ଭାରତରେ ପ୍ରତିବର୍ଷ ଲକ୍ଷ ଲକ୍ଷ ଲୋକ ସାପ କାମୁଡ଼ାର ଶିକାର ହୁଅନ୍ତି, ହେଲେ ଏହି ସମସ୍ୟା କେବଳ ଗାଁ କିମ୍ବା ଜଙ୍ଗଲଘେରା ଅଞ୍ଚଳରେ ସୀମିତ ହୋଇ ରହିନାହିଁ। ସଂସଦରେ ସରକାରଙ୍କ ଦ୍ୱାରା ପ୍ରକାଶିତ ସଦ୍ୟତମ ତଥ୍ୟରୁ ଜଣାପଡ଼ିଛି ଯେ, ଗତ ତିନି ବର୍ଷ ମଧ୍ୟରେ ଦେଶବ୍ୟାପୀ ୩.୪୭ ଲକ୍ଷରୁ ଅଧିକ ସର୍ପାଘାତ ମାମଲା ରେକର୍ଡ ହୋଇଥିବା ବେଳେ ୯୮୭ ଜଣଙ୍କର ମୃତ୍ୟୁ ଘଟିଛି। ଏହି ତଥ୍ୟ ଏପରି ସମୟରେ ସାମ୍ନାକୁ ଆସିଛି, ଯେତେବେଳେ ବିଶ୍ୱ ସ୍ୱାସ୍ଥ୍ୟ ସଂଗଠନ ମଧ୍ୟ ସର୍ପାଘାତକୁ ଏକ ଗମ୍ଭୀର ଜନସ୍ୱାସ୍ଥ୍ୟ ଆହ୍ୱାନ ଭାବେ ଗ୍ରହଣ କରିଛି ଏବଂ ୨୦୩୦ ସୁଦ୍ଧା ଏଥିଯୋଗୁଁ ହେଉଥିବା ମୃତ୍ୟୁ ସଂଖ୍ୟାକୁ ଅଧା କରିବାକୁ ଲକ୍ଷ୍ୟ ରଖିଛି।

ରାଜ୍ୟସଭାରେ ଶିବସେନା ସାଂସଦ ସଞ୍ଜୟ ରାଉତଙ୍କ ପ୍ରଶ୍ନର ଉତ୍ତରରେ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ ସୂଚନା ଦେଇଛି ଯେ, ଏହି ଆହ୍ୱାନର ମୁକାବିଲା ପାଇଁ ସରକାର ଜାତୀୟ ସ୍ତରରେ ସ୍ୱତନ୍ତ୍ର କାର୍ଯ୍ୟକ୍ରମ ଚଲାଉଛନ୍ତି। ଏହାସହ ରୋଗୀଙ୍କୁ ସମୟସାପେକ୍ଷ ଚିକିତ୍ସା ଯୋଗାଇଦେବା ପାଇଁ ଆଣ୍ଟି-ସ୍ନେକ୍ ଭେନମ୍ କୁ ଆବଶ୍ୟକୀୟ ଔଷଧ ତାଲିକାରେ ଅନ୍ତର୍ଭୁକ୍ତ କରାଯାଇଛି।

ଦ୍ରୁତ ଗତିରେ ବୃଦ୍ଧି ପାଉଛି ମାମଲା

ସରକାର ଏହା ମଧ୍ୟ ସ୍ପଷ୍ଟ କରିଛନ୍ତି ଯେ, ଦେଶରେ ଆଣ୍ଟି-ସ୍ନେକ୍ ଭେନମ୍ର ଉତ୍ପାଦନ କ୍ଷମତା ବର୍ତ୍ତମାନ ଆବଶ୍ୟକତା ଅନୁଯାୟୀ ଯଥେଷ୍ଟ ରହିଛି ଏବଂ ସରକାରୀ ଓ ବେସରକାରୀ କମ୍ପାନୀଗୁଡ଼ିକ ମିଶି ଏହାର ଯୋଗାଣ କରୁଛନ୍ତି। ତେବେ ରାଜ୍ୟୱାରୀ ତଥ୍ୟରୁ ପ୍ରକାଶ ପାଇଛି ଯେ, ଅନେକ ରାଜ୍ୟରେ ସର୍ପାଘାତ ମାମଲା ଦ୍ରୁତ ଗତିରେ ବୃଦ୍ଧି ପାଉଛି। ପଶ୍ଚିମବଙ୍ଗ, କର୍ଣ୍ଣାଟକ, ତାମିଲନାଡୁ, ଓଡ଼ିଶା ଏବଂ ଅସମ ଭଳି ରାଜ୍ୟଗୁଡ଼ିକରେ ପ୍ରତିବର୍ଷ ହଜାର ହଜାର ଲୋକ ସାପ କାମୁଡ଼ାର ଶିକାର ହେଉଛନ୍ତି।

