ୟ ଦୀପଟିଏ ଜାଳୁଛନ୍ତି, ତେବେ ତାହା ତାଙ୍କ ଧର୍ମକୁ ପ୍ରମାଣିତ କରିବା ପାଇଁ ଯଥେଷ୍ଟ।

ପୂର୍ବରୁ କୋର୍ଟ କ’ଣ କହିଥିଲେ?

ସୁପ୍ରିମକୋର୍ଟ ପୂର୍ବରୁ ସତର୍କ କରାଇଥିଲେ ଯେ, ଯଦି ପ୍ରତ୍ୟେକ ଧାର୍ମିକ ପ୍ରଥା ଉପରେ କୋର୍ଟରେ ପ୍ରଶ୍ନ ଉଠାଯାଏ, ତେବେ ଶହ ଶହ ଆବେଦନ ଦାଖଲ ହେବ ଏବଂ ଏହା ଦ୍ୱାରା ପ୍ରତିଟି ଧର୍ମ ଭାଙ୍ଗିଯିବାର ଆଶଙ୍କା ରହିଛି।

ସେପ୍ଟେମ୍ବର ୨୦୧୮ରେ ସୁପ୍ରିମକୋର୍ଟ ଶବରୀମାଳା ମନ୍ଦିରରେ ୧୦ରୁ ୫୦ ବର୍ଷ ବୟସର ମହିଳାଙ୍କ ପ୍ରବେଶ ଉପରେ ଥିବା କଟକଣାକୁ ହଟାଇଥିଲେ। ଏବେ ୯ ଜଣିଆ ପୀଠ ଧାର୍ମିକ ସ୍ୱାଧୀନତା ଏବଂ ସମାନତା ସହ ଜଡ଼ିତ ବୃହତର ପ୍ରସଙ୍ଗଗୁଡ଼ିକର ପୁନଃ ବିଚାର କରୁଛନ୍ତି।