ଭାରସାମ୍ୟ ହରାଇ ପୋଲିସ ଗାଡ଼ି ଉପରେ ଓଲଟି ପଡ଼ିଥିଲା ଟ୍ରଲର। ତେବେ ଏହି ଦୁର୍ଘଟଣାରେ ୩ ପୋଲିସ କର୍ମୀଙ୍କ ମୃତ୍ୟୁ ହୋଇଛି। ରାଜସ୍ଥାନର ସିକର୍ରେ ଘଟିଛି ଏକ ମର୍ମନ୍ତୁଦ ସଡ଼କ ଦୁର୍ଘଟଣା। ଘଟଣା ସମ୍ପର୍କରେ ଖବର ପାଇ ବରିଷ୍ଠ ପୋଲିସ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ୩ ମୃତଦେହକୁ ଉଦ୍ଧାର କରି ଶବ ବ୍ୟବଚ୍ଛେଦ ପାଇଁ ପଠାଇଛନ୍ତି। ଏପରିକି ସମସ୍ତ ଘଟଣାର ଅଧିକା ତଦନ୍ତ ଆରମ୍ଭ କରିଛି ପୋଲିସ।
ସୂଚନା ମୁତାବକ, ରାଜସ୍ଥାନର ସିକର୍ରେ ପାଟନ ଥାନାର ଗାଡ଼ିରେ ୩ଜଣ ପୋଲିସ କର୍ମଚାରୀ ରାମପୁରାରୁ ପାଟନ ଥାନାକୁ ଆସୁଥିଲେ। ଏହି ସମୟରେ ରାମପୁରା ଘାଟି ନିକଟରେ ଦ୍ରୁତ ଗତିରେ ଆସୁଥିବା ଏକ ଓଭରଲୋଡ୍ ଟ୍ରଲର ହଠାତ୍ ଭାରସାମ୍ୟ ହରାଇ ପୋଲିସ ଗାଡ଼ି ଉପରେ ଓଲଟି ପଡ଼ିଥିଲା। ଏଥିରେ ଚାଳକଙ୍କ ସମେତ ୨ ଜଣଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିଲା। ଅନ୍ୟ ଜଣେ କର୍ମଚାରୀ ଗୁରୁତର ଆହତ ହୋଇଥିଲେ। ତେଣୁ ତାଙ୍କୁ ଚିକିତ୍ସା ପାଇଁ ତୁରନ୍ତ ହସ୍ପିଟାଲରେ ଭର୍ତ୍ତି କରାଯାଇଥିଲା। ହେଲେ ଡାକ୍ତର ତାଙ୍କୁ ଚିକିତ୍ସା କରିବା ପରେ ମୃତ ଘୋଷଣା କରିଥିଲେ। ତେଣୁ ଘଟଣା ବାବଦରେ ପୋଲିସ ଖବର ପାଇ ଘଟଣାସ୍ଥଳରେ ପହଂଚି ମୃତଦେହ ଉଦ୍ଧାର କରିବା ପରେ ଘଟଣା ବାବଦରେ ଅଧିକ ତଦନ୍ତ ଜାରି ରଖିଛି।