ନୂଆଦିଲ୍ଲୀ: ଦେଶରେ ଆଗାମୀ ଜନଗଣନା  ପାଇଁ ପ୍ରସ୍ତୁତି ଜୋରସୋରରେ ଚାଲିଛି। ଏଥର ଜନଗଣନା ପ୍ରକ୍ରିୟା ପୂର୍ବ ଅପେକ୍ଷା ଅଧିକ ସମୟ ଧରି ଚାଲିବ ଏବଂ ଏଥିରେ ଅନେକ ନୂତନ ବ୍ୟବସ୍ଥା ମଧ୍ୟ ଯୋଡ଼ାଯାଇଛି। ମିଳିଥିବା ସୂଚନା ଅନୁଯାୟୀ, ଜନଗଣନା ପ୍ରକ୍ରିୟା ପ୍ରାୟ ଦେଢ଼ ମାସ ଧରି ଚାଲିବ ଯେଉଁଥିରେ ସ୍ୱୟଂ-ଗଣନା  ପାଇଁ ମଧ୍ୟ ସ୍ୱତନ୍ତ୍ର ସମୟ ଧାର୍ଯ୍ୟ କରାଯାଇଛି।

୨୦୧୧ ଜନଗଣନା ସମୟରେ ୨୯ଟି ପ୍ରଶ୍ନ ପଚରାଯାଇଥିବା ବେଳେ, ଏଥର ଜନଗଣନା ପର୍ଯ୍ୟାୟରେ ପ୍ରଶ୍ନ ସଂଖ୍ୟା ବୃଦ୍ଧି ପାଇ ୪୦ରେ ପହଞ୍ଚିଛି। ଅର୍ଥାତ୍ ଏଥର ୧୧ଟି ନୂତନ ପ୍ରଶ୍ନକୁ ତାଲିକାରେ ସାମିଲ କରାଯାଇଛି।

ଏହି ନୂତନ ପ୍ରଶ୍ନ ଓ ତଥ୍ୟଗୁଡ଼ିକ ମଧ୍ୟରେ ମୁଖ୍ୟତଃ ନିମ୍ନଲିଖିତ ବିଷୟଗୁଡ଼ିକ ଅନ୍ତର୍ଭୁକ୍ତ:

ଜାତି ସମ୍ବନ୍ଧୀୟ ସଠିକ୍ ସୂଚନା

ପତି କିମ୍ବା ପତ୍ନୀଙ୍କ ନାମ

ପିତା ଏବଂ ମାତାଙ୍କ ସମ୍ବନ୍ଧୀୟ ବିବରଣୀ

ବ୍ୟକ୍ତିଙ୍କ ଘୋଷିତ ଜାତୀୟତା 

ସ୍ଥାୟୀ ଠିକଣା

କୋଭିଡ-୧୯ ଟିକାକରଣ ସ୍ଥାନ

ସମୁଦାୟ ବ୍ୟାଙ୍କ ଆକାଉଣ୍ଟ ସଂଖ୍ୟା

ମୋବାଇଲ୍ ନମ୍ବର, ଆଧାର ନମ୍ବର ଏବଂ ଭୋଟର ଆଇଡି ନମ୍ବର

ପାସପୋର୍ଟ ନମ୍ବର ଏବଂ ଡ୍ରାଇଭିଂ ଲାଇସେନ୍ସ ଉପଲବ୍ଧତା

କେବେଠାରୁ ଆରମ୍ଭ ହେବ ଗଣନା ?

ଜନଗଣନା ୨୦୨୭ ପାଇଁ କେନ୍ଦ୍ର ସରକାର ଏବଂ ମହାପଞ୍ଜୀୟ କାର୍ଯ୍ୟାଳୟ ପକ୍ଷରୁ ସମୟସୂଚୀ ଜାରି କରାଯାଇଛି। ଲୋକେ ନିଜେ ଅନଲାଇନ୍ ମାଧ୍ୟମରେ ନିଜର ତଥ୍ୟ ପୂରଣ କରିବା ପାଇଁ ଜାନୁଆରୀ ୧୦ ରୁ ଜାନୁଆରୀ ୨୪, ୨୦୨୭ ପର୍ଯ୍ୟନ୍ତ ସମୟ ପାଇବେ। ଦେଶର ଅଧିକାଂଶ ରାଜ୍ୟରେ ଜାନୁଆରୀ ୨୫ ରୁ ଫେବୃଆରୀ ୨୮, ୨୦୨୭ ପର୍ଯ୍ୟନ୍ତ ଗଣନାକାରୀମାନେ ଘରକୁ ଘର ବୁଲି ତଥ୍ୟ ସଂଗ୍ରହ କରିବେ।

କିଛି ନିର୍ଦ୍ଦିଷ୍ଟ ରାଜ୍ୟ ଯେଉଁଠାରେ ଆଗାମୀ ଦିନରେ ନିର୍ବାଚନ ରହିଛି (ଯଥା ଉତ୍ତରପ୍ରଦେଶ, ପଞ୍ଜାବ, ଗୋଆ ଓ ଉତ୍ତରାଖଣ୍ଡ), ସେଠାରେ ଘରକୁ ଘର ଗଣନା ପ୍ରକ୍ରିୟା ୩୫ ଦିନ ଧରି ଚାଲିବ। ସୂଚନାଯୋଗ୍ୟ ଯେ, ମଣିପୁରରେ ସ୍ଥାନୀୟ ଦାବି ଏବଂ ଏନଆରସି ପ୍ରକ୍ରିୟାକୁ ନେଇ ସ୍ଥିତିକୁ ଦୃଷ୍ଟିରେ ରଖି ବର୍ତ୍ତମାନ ପାଇଁ ଜନଗଣନା କାର୍ଯ୍ୟକ୍ରମକୁ ସ୍ଥଗିତ ରଖାଯାଇଛି। ସେହିପରି ହିମାଚଳ ପ୍ରଦେଶ, ଜମ୍ମୁ-କଶ୍ମୀର ଏବଂ ଲଦାଖର ବରଫପାତ ଅଞ୍ଚଳଗୁଡ଼ିକ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି।