ନୂଆଦିଲ୍ଲୀ: ପୂର୍ବତନ ଆମେରିକା ଜାତୀୟ ସୁରକ୍ଷା ପରାମର୍ଶଦାତା (ଏନଏସ) ଜନ୍ ବୋଲ୍ଟନ୍ ଗୁରୁବାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମଧ୍ୟରେ ସମ୍ପର୍କ ବିଷୟରେ ଏକ ବଡ଼ ବୟାନ ଦେଇଛନ୍ତି। ସେ କହିଛନ୍ତି ଯେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହିତ ବହୁତ ଭଲ ବ୍ୟକ୍ତିଗତ ସମ୍ପର୍କ ଥିଲା, କିନ୍ତୁ ଏବେ ଏହା ଶେଷ ହୋଇଯାଇଛି। ସେ ଚେତାବନୀ ଦେଇଛନ୍ତି ଯେ ଆମେରିକା ନେତା (ଡୋନାଲ୍ଡ ଟ୍ରମ୍ପ)ଙ୍କ ସହିତ ଘନିଷ୍ଠ ସମ୍ପର୍କ ବିଶ୍ୱ ନେତାମାନଙ୍କୁ ସବୁଠାରୁ ଖରାପ ସମୟରୁ ରକ୍ଷା କରିପାରିବ ନାହିଁ।

ବୋଲ୍ଟନଙ୍କ ମନ୍ତବ୍ୟ ଗତ ଦୁଇ ଦଶନ୍ଧି ମଧ୍ୟରେ ଭାରତ-ଆମେରିକା ସମ୍ପର୍କରେ ସମ୍ଭବତଃ ସବୁଠାରୁ ଖରାପ ପର୍ଯ୍ୟୟର ପୃଷ୍ଠଭୂମିରେ ଆସିଛି, ଯେଉଁଥିରେ ଟ୍ରମ୍ପଙ୍କ ଟାରିଫ୍ ନୀତି ଏବଂ ତାଙ୍କ ପ୍ରଶାସନର ଭାରତ ପ୍ରତି ନିରନ୍ତର ସମାଲୋଚନା ଯୋଗୁଁ ଉତ୍ତେଜନା ବୃଦ୍ଧି ପାଇଛି। ଦୁଇ ଦେଶ ମଧ୍ୟରେ ଦୂରତା ବଢିବାରେ ଲାଗିଛି ।  

ବ୍ରିଟିଶ ମିଡିଆ ପୋର୍ଟାଲ୍ ଏଲବିସିକୁ ଏକ ନିକଟରେ ଦେଇଥିବା ସାକ୍ଷାତକାରରେ ସେ କହିଛନ୍ତି, ମୁଁ ଭାବୁଛି ଟ୍ରମ୍ପ୍ ନେତାମାନଙ୍କ ସହିତ ତାଙ୍କର ବ୍ୟକ୍ତିଗତ ସମ୍ପର୍କର ପ୍ରିଜିମ୍ ମାଧ୍ୟମରେ ଅନ୍ତର୍ଜାତୀୟ ସମ୍ପର୍କକୁ ଦେଖନ୍ତି। ଯଦି ତାଙ୍କର ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହିତ ଭଲ ସମ୍ପର୍କ ଥାଏ, ତେବେ ଆମେରିକାର ମଧ୍ୟ ରୁଷ ସହିତ ଭଲ ସମ୍ପର୍କ ରହିବ। କିନ୍ତୁ ବାସ୍ତବତା ଏମିତି ନୁହେଁ । ବୋଲ୍ଟନ୍ ଟ୍ରମ୍ପଙ୍କ ପ୍ରଥମ କାର୍ଯ୍ୟକାଳରେ ଜାତୀୟ ସୁରକ୍ଷା ପରାମର୍ଶଦାତା (ଏନଏସଏ) ରହିଥିଲେ। କିନ୍ତୁ ବର୍ତ୍ତମାନ ସେ ଟ୍ରମ୍ପଙ୍କ ଜଣେ କଠୋର ସମାଲୋଚକ। ବୋଲ୍ଟନ୍ କହିଛନ୍ତି, ଟ୍ରମ୍ପ୍ଙ୍କର ମୋଦୀଙ୍କ ସହିତ ବହୁତ ଭଲ ବ୍ୟକ୍ତିଗତ ସମ୍ପର୍କ ଥିଲା। ମୁଁ ଭାବୁଛି ସେହି ସମ୍ପର୍କ ଏବେ ଶେଷ ହୋଇଯାଇଛି ଏବଂ ଏହା ସମସ୍ତଙ୍କ ପାଇଁ ଏକ ଶିକ୍ଷା। 

ଉଲ୍ଲେଖନୀୟ ଯେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସେପ୍ଟେମ୍ବର ୧୭ ରୁ ୧୯  ପର‌୍ୟ୍ୟନ୍ତ ବ୍ରିଟେନ ଗସ୍ତରେ ରହିବେ। ସେହି ସମୟରେ, ଏଲବିସି ସହିତ ନିଜର ସାକ୍ଷାତକାର ସହିତ ସୋସିଆଲ ମିଡିଆରେ ଏକ ପୋଷ୍ଟରେ, ବୋଲ୍ଟନ କହିଛନ୍ତି, 'ହ୍ୱାଇଟ୍ ହାଉସ ଆମେରିକା-ଭାରତ ସମ୍ପର୍କକୁ ଦଶନ୍ଧି ପଛକୁ ଠେଲି ଦେଇଛି, ଯାହା ମୋଦୀଙ୍କୁ ରୁଷ ଏବଂ ଚୀନର ନିକଟତର କରିଛି। ଚୀନ୍ ନିଜକୁ ଆମେରିକା ଏବଂ ଡୋନାଲ୍ଡ ଟ୍ରମ୍ପଙ୍କ ବିକଳ୍ପ ଭାବରେ ଉପସ୍ଥାପିତ କରିଛି।'