ମହାରାଷ୍ଟ୍ର କାର୍ଯ୍ୟକାରୀ ରାଜ୍ୟପାଳ ଭାବେ ଶପଥ ପାଠ କଲେ ଆଚାର୍ଯ୍ୟ ଦେବବତ୍ର। ସୋମବାର ମୁମ୍ବାଇର ରାଜଭବନରେ ଆୟୋଜିତ ଏକ ଉତ୍ସବରେ ଶପଥ ଗ୍ରହଣ କରିବା ପରେ ଗୁଜରାଟ ରାଜ୍ୟପାଳ ଆଚାର୍ଯ୍ୟ ଦେବବ୍ରତ ମହାରାଷ୍ଟ୍ରର ରାଜ୍ୟପାଳ ଭାବରେ ଅତିରିକ୍ତ ଦାୟିତ୍ୱ ଗ୍ରହଣ କରିଛନ୍ତି। ବମ୍ବେ ହାଇକୋର୍ଟର ମୁଖ୍ୟ ବିଚାରପତି ଜଷ୍ଟିସ୍ ଚନ୍ଦ୍ରଶେଖର ତାଙ୍କୁ ଶପଥ ପାଠ କରାଇଛନ୍ତି। ଦେବବ୍ରତ ସଂସ୍କୃତରେ ଶପଥ ଗ୍ରହଣ କରିଥିଲେ। ଏହି ଉତ୍ସବରେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନଭିସ୍, ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ, ମନ୍ତ୍ରୀ, ବରିଷ୍ଠ ଅମଲାତନ୍ତ୍ରୀ ଏବଂ ଅନ୍ୟାନ୍ୟ ଗଣ୍ୟମାନ୍ୟ ବ୍ୟକ୍ତିମାନେ ଉପସ୍ଥିତ ଥିଲେ।

ରାଷ୍ଟ୍ରପତିଙ୍କ କାର୍ଯ୍ୟାଳୟ ଅନୁଯାୟୀ, ଦେବବ୍ରତ ଗୁଜରାଟର ରାଜ୍ୟପାଳ ଭାବରେ ଦାୟିତ୍ୱ ଜାରି ରଖିବା ସହିତ ମହାରାଷ୍ଟ୍ର ରାଜ୍ୟପାଳର ଅତିରିକ୍ତ ଦାୟିତ୍ୱ ତୁଲାଇବେ। ଭାରତର ଉପରାଷ୍ଟ୍ରପତି ନିର୍ବାଚିତ ହେବା ପରେ ସିପି ରାଧାକ୍ରିଷ୍ଣନଙ୍କ ଇସ୍ତଫା ପରେ ତାଙ୍କର ନିଯୁକ୍ତି ହୋଇଛି। ଦେବବ୍ରତ ୨୦୧୯ ମସିହାରୁ ଗୁଜରାଟର ରାଜ୍ୟପାଳ ଅଛନ୍ତି। ହିନ୍ଦୀ ଏବଂ ଇତିହାସରେ ସ୍ନାତକୋତ୍ତର ଡିଗ୍ରୀ ହାସଲ କରିଥିବା ଦେବବ୍ରତ ପ୍ରାକୃତିକ ଚିକିତ୍ସା ଏବଂ ଯୋଗ ବିଜ୍ଞାନରେ ଡକ୍ଟରେଟ୍ ଡିଗ୍ରୀ ହାସଲ କରିଛନ୍ତି। ଆଚାର୍ଯ୍ୟ ଦେବବ୍ରତଙ୍କ ଜନ୍ମ ଜାନୁଆରୀ ୧୮, ୧୯୫୯ରେ ହରିୟାଣାର ସମଲଖାରେ ହୋଇଥିଲା। ସେ କୁରୁକ୍ଷେତ୍ରର ଏକ ଗୁରୁକୂଳର ପ୍ରଧାନଶିକ୍ଷକ ଭାବରେ ପାରମ୍ପରିକ ଭାରତୀୟ ଶିକ୍ଷା ବ୍ୟବସ୍ଥାର ପ୍ରସାର କରିଥିଲେ।