୨୦୩୦ ସୁଦ୍ଧା ମୃତ୍ୟୁ ସଂଖ୍ୟା କମାଇବାକୁ ଲକ୍ଷ୍ୟ

ସଂସଦରେ ଦିଆଯାଇଥିବା ଉତ୍ତର ଅନୁଯାୟୀ, ସ୍ୱାସ୍ଥ୍ୟକର୍ମୀଙ୍କ ତାଲିମ, ସଚେତନତା ଅଭିଯାନ, ନଜରରଖିବା ବ୍ୟବସ୍ଥା (Surveillance) ଏବଂ ଜରୁରୀକାଳୀନ ଚିକିତ୍ସାକୁ ସୁଦୃଢ଼ କରିବା ପାଇଁ ସରକାର ରାଜ୍ୟଗୁଡ଼ିକୁ ନିର୍ଦ୍ଦେଶ ଦେଇଛନ୍ତି। ଏହା ସହିତ ୨୦୨୪ ମସିହାରେ ଆରମ୍ଭ ହୋଇଥିବା "ନ୍ୟାସନାଲ ଆକ୍ସନ୍ ପ୍ଲାନ୍ ଫର୍ ପ୍ରିଭେନ୍ସନ୍ ଆଣ୍ଡ କଣ୍ଟ୍ରୋଲ୍ ଅଫ୍ ସ୍ନେକ୍ବାଇଟ୍ ଏନ୍ଭେନୋମିଂ (NAPSE)" ଜରିଆରେ ୨୦୩୦ ସୁଦ୍ଧା ସର୍ପାଘାତ ଜନିତ ମୃତ୍ୟୁରେ ବଡ଼ ଧରଣର ହ୍ରାସ ଆଣିବାକୁ ଲକ୍ଷ୍ୟ ରଖାଯାଇଛି।

ପ୍ରମୁଖ ତଥ୍ୟ:

• ୩ ବର୍ଷରେ ୩.୪୭ ଲକ୍ଷରୁ ଅଧିକ ସର୍ପାଘାତ ମାମଲା ରେକର୍ଡ।

• ୨୦୨୩-୨୦୨୫ ମଧ୍ୟରେ ୯୮୭ ଜଣଙ୍କ ମୃତ୍ୟୁ।

• ୨୦୨୫ ମସିହାରେ ସବୁଠାରୁ ଅଧିକ ୧.୪୦ ଲକ୍ଷ ମାମଲା ଏବଂ ୪୨୯ ମୃତ୍ୟୁ।

• କର୍ଣ୍ଣାଟକ ଏବଂ ପଶ୍ଚିମବଙ୍ଗରେ ମୃତ୍ୟୁ ସଂଖ୍ୟା ସବୁଠାରୁ ଅଧିକ।

• ସରକାର କହିଛନ୍ତି— ଦେଶରେ ଆଣ୍ଟି-ସ୍ନେକ୍ ଭେନମ୍ (ASV) ଉତ୍ପାଦନ ବର୍ତ୍ତମାନ ପର୍ଯ୍ୟାପ୍ତ।

କ’ଣ କହୁଛି ସରକାରୀ ଉତ୍ତର?

