ସଙ୍ଗରୁର: କେନ୍ଦ୍ର କୃଷିମନ୍ତ୍ରୀ ଶିବରାଜ ସିଂହ ଚୌହାନ ଶନିବାର ଚଣ୍ଡିଗଡ଼ରେ ସଂଯୁକ୍ତ କୃଷକ ମୋର୍ଚ୍ଚା (ଅଣ-ରାଜନୈତିକ)ର ନେତାମାନଙ୍କୁ ଭେଟି ଗୁରୁତ୍ବପୂର୍ଣ୍ଣ ପ୍ରସଙ୍ଗରେ ଆଲୋଚନା କରିବେ। ୮୮ ଦିନ ଧରି ଖାନୌରୀରେ ଅନଶନରେ ