ନୂଆଦିଲ୍ଲୀ: ପହଲଗାମ ଆତଙ୍କୀ ହମଲା ପରେ ଭାରତ ପାକିସ୍ତାନର ଅଣ୍ଟା ଭାଙ୍ଗିବା ପାଇଁ ତିନି ପଟୁ ହମଲା କରିବାକୁ  ଯୋଜନା କରୁଛି । ଏହି କ୍ରମରେ ପାକିସ୍ତାନର ଅହଙ୍କାର ଚୁର୍ଣ୍ଣ କରିବା ପାଇଁ ଭାରତ ରଣବୀର କେନାଲର ଦୋହରୀକରଣ କରିବା ଉପରେ ବିଚାର କରୁଛି । 

ଏହା ମାଧ୍ୟମରେ ପାକିସ୍ତାନର ପଞ୍ଜାବକୁ ଯାଉଥିବା ଚେନାବ ନଦୀର ବହୁ ପରିମାଣର ପାଣି ଭାରତରେ ରୋକି ଦିଆଯିବ। ବର୍ତ୍ତମାନ ଚେନାବ ଜଳ ରଣବୀର କେନାଲ ମାଧ୍ୟମରେ ଜମ୍ମୁର ବିଭିନ୍ନ ଅଞ୍ଚଳକୁ ପ୍ରବାହିତ କରାଯାଉଛି। ଏହି କାରଣରୁ ଆମେ ଆମର ସମ୍ପୂର୍ଣ୍ଣ ଜଳ ନେଇପାରୁନାହୁଁ। କେନାଲକୁ ଦ୍ୱିଗୁଣିତ କରିବା ଦ୍ୱାରା, ଭାରତ ୧୫୦ ଘନ ମିଟର ପାଣିକୁ ଅନ୍ୟତ୍ର ନେଇପାରିବ। କାଶ୍ମୀରରେ ୨୬ ଜଣ ସାଧାରଣ ନାଗରିକଙ୍କ ହତ୍ୟା ପରେ ଭାରତ ସିନ୍ଧୁ ଜଳ ଚୁକ୍ତିନାମାକୁ ସ୍ଥଗିତ ରଖିଥିଲା।

ବର୍ତ୍ତମାନ ରଣବୀର କେନାଲ ପ୍ରାୟ ୧୨୦ କିମି ଯାଏ ଲମ୍ବିଛି । ଯଦି ଏହାକୁ ବିସ୍ତାର କରାଯାଏ, ତେବେ ଭାରତ ପ୍ରତି ସେକେଣ୍ଡରେ ଚେନାବ ନଦୀରୁ ୧୫୦ ଘନ ମିଟର ପାଣି ପ୍ରବାହିତ କରିପାରିବ, କିନ୍ତୁ ବର୍ତ୍ତମାନ ଏହାର ପରିମାଣ କେବଳ ୪୦ ଘନ ମିଟର ରହିଛି ।  

ପାକିସ୍ତାନର ପଞ୍ଜାବ ଅଞ୍ଚଳରେ କୃଷି ଏବଂ ପାନୀୟ ଜଳ ପାଇଁ ଚେନାବ ନଦୀର ଜଳ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଯଦି ଭାରତ ଏହି ପାଣିକୁ ଅନ୍ୟତ୍ର ଡାଇଭର୍ଟ କରିବ, ତେବେ ଏହା ପାକିସ୍ତାନର କୃଷି କ୍ଷେତ୍ର ଉପରେ ଗୁରୁତର ପ୍ରଭାବ ପକାଇପାରେ। 

ଭାରତ ଏବଂ ପାକିସ୍ତାନ ଯୁଦ୍ଧବିରତି ପାଇଁ ରାଜି ହୋଇଥିଲେ ମଧ୍ୟ, ସିନ୍ଧୁ ଜଳ ଚୁକ୍ତିନାମା ପୁନଃସ୍ଥାପିତ ହୋଇନାହିଁ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଚେନାବ, ଝେଲମ ଏବଂ ସିନ୍ଧୁ ନଦୀ ପ୍ରକଳ୍ପଗୁଡ଼ିକର କାର‌୍ୟ୍ୟ ତ୍ୱରାନ୍ୱିତ କରିବା ପାଇଁ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ଏଥିମଧ୍ୟରୁ ଗୋଟିଏ ପ୍ରମୁଖ ଯୋଜନା ହେଉଛି ରଣବୀର କେନାଲର ଦୋହରୀକରଣ।

ପାକିସ୍ତାନର ପ୍ରାୟ ୮୦ ପ୍ରତିଶତ କୃଷି ସିନ୍ଧୁ ନଦୀ ଉପରେ ନିର୍ଭର କରେ ଏବଂ ପ୍ରାୟ ସମସ୍ତ ଜଳବିଦ୍ୟୁତ ପ୍ରକଳ୍ପ ମଧ୍ୟ ଏହା ଉପରେ ଅବସ୍ଥିତ। ଯଦି ଭାରତ ଡ୍ୟାମ୍, କେନାଲ କିମ୍ବା ଅନ୍ୟାନ୍ୟ ଭିତ୍ତିଭୂମି ନିର୍ମାଣ କରି ପାଣି ଅଟକାଇବା ଆରମ୍ଭ କରେ, ତେବେ କିଭଳି ଭାବେ ପାକିସ୍ତାନରେ  ଜଳସଙ୍କଟ ସହ  ହାହାକାର ପରିସ୍ଥିତି ସୃଷ୍ଟି ହେବ ତାହା ଇସଲାମାବାଦ ବେଶ ଭଲ ଭାବେ ଜାଣିଛି ।