୨୧ ଜୁଲାଇ ୨୦୨୬ ରେ ରାଜ୍ୟସଭାରେ ସାଂସଦ ସଞ୍ଜୟ ରାଉତ ସରକାରଙ୍କୁ ପଚାରିଥିଲେ ଯେ, ଆଣ୍ଟି-ସ୍ନେକ୍ ଭେନମ୍ ଉପଲବ୍ଧ ଥାଇ ମଧ୍ୟ ଭାରତରେ ସର୍ପାଘାତ ଯୋଗୁଁ ଏତେ ମୃତ୍ୟୁ କାହିଁକି ହେଉଛି? ଗତ ତିନି ବର୍ଷରେ କେତେ ମାମଲା ସାମ୍ନାକୁ ଆସିଛି, କେତେ ମୃତ୍ୟୁ ଘଟିଛି ଏବଂ ଦେଶରେ ଆଣ୍ଟି-ସ୍ନେକ୍ ଭେନମ୍ର ଉତ୍ପାଦନ ଯଥେଷ୍ଟ କି ନୁହେଁ ବୋଲି ସେ ଜାଣିବାକୁ ଚାହିଁଥିଲେ।

ଏହାର ଉତ୍ତରରେ ସ୍ୱାସ୍ଥ୍ୟ ପ୍ରତିମନ୍ତ୍ରୀ ପ୍ରତାପରାଓ ଯାଦବ ସୂଚନା ଦେଇଛନ୍ତି ଯେ, ସର୍ପାଘାତର ମୁକାବିଲା ପାଇଁ ଜାତୀୟ ସ୍ୱାସ୍ଥ୍ୟ ମିଶନ୍ (NHM) ଅଧୀନରେ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ‘ପ୍ରୋଗ୍ରାମ୍ ଫର୍ ପ୍ରିଭେନ୍ସନ୍ ଆଣ୍ଡ କଣ୍ଟ୍ରୋଲ୍ ଅଫ୍ ସ୍ନେକ୍ବାଇଟ୍ ଏନ୍ଭେନୋମିଂ’ ଲାଗୁ କରାଯାଇଛି। ସରକାରୀ ହସପିଟାଲଗୁଡ଼ିକରେ ଯେପରି ଏହାର ଅଭାବ ନହୁଏ, ସେଥିପାଇଁ ଆଣ୍ଟି-ସ୍ନେକ୍ ଭେନମ୍କୁ ଜାତୀୟ ଏବଂ ରାଜ୍ୟ ଜରୁରୀକାଳୀନ ଔଷଧ ତାଲିକାରେ ସାମିଲ କରାଯାଇଛି।

ତିନି ବର୍ଷରେ କେତେ ବଢ଼ିଲା ବିପଦ?

ସଂସଦରେ ସରକାର ଦେଇଥିବା ତଥ୍ୟ ଅନୁଯାୟୀ:

ବର୍ଷ ମାମଲା ମୃତ୍ୟୁ

୨୦୨୩ ୮୬,୨୯୪ ମାମଲା ୧୮୩ ମୃତ୍ୟୁ

୨୦୨୪ ୧,୨୦,୯୮୨ ମାମଲା ୩୭୫ ମୃତ୍ୟୁ

୨୦୨୫ ୧,୪୦,୩୦୨ ମାମଲା ୪୨୯ ମୃତ୍ୟୁ

ଅର୍ଥାତ୍ ତିନି ବର୍ଷ ମଧ୍ୟରେ ମୋଟ ୩,୪୭,୫୭୮ ଟି ସର୍ପାଘାତ ମାମଲା ଏବଂ ୯୮୭ ଜଣଙ୍କ ମୃତ୍ୟୁ ରେକର୍ଡ କରାଯାଇଛି। ତଥ୍ୟରୁ ସ୍ପଷ୍ଟ ହେଉଛି ଯେ, ୨୦୨୫ ମସିହାରେ ଆକ୍ରାନ୍ତ ଓ ମୃତ୍ୟୁ ସଂଖ୍ୟା ପୂର୍ବ ବର୍ଷଗୁଡ଼ିକ ତୁଳନାରେ ଅଧିକ ରହିଥିଲା।

କେଉଁ ରାଜ୍ୟରେ ସବୁଠାରୁ ଅଧିକ ମାମଲା?

