ନୂଆଦିଲ୍ଲୀ: ନିଟ୍ ପୁନଃ-ପରୀକ୍ଷା ପାଇଁ ନ୍ୟାସନାଲ ଟେଷ୍ଟିଂ ଏଜେନ୍ସି (NTA) ପକ୍ଷରୁ ଏକ ଗୁରୁତ୍ୱପୂର୍ଣ୍ଣ ଆଡଭାଇଜରୀ ଜାରି କରାଯାଇଛି। ଆସନ୍ତା ଜୁନ୍ ୨୧ ତାରିଖ ରବିବାର ହେବାକୁ ଥିବା ନିଟ୍ ପୁନଃ-ପରୀକ୍ଷା ପାଇଁ ଯୋଗ୍ୟ ପରୀକ୍ଷାର୍ଥୀମାନଙ୍କୁ ଆଡମିଟ୍ କାର୍ଡ ଡାଉନଲୋଡ୍ କରିବା ପାଇଁ ଏଜେନ୍ସି ପକ୍ଷରୁ ଆଲର୍ଟ ପଠାଯାଉଛି। ଛାତ୍ରଛାତ୍ରୀମାନଙ୍କ ସୁବିଧା ପାଇଁ NTA ଏବେ  SMS, ଇମେଲ୍ ଏବଂ ହ୍ୱାଟ୍ସଆପ୍ ମାଧ୍ୟମରେ କ୍ରମାଗତ ଭାବେ ରିମାଇଣ୍ଡର ପଠାଉଛି।

ଏହା ସହିତ ସୋସିଆଲ ମିଡିଆରେ ଚାଲିଥିବା ବିଭିନ୍ନ ଫେକ୍ ବାର୍ତ୍ତା ଏବଂ ଗୁଜବରୁ ଦୂରେଇ ରହିବାକୁ NTA ପରୀକ୍ଷାର୍ଥୀଙ୍କୁ କଡ଼ା ଚେତାବନୀ ଦେଇଛି। ଛାତ୍ରଛାତ୍ରୀମାନେ ଯେମିତି କୌଣସି ପ୍ରକାର ଠକାମିର ଶିକାର ନହେବେ, ସେଥିପାଇଁ NTA ସେମାନଙ୍କର ଅଫିସିଆଲ୍ ଯୋଗାଯୋଗ ମାଧ୍ୟମ ବିଷୟରେ ସ୍ପଷ୍ଟ ସୂଚନା ଦେଇଛି।

SMS ଆଲର୍ଟ: କେବଳ ଅଫିସିଆଲ୍ SMS ID 'NICPEP' ରୁ ହିଁ ଆଡମିଟ୍ କାର୍ଡ ଡାଉନଲୋଡ୍ କରିବାର ମେସେଜ୍ ଆସିବ।

ଇମେଲ୍: ଯଦି କୌଣସି ଇମେଲ୍ ଆସେ, ତେବେ ତାହା କେବଳ no-reply.neet.nta@nic.in ID ରୁ ହିଁ ଆସିବ।

ଅଫିସିଆଲ୍ ୱେବସାଇଟ୍: ଆଡମିଟ୍ କାର୍ଡ ପାଇଁ କେବଳ neet.nta.nic.in ୱେବସାଇଟ୍ ଉପରେ ହିଁ ଭରସା କରନ୍ତୁ।

ସିଧାସଳଖ WhatsApp ରେ ମିଳିବ ତଥ୍ୟ

ପରୀକ୍ଷା ସମ୍ବନ୍ଧୀୟ ସମସ୍ତ ଜରୁରୀ ସୂଚନା ଏବଂ ଡିଟେଲ୍ସ ଏବେ ଛାତ୍ରଛାତ୍ରୀଙ୍କୁ WhatsApp ମାଧ୍ୟମରେ ମଧ୍ୟ ସେୟାର କରାଯାଉଛି। ତେବେ NTA କହିଛି ଯେ ମେସେଜ୍ ଆସିବା ବେଳେ ପ୍ରେରକଙ୍କ ନାଁ ସହ 'ବ୍ଲୁ ଭେରିଫାଇଡ୍ ଟିକ' ଏବଂ 'National Testing Agency' ଲେଖା ହୋଇଥିବା ନିଶ୍ଚିତ ଭାବେ ଯାଞ୍ଚ କରିନିଅନ୍ତୁ। ଏହି ହ୍ୱାଟ୍ସଆପ୍ ସେବା କେବଳ ସୂଚନା ଦେବା ପାଇଁ ଉଦ୍ଦିଷ୍ଟ। ଏହା କେବେ ବି ଆପଣଙ୍କୁ ଓଟିପି  କିମ୍ବା କୌଣସି ବ୍ୟକ୍ତିଗତ ତଥ୍ୟ ମାଗିବ ନାହିଁ।

NTA କେବେ ବି ଟଙ୍କା ମାଗେ ନାହିଁ

ଏଜେନ୍ସି ନିଜ ଆଡଭାଇଜରୀରେ ସ୍ପଷ୍ଟ ଭାବେ କହିଛି ଯେ, NTA କେବେ ବି କୌଣସି ପରୀକ୍ଷାର୍ଥୀଙ୍କୁ ଆଡମିଟ୍ କାର୍ଡ ପାଇଁ କୌଣସି ଅଲଗା ପେମେଣ୍ଟ/ଟଙ୍କା ମାଗେନାହିଁ କିମ୍ବା କୌଣସି ଅଜଣା ଲିଙ୍କ୍ ଜରିଆରେ ଆଡମିଟ୍ କାର୍ଡ ସେୟାର କରେନାହିଁ। ଯଦି ଆପଣଙ୍କ ପାଖକୁ ଏଭଳି କୌଣସି ସନ୍ଦେହଜନକ ଲିଙ୍କ୍ କିମ୍ବା ଟଙ୍କା ମାଗିବାର ମେସେଜ୍ ଆସେ, ତେବେ ସେଥିରେ କ୍ଲିକ୍ ନକରି ତୁରନ୍ତ ତାହାର ରିପୋର୍ଟ କରନ୍ତୁ।