ମହାମାରୀ କରୋନା କବଳରୁ ମୁକୁଳିବାକୁ ଜୋରଜାର ଲଢେଇ କରୁଛି ଭାରତ  ।  ଏଥିରୁ ମିଳିବ ମୁକ୍ତି  ।  ସାରା ଦେଶରେ ହେବ ଟୀକାକରଣ  ।  ଆସନ୍ତାକାଲି ସକାଳ 9 ଟାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଟୀକାକରଣର ଶୁଭାରମ୍ଭ କରିବେ  ।  

ଆସନ୍ତାକାଲି ସାରା ଦେଶରେ ହେବ ଟୀକାକରଣ ଆରମ୍ଭ ହେବ ।  ପ୍ରଥମେ ଦେଶର ତିନି ଲକ୍ଷ ସ୍ୱାସ୍ଥ୍ୟ କର୍ମୀଙ୍କୁ ଟୀକା ଦିଆଯିବ  ।  ଦେଶର ତିନି ହଜାର ଟୀକା ବୁଥରେ ଏହି ସ୍ୱାସ୍ଥ୍ୟକର୍ମୀଙ୍କୁ ଉଭୟ କୋଭିସିଲ୍ଡ ଏବଂ କୋଭାକ୍ସିନ ଟୀକା ଦିଆଯିବ  । ସକାଳ 9 ଟାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଟୀକାକରଣର ଶୁଭାରମ୍ଭ କରିବେ  ।  ଏହି ସମୟରେ ଭିଡିଓ କନଫରେନ୍ସିଂ ମାଧ୍ୟମରେ ସବୁ ରାଜ୍ୟର ମୁଖ୍ୟମନ୍ତ୍ରୀ ତଥା ସ୍ୱାସ୍ଥ୍ୟମନ୍ତ୍ରୀ ମଧ୍ୟ ଉପସ୍ଥିତ ରହିବେ  ।

ଆସନ୍ତାକାଲି ଦେଶର 2,934 କେନ୍ଦ୍ରରେ କରୋନା ଟୀକା ଦିଆଯିବ ବୋଲି ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି  ।  ପ୍ରଥମେ 5000 କେନ୍ଦ୍ରରେ ଟୀକା ଦେବା ପାଇଁ ପ୍ରସ୍ତୁତି ହୋଇଥିଲା କିନ୍ତୁ ପରବର୍ତ୍ତୀ ସମୟରେ ଏହାକୁ କମ କରାଯାଇଛି   । ଦିଲ୍ଲୀର 89 ଟି କେନ୍ଦ୍ରରେ ଟୀକାକରଣ ଚୟନ ହୋଇଥିବା ବେଳେ ଏଥିରେ ହ୍ରାସ କରାଯାଇ ବର୍ତ୍ତମାନ ଏହି ସଂଖ୍ୟା 75 କରାଯାଇଛି  ।  ତେବେ ଆଗାମୀ ଦିନରେ କେନ୍ଦ୍ର ସଂଖ୍ୟା ବୃଦ୍ଧି କରାଯିବ  ।