ସରକାରୀ ତଥ୍ୟ ଅନୁଯାୟୀ, ୨୦୨୫ ମସିହାରେ ସବୁଠାରୁ ଅଧିକ ସର୍ପାଘାତ ମାମଲା ପଶ୍ଚିମବଙ୍ଗ (୨୭,୪୭୧) ରେ ରେକର୍ଡ ହୋଇଛି। ଏହା ପଛକୁ କର୍ଣ୍ଣାଟକ (୧୬,୮୦୫), ତାମିଲନାଡୁ (୧୫,୮୩୭) ଏବଂ ଓଡ଼ିଶା (୧୫,୮୧୫) ରହିଛନ୍ତି।

ମୃତ୍ୟୁ ସଂଖ୍ୟା ମାମଲାରେ କର୍ଣ୍ଣାଟକ ସବୁଠାରୁ ଆଗରେ ରହିଛି, ଯେଉଁଠାରେ ୨୦୨୫ ରେ ୧୬୦ ଜଣଙ୍କ ଜୀବନ ଯାଇଛି। ଏହା ପରେ ପଶ୍ଚିମବଙ୍ଗ (୬୫), ଝାଡ଼ଖଣ୍ଡ ଓ ମଧ୍ୟପ୍ରଦେଶ (୨୬-୨୬), ତାମିଲନାଡୁ (୨୬) ଏବଂ ମହାରାଷ୍ଟ୍ର (୨୩) ରେ ସବୁଠାରୁ ଅଧିକ ମୃତ୍ୟୁ ଘଟିଛି।

ସରକାର କ’ଣ ପଦକ୍ଷେପ ନେଉଛନ୍ତି?

ସ୍ୱାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ ସର୍ପାଘାତ ଜନିତ ମୃତ୍ୟୁ ହ୍ରାସ କରିବା ପାଇଁ ବିଭିନ୍ନ ସ୍ତରରେ କାର୍ଯ୍ୟ ଚାଲିଛି:

୧. ସ୍ୱାସ୍ଥ୍ୟକର୍ମୀମାନଙ୍କୁ ସର୍ପାଘାତ ଚିକିତ୍ସା ପାଇଁ ସ୍ୱତନ୍ତ୍ର ତାଲିମ ଦିଆଯାଉଛି।

୨୨. ରାଜ୍ୟଗୁଡ଼ିକରେ ବ୍ୟାପକ ସଚେତନତା ଅଭିଯାନ ଚଲାଯାଉଛି।

୩. ନଜରରଖିବା ବ୍ୟବସ୍ଥା (Surveillance) କୁ ସୁଦୃଢ଼ କରାଯାଉଛି।

୪. ଆଣ୍ଟି-ସ୍ନେକ୍ ଭେନମ୍ର ଉପଲବ୍ଧତା ସୁନିଶ୍ଚିତ କରାଯାଉଛି।

୫. ଜରୁରୀକାଳୀନ ଔଷଧ, ଆମ୍ବୁଲାନ୍ସ ଏବଂ ଅନ୍ୟାନ୍ୟ ସମ୍ବଳକୁ ମଜବୁତ କରାଯାଉଛି।

ସରକାର ଏହା ମଧ୍ୟ ଜଣାଇଛନ୍ତି ଯେ, ଏପର୍ଯ୍ୟନ୍ତ ୧୨ଟି ରାଜ୍ୟ ସର୍ପାଘାତକୁ 'ନୋଟିଫାଏବୁଲ୍ ଡିଜିଜ୍' (Notifiable Disease) ଭାବେ ଘୋଷଣା କରିସାରିଛନ୍ତି। ଅର୍ଥାତ୍ ଏପରି ମାମଲାର ରିପୋର୍ଟ କରିବା ବାଧ୍ୟତାମୂଳକ ହେବ, ଯାହାଦ୍ୱାରା ସଠିକ୍ ତଥ୍ୟ ସଂଗ୍ରହ ଏବଂ ସମୟୋପଯୋଗୀ ପଦକ୍ଷେପ ନେବାରେ ସାହାଯ୍ୟ ମିଳିବ।

ରାଜ୍ୟଗୁଡ଼ିକର ତଥ୍ୟ କ’ଣ କହୁଛି?

