ନୂଆଦିଲ୍ଲୀ: ଇସ୍ରୋର ୧୦୦ତମ ମିଶନକୁ ଝଟକା । ଏନଭିଏସ-୦୨ ଉପଗ୍ରହ ସଠିକ୍ କକ୍ଷପଥରେ ସ୍ଥାପନ ହୋଇ ନପାରିବାରୁ ମିଶନ ବିଫଳ ହୋଇଛି। ସାଟେଲାଇଟ୍ ଉତକ୍ଷେପଣ ପରେ ଯାନ୍ତ୍ରିକ ତ୍ରୁଟି ଦେଖାଦେଇଥିଲା । ଭାରତର ନିଜସ୍ୱ ମହାକାଶ-ଭିତ୍ତିକ ନାଭିଗେସନ୍ ସିଷ୍ଟମ ପାଇଁ ଏହି ସାଟେଲାଇଟକୁ ଉଦକ୍ଷେପଣ କରିଥିଲା । 

ଇସ୍ରୋର ୱେବସାଇଟ୍ ଅନୁଯାୟୀ, ମହାକାଶ ଯାନରେ ସ୍ଥାପିତ ଥ୍ରଷ୍ଟରଗୁଡ଼ିକ କାମ ନକରିବାରୁ ଏନଭିଏସ-୦୨ ଉପଗ୍ରହକୁ ସଠିକ୍ କକ୍ଷପଥରେ ସ୍ଥାପନ କରାଯାଇପାରିଲା ନାହିଁ। 

ରବିବାର ଇସ୍ରୋ ଏହାର ୱେବସାଇଟରେ କହିଛି ଯେ ନାଭିଗେସନ ସାଟେଲାଇଟ କକ୍ଷପଥରେ ସ୍ଥାପିତ ହୋଇପାରିଲା ନାହିଁ କାରଣ ଏହାର ଥ୍ରଷ୍ଟର୍ସକୁ ଫାୟାର କରିବା ପାଇଁ ଅକ୍ସିଡାଇଜରକୁ ଗ୍ରହଣ କରୁଥିବା ଭାଲଭ ଖୋଲି ନଥିଲା। ଏହି ଉପଗ୍ରହଟି ଏକ ଏଲିପ୍ଟିକାଲ ଜିଓସିଙ୍କ୍ରୋନାସ ଟ୍ରାନ୍ସଫର ଅରବିଟ (GTO) ରେ ପୃଥିବୀ ଚାରିପାଖରେ ଘୂରି ବୁଲୁଛି ଯାହା ନାଭିଗେସନ ସିଷ୍ଟମ ପାଇଁ ଉପଯୁକ୍ତ ନୁହେଁ। ତଥାପି ଉପଗ୍ରହଟି ସମ୍ପୂର୍ଣ୍ଣ ଠିକ ଅଛି। 

ଇସ୍ରୋ କହିଛି ଯେ ଏକ ଅଣ୍ଡାକାର କକ୍ଷପଥରେ ନାଭିଗେସନ ପାଇଁ ଉପଗ୍ରହକୁ ବ୍ୟବହାର କରିବା ପାଇଁ ବିକଳ୍ପ ମିଶନ ରଣନୀତି ଉପରେ କାମ କରାଯାଉଛି। GSLV ରକେଟ ଦ୍ୱାରା ଉପଗ୍ରହକୁ GTOରେ ସ୍ଥାପନ କରିବା ପରେ, ଉପଗ୍ରହରେ ଥିବା ସୌର ପ୍ୟାନେଲଗୁଡ଼ିକୁ ସଫଳତାର ସହ ନିୟୋଜିତ କରାଯାଇଛି।