ଚଣ୍ଡୀଗଡ଼: ପଞ୍ଜାବ ବିଧାନସଭାରେ କୃଷି ନୀତି ଉପରେ ଆଲୋଚନା କରିବା ଏବଂ ଏହାକୁ ସାର୍ବଜନୀନ କରିବାକୁ ଦାବି କରି ମଙ୍ଗଳବାର ସେକ୍ଟର ୩୪ର ଦଶହରା ପଡ଼ିଆରେ ବସିଥିବା ଭାରତୀୟ କିଷାନ ୟୁନିୟନ ଏକତା ଉଗ୍ରାହନର ସଦସ୍ୟମାନେ ନିରାଶ ହୋଇଛନ୍ତି।

ପଞ୍ଜାବ ବିଧାନସଭା ଅଧିବେଶନରେ କୃଷି ନୀତି ଉପରେ କୌଣସି ବିତର୍କ ହେବ ନାହିଁ ବୋଲି କୃଷିମନ୍ତ୍ରୀ ଗୁରମିତ୍ ସିଂହ ଖୁଦ୍ଡିଆନ୍ ସ୍ପଷ୍ଟ କରିଛନ୍ତି। କୃଷକ ଆୟୋଗ ଏବେ ନିଜର ରିପୋର୍ଟ ଦାଖଲ କରିଛନ୍ତି। କୃଷି ନୀତିକୁ ନେଇ ମୁଖ୍ୟମନ୍ତ୍ରୀଙ୍କ ସହ ଆଲୋଚନା ହେବ। କୃଷକ ସଂଗଠନ ଗୁଡ଼ିକ ସେମାନଙ୍କ ଦାବିପତ୍ର ଦେଇଛନ୍ତି। ଏବେ ସେମାନଙ୍କର କେଉଁ ଦାବି ପୂରଣ ହୋଇପାରିବ ତାହା ସରକାରଙ୍କୁ ଦେଖିବାକୁ ପଡ଼ିବ।

ଅନ୍ୟପକ୍ଷରେ ଆନ୍ଦୋଳନର ଚାପରେ ସରକାର ବିଧାନସଭାରେ କୃଷି ନୀତି ଉପରେ ବିତର୍କ କରିବେ ବୋଲି ଚାଷୀମାନେ ଆଶା ରଖିଛନ୍ତି। କୃଷିମନ୍ତ୍ରୀଙ୍କ ଠାରୁ ସ୍ପଷ୍ଟ ଉତ୍ତର ମିଳିବା ପରେ କୃଷକମାନେ ଏକ ବୈଠକ କରି ବୁଧବାର ପରବର୍ତ୍ତୀ ରଣନୀତି ସ୍ଥିର କରିବେ ବୋଲି ଘୋଷଣା କରିଛନ୍ତି। 

ଯଦି ଆପ୍ ସରକାର ସେମାନଙ୍କ ଦାବିକୁ ଗ୍ରହଣ ନ କରନ୍ତି, ତେବେ ସେମାନେ ଏହି ପାଞ୍ଚ ଦିନିଆ ଧାରଣାକୁ ଆହୁରି ଜାରି ରଖିପାରିବେ ବୋଲି ସେମାନେ କହିଛନ୍ତି। ସେପ୍ଟେମ୍ବର ୫ ତାରିଖ ପର୍ଯ୍ୟନ୍ତ ଆନ୍ଦୋଳନ କରିବାକୁ କୃଷକ ସଂଗଠନକୁ ପ୍ରଶାସନ ଅନୁମତି ଦେଇଛି। ବୁଧବାର ହେଉଛି ପଞ୍ଜାବ ବିଧାନସଭାର ମୌସୁମୀ ଅଧିବେଶନର ଶେଷ ଦିନ।

ଅଧିକ ପଢ଼ନ୍ତୁ: କର୍ଣ୍ଣାଟକରେ ଡେଙ୍ଗୁକୁ 'ମହାମାରୀ' ଘୋଷଣା କଲେ ସିଦ୍ଧରମୈୟା ସରକାର