ସରକାରୀ ତଥ୍ୟରୁ ଜଣାପଡ଼ିଛି ଯେ ଗତ ତିନି ବର୍ଷ ମଧ୍ୟରେ ଦେଶର ପ୍ରାୟ ସମସ୍ତ ରାଜ୍ୟରେ ସର୍ପାଘାତ ମାମଲା ରେକର୍ଡ କରାଯାଇଛି। ୨୦୨୫ ରେ ସବୁଠାରୁ ଅଧିକ ମାମଲା ପଶ୍ଚିମବଙ୍ଗ (୨୭,୪୭୧) ରୁ ସାମ୍ନାକୁ ଆସିଥିବା ବେଳେ, ଏହା ପରେ କର୍ଣ୍ଣାଟକ (୧୬,୮୦୫), ତାମିଲନାଡୁ (୧୫,୮୩୭), ଓଡ଼ିଶା (୧୫,୮୧୫) ଏବଂ ଅସମ (୧୧,୮୧୭) ରହିଛନ୍ତି। ମହାରାଷ୍ଟ୍ରରେ ୮,୫୫୮, ଗୁଜରାଟରେ ୮,୦୩୦, ଆନ୍ଧ୍ରପ୍ରଦେଶରେ ୪,୭୦୭, ବିହାରରେ ୪,୩୪୬, ଝାଡ଼ଖଣ୍ଡରେ ୩,୭୭୬, ରାଜସ୍ଥାନରେ ୩,୪୦୬ ଏବଂ ମଧ୍ୟପ୍ରଦେଶରେ ୩,୦୮୧ ଟି ମାମଲା ରେକର୍ଡ ହୋଇଛି।

ସେହିପରି ତେଲେଙ୍ଗାନା (୨,୯୯୮), କେରଳ (୨,୯୮୭), ଛତିଶଗଡ଼ (୨,୫୯୪), ତ୍ରିପୁରା (୧,୧୪୬), ଜମ୍ମୁ-କାଶ୍ମୀର (୧,୧୬୫) ଏବଂ ଉତ୍ତରପ୍ରଦେଶ (୧,୦୮୬) ରେ ମଧ୍ୟ ହଜାରେରୁ ଅଧିକ ମାମଲା ସାମ୍ନାକୁ ଆସିଛି। ଅନ୍ୟପଟେ ଲଦାଖ, ଲକ୍ଷଦ୍ୱୀପ, ଚଣ୍ଡୀଗଡ଼, ସିକିମ୍, ନାଗାଲାଣ୍ଡ, ମିଜୋରାମ ଏବଂ ଅରୁଣାଚଳ ପ୍ରଦେଶ ଭଳି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ମାମଲା ତୁଳନାତ୍ମକ ଭାବେ କମ୍ ରହିଛି।

କେଉଁଠି କେତେ ମୃତ୍ୟୁ?

ମୃତ୍ୟୁ ସଂଖ୍ୟା ଉପରେ ନଜର ପକାଇଲେ କର୍ଣ୍ଣାଟକ ସବୁଠାରୁ ଅଧିକ ପ୍ରଭାବିତ ରାଜ୍ୟ ହୋଇଛି, ଯେଉଁଠାରେ ୨୦୨୫ ରେ ୧୬୦ ଜଣଙ୍କ ଜୀବନ ଯାଇଛି। ଏହା ପରେ ପଶ୍ଚିମବଙ୍ଗ (୬୫), ଝାଡ଼ଖଣ୍ଡ (୨୬), ମଧ୍ୟପ୍ରଦେଶ (୨୬), ତାମିଲନାଡୁ (୨୬), ଓଡ଼ିଶା (୨୩), ମହାରାଷ୍ଟ୍ର (୨୩), ଉତ୍ତରପ୍ରଦେଶ (୧୯), ଗୁଜରାଟ (୧୬), ଆନ୍ଧ୍ରପ୍ରଦେଶ (୧୩) ଏବଂ ଅସମ (୧୩) ରେ ଅଧିକ ମୃତ୍ୟୁ ରେକର୍ଡ କରାଯାଇଛି।

ଦିଲ୍ଲୀ, ହରିୟାଣା, ପଞ୍ଜାବ, ଗୋଆ, ଚଣ୍ଡୀଗଡ଼, ଲଦାଖ ଏବଂ ଲକ୍ଷଦ୍ୱୀପ ଭଳି କେତେକ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ୨୦୨୫ ମସିହାରେ ସର୍ପାଘାତ ଜନିତ କୌଣସି ମୃତ୍ୟୁ ରେକର୍ଡ ହୋଇନାହିଁ। ବିହାରରେ ୩ ଏବଂ ଛତିଶଗଡ଼ରେ ୪ ଜଣଙ୍କ ମୃତ୍ୟୁ ମାମଲା ସାମ୍ନାକୁ ଆସିଛି। ମୋଟାମୋଟି ଭାବେ, ୨୦୨୩ ରେ ୮୬,୨୯୪ ମାମଲା ଓ ୧୮୩ ମୃତ୍ୟୁ, ୨୦୨୪ ରେ ୧,୨୦,୯୮୨ ମାମଲା ଓ ୩୭୫ ମୃତ୍ୟୁ, ଏବଂ ୨୦୨୫ ରେ ୧,୪୦,୩୦୨ ମାମଲା ଓ ୪୨୯ ମୃତ୍ୟୁ ରେକର୍ଡ କରାଯାଇଛି, ଯାହା ସ୍ପଷ୍ଟ କରୁଛି ଯେ ସର୍ପାଘାତ ମାମଲା ଏବଂ ମୃତ୍ୟୁ ସଂଖ୍ୟା କ୍ରମାଗତ ଭାବେ ବୃଦ୍ଧି ପାଉଛି।