ଆଚାର୍ଯ୍ୟ ଦେବବ୍ରତ ଅଗଷ୍ଟ ୨୦୧୫ ରୁ ଜୁଲାଇ ୨୦୧୯ ପର୍ଯ୍ୟନ୍ତ ହିମାଚଳ ପ୍ରଦେଶର ରାଜ୍ୟପାଳ ଭାବରେ କାର୍ଯ୍ୟ କରିଥିଲେ, ଯେତେବେଳେ ଜୁନ୍ ୨୦୧୯ ରୁ ସେ ଗୁଜରାଟର ରାଜ୍ୟପାଳ ଭାବରେ କାର୍ଯ୍ୟ କରୁଛନ୍ତି। ସେ ଗୁଜରାଟରେ ଶିକ୍ଷାଗତ, ସାମାଜିକ ଏବଂ ପରିବେଶଗତ ପଦକ୍ଷେପକୁ ପ୍ରୋତ୍ସାହିତ କରିଥିଲେ। ବିଶେଷକରି ପ୍ରାକୃତିକ କୃଷିକୁ ପ୍ରୋତ୍ସାହିତ କରିବାରେ ସେ ଉଲ୍ଲେଖନୀୟ କାର୍ଯ୍ୟ କରିଥିଲେ।

ସେ ନିଜେ ୧୮୦ ଏକର ଜମିରେ ପ୍ରାକୃତିକ କୃଷିର ସଫଳ ପରୀକ୍ଷଣ କରିଥିଲେ ଏବଂ ୧୦ ଲକ୍ଷରୁ ଅଧିକ ଚାଷୀଙ୍କୁ ପ୍ରେରଣା ଦେଇଥିଲେ। ସେ ପଦ୍ମଶ୍ରୀ ସୁଭାଷ ପାଲେରକରଙ୍କ ସହଯୋଗରେ 'ଜୀବାମୃତ' ସାରକୁ ପ୍ରୋତ୍ସାହିତ କରିଥିଲେ। ଆର୍ଯ୍ୟ ସମାଜର ପ୍ରଚାରକ ଭାବରେ ଜଣାଶୁଣା ଆଚାର୍ଯ୍ୟ ଦେବବ୍ରତ ସାମାଜିକ ସଂସ୍କାର, ଗୋ ସୁରକ୍ଷା ଏବଂ ପରିବେଶ ସଚେତନତା କ୍ଷେତ୍ରରେ ବିଶେଷ ଅବଦାନ ରଖିଛନ୍ତି।

ରାଜ୍ୟପାଳଙ୍କ ସରଳତା

ରାଜ୍ୟପାଳ ହେଉଛନ୍ତି ସମ୍ପୃକ୍ତ ରାଜ୍ୟର ପ୍ରଶାସନିକ ମୁଖ୍ୟ। ସେ ମୁଖ୍ୟମନ୍ତ୍ରୀଙ୍କ ଅପେକ୍ଷା ଅଧିକ ସୁବିଧା ମଧ୍ୟ ପାଆନ୍ତି। ତଥାପି, ଏହି ସମସ୍ତ ସୁବିଧାକୁ ବଳିଦାନ ଦେଇ, ମହାରାଷ୍ଟ୍ରର ନବନିର୍ବାଚିତ କାର୍ଯ୍ୟକାରୀ ରାଜ୍ୟପାଳ ଆଚାର୍ଯ୍ୟ ଦେବବ୍ରତ ଦାୟିତ୍ୱ ଗ୍ରହଣ କରିବା ପାଇଁ ଟ୍ରେନ୍ ଯୋଗେ ମୁମ୍ବାଇ ପହଞ୍ଚିଲେ। ଏପରି ପରିସ୍ଥିତିରେ, ତାଙ୍କର ସରଳତା ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା। ଦେବବ୍ରତ, ତାଙ୍କ ପତ୍ନୀ ଦର୍ଶନା ଦେବୀଙ୍କ ସହିତ, ରବିବାର ସକାଳେ ତେଜସ ଏକ୍ସପ୍ରେସରେ ଅହମ୍ମଦାବାଦରୁ ମୁମ୍ବାଇ ଯାତ୍ରା କରିଥିଲେ।

ଅଧିକ ପଢନ୍ତୁ: ୫୦ ପ୍ରତିଶତ ରପ୍ତାନୀ ଠପ୍, ୨୫ ହଜାର କୋଟିର କ୍ଷତି; ଟ୍ରମ୍ପଙ୍କ ଟାରିଫରେ ବେହାଲ ମତ୍ସ୍ୟଜୀବୀ, ୩ ମନ୍ତ୍ରୀଙ୍କୁ ସିଏମଙ୍କ ଗୁହାରି