ନୂଆଦିଲ୍ଲୀ: ମଧ୍ୟପ୍ରାଚ୍ୟରେ ଜାରି ସଂଘର୍ଷକୁ ନେଇ ସର୍ବଦଳୀୟ ବୈଠକ ଡକାଇବା ପରେ ଏବେ କେନ୍ଦ୍ର ସରକାର ସବୁ ରାଜ୍ୟ ସହ ଆଲୋଚନା କରିବେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆସନ୍ତାକାଲି ଅର୍ଥାତ ଶୁକ୍ରବାର ରାଜ୍ୟ ମୁଖ୍ୟମନ୍ତ୍ରୀଙ୍କ ସହିତ ଏକ ଉଚ୍ଚସ୍ତରୀୟ ବୈଠକ କରିବେ। ଏହି ବୈଠକ ସନ୍ଧ୍ୟା ୬ଟା ୩୦ରେ ଭିଡିଓ କନଫରେନ୍ସିଂ ମାଧ୍ୟମରେ ଅନୁଷ୍ଠିତ ହେବ। ନିର୍ବାଚନ ହେବାକୁ ଥିବା ରାଜ୍ୟର ମୁଖ୍ୟମନ୍ତ୍ରୀମାନେ ଏହି ବୈଠକରେ ଅଂଶଗ୍ରହଣ କରିବେ ନାହିଁ। ବୈଠକ ସମୟରେ ମଧ୍ୟପ୍ରାଚ୍ୟର ପରିସ୍ଥିତି ଏବଂ ଆଗାମୀ ଆହ୍ଵାନ ପ୍ରସଙ୍ଗ ଉପରେ ଆଲୋଚନା କରାଯିବ। 

ନିର୍ବାଚନ ଆଚରଣ ବିଧି ଯୋଗୁଁ ନିର୍ବାଚନ ହେବାକୁ ଥିବା ରାଜ୍ୟର ମୁଖ୍ୟମନ୍ତ୍ରୀମାନେ ଏହି ଆଲୋଚନାରେ ଅଂଶଗ୍ରହଣ କରିପାରିବେ ନାହିଁ। ବୈଠକରେ ପ୍ରଧାନମନ୍ତ୍ରୀ ମୋଦୀ ରାଜ୍ୟଗୁଡ଼ିକର ପ୍ରସ୍ତୁତି ଏବଂ ଯୋଜନା ବିଷୟରେ ସମୀକ୍ଷା କରିବେ। ନିର୍ବାଚନ ହେବାକୁ ଥିବା ରାଜ୍ୟଗୁଡ଼ିକର ମୁଖ୍ୟ ସଚିବମାନଙ୍କ ପାଇଁ ଏକ ଅଲଗା ବୈଠକ ଅନୁଷ୍ଠିତ ହେବ। ଏହି ବୈଠକ କ୍ୟାବିନେଟ ସଚିବାଳୟ ମାଧ୍ୟମରେ ଆୟୋଜିତ ହେବ।

ମଧ୍ୟପ୍ରାଚ୍ୟ ସଙ୍କଟ: ଆସନ୍ତାକାଲି ମୁଖ୍ୟମନ୍ତ୍ରୀଙ୍କ ସହିତ ପ୍ରଧାନମନ୍ତ୍ରୀଙ୍କ ଆଲୋଚନା

ମଧ୍ୟପ୍ରାଚ୍ୟ ସଙ୍କଟକୁ ଦୃଷ୍ଟିରେ ରଖି, ପ୍ରଧାନମନ୍ତ୍ରୀ ମୋଦୀ ପଶ୍ଚିମ ଏସିଆର ନେତାମାନଙ୍କ ସହିତ ଲଗାତାର ଯୋଗାଯୋଗରେ ଅଛନ୍ତି। ପ୍ରଧାନମନ୍ତ୍ରୀ ମୋଦୀ ଏହି ପ୍ରସଙ୍ଗରେ ସଂସଦର ଉଭୟ ଗୃହକୁ ମଧ୍ୟ ସମ୍ବୋଧିତ କରିଥିଲେ। ସେ କହିଥିଲେ ପଶ୍ଚିମ ଏସିଆର ପରିସ୍ଥିତି ଅତ୍ୟନ୍ତ ଚିନ୍ତାଜନକ ଏବଂ ସଙ୍କଟ ତିନି ସପ୍ତାହରୁ ଅଧିକ ସମୟ ଧରି ଜାରି ରହିଛି।  କେବଳ ଭାରତ ନୁହେଁ ବରଂ ସମଗ୍ର ବିଶ୍ୱ ଏହି ସଙ୍କଟର ସମ୍ମୁଖୀନ ହୋଇଛି। 

ସମଗ୍ର ବିଶ୍ଵ ସଙ୍କଟରେ 

ମଧ୍ୟପ୍ରାଚ୍ୟର ସଂଘର୍ଷରେ ବିଶ୍ୱ ଅର୍ଥନୀତି ଏବଂ ଲୋକଙ୍କ ଜୀବନକୁ ପ୍ରଭାବିତ କରିଛି। ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଏହି ଯୁଦ୍ଧ ଭାରତ ପାଇଁ ତିନିଟି ସ୍ତରରେ ଅଭୂତପୂର୍ବ ଚ୍ୟାଲେଞ୍ଜ ଆଣିଛି: ଅର୍ଥନୈତିକ, ଜାତୀୟ ସୁରକ୍ଷା ଏବଂ ମାନବିକ। ଅଶୋଧିତ ତୈଳ ଏବଂ ଗ୍ୟାସର ଆବଶ୍ୟକତା ସହିତ, ପ୍ରାୟ ଏକ କୋଟି  ଭାରତୀୟ ଉପସାଗରୀୟ ଦେଶଗୁଡ଼ିକରେ ବାସବାସ ସହ କାମ କରୁଛନ୍ତି। ସେମାନଙ୍କର ସୁରକ୍ଷା ଭାରତ ସରକାରଙ୍କ ପାଇଁ ସର୍ବୋଚ୍ଚ ପ୍ରାଥମିକତା।

ଶାନ୍ତି ଏବଂ ଆଲୋଚନା  ଏକମାତ୍ର ଉପାୟ

ସେ କହିଛନ୍ତି ଭାରତୀୟ ସଂସଦରୁ ସମଗ୍ର ବିଶ୍ଵକୁ ଶାନ୍ତି ପାଇଁ ଏକଜୁଟ ଏବଂ ସର୍ବସମ୍ମତର ବାର୍ତ୍ତା ଦେଉଛୁ। ପ୍ରଧାନମନ୍ତ୍ରୀ ଶାନ୍ତି ଏବଂ ଆଲୋଚନାକୁ ଏକମାତ୍ର ଉପାୟ ଭାବରେ ଘୋଷଣା କରିଛନ୍ତି। ସଙ୍କଟର ସମାଧାନ ପାଇଁ ପ୍ରଧାନମନ୍ତ୍ରୀ ମୋଦୀ ଇସ୍ରାଏଲ, ଇରାନ, ଆମେରିକା ଏବଂ ଅନ୍ୟାନ୍ୟ ଉପସାଗରୀୟ ଦେଶଗୁଡ଼ିକର ନେତାମାନଙ୍କ ସହିତ ନିରନ୍ତର ଯୋଗାଯୋଗରେ ଅଛନ୍ତି।