୨୦୩୦ ର ଲକ୍ଷ୍ୟ କ’ଣ?

ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ୨୦୩୦ ସୁଦ୍ଧା ସର୍ପାଘାତ ଜନିତ ମୃତ୍ୟୁ ଏବଂ ଅଙ୍ଗହାନି/ଅକ୍ଷମତାକୁ ଅଧା କରିବାକୁ ଲକ୍ଷ୍ୟ ରଖିଛି। ଏହି ଲକ୍ଷ୍ୟକୁ ଧ୍ୟାନରେ ରଖି ଭାରତ ସରକାର ମାର୍ଚ୍ଚ ୨୦୨୪ ରେ "ନ୍ୟାସନାଲ ଆକ୍ସନ୍ ପ୍ଲାନ୍ ଫର୍ ପ୍ରିଭେନ୍ସନ୍ ଆଣ୍ଡ କଣ୍ଟ୍ରୋଲ୍ ଅଫ୍ ସ୍ନେକ୍ବାଇଟ୍ ଏନ୍ଭେନୋମିଂ (NAPSE)" ଆରମ୍ଭ କରିଥିଲେ। ଏହି ଯୋଜନା ଅଧୀନରେ ସ୍ୱାସ୍ଥ୍ୟ ମନ୍ତ୍ରଣାଳୟ, ପରିବେଶ ମନ୍ତ୍ରଣାଳୟ, ଜନଜାତି ବ୍ୟାପାର ମନ୍ତ୍ରଣାଳୟ, ପଞ୍ଚାୟତିରାଜ ମନ୍ତ୍ରଣାଳୟ ଏବଂ ନୀତି ଆୟୋଗ ସମେତ ଅନେକ ବିଭାଗ ମିଳିମିଶି କାର୍ଯ୍ୟ କରୁଛନ୍ତି।

ଆଣ୍ଟି-ସ୍ନେକ୍ ଭେନମ୍ର ଅଭାବ ଅଛି କି?

ସଂସଦରେ ସରକାର ସ୍ପଷ୍ଟ ଭାବେ କହିଛନ୍ତି ଯେ, ଡ୍ରଗ୍ସ କଣ୍ଟ୍ରୋଲର ଜେନେରାଲ୍ ଅଫ୍ ଇଣ୍ଡିଆ (DCGI) ରୁ ମିଳିଥିବା ସୂଚନା ଅନୁଯାୟୀ, ଦେଶରେ ସରକାରୀ ଓ ବେସରକାରୀ କମ୍ପାନୀଗୁଡ଼ିକର ମୋଟ ଉତ୍ପାଦନ କ୍ଷମତା ବର୍ତ୍ତମାନ ଆବଶ୍ୟକତା ଅନୁଯାୟୀ ଯଥେଷ୍ଟ। ସରକାରୀ କ୍ଷେତ୍ରର କମ୍ପାନୀଗୁଡ଼ିକୁ ସମ୍ପୃକ୍ତ ରାଜ୍ୟ ସରକାର ସହଯୋଗ କରୁଥିବା ବେଳେ, ଜାତୀୟ ସ୍ୱାସ୍ଥ୍ୟ ମିଶନ୍ ଅଧୀନରେ ରାଜ୍ୟଗୁଡ଼ିକୁ ବୈଷୟିକ ଓ ଆର୍ଥିକ ସହାୟତା ଯୋଗାଇ ଦିଆଯାଉଥିବା ନେଇ ମଧ୍ୟ ସରକାର ସୂଚନା ଦେଇଛନ୍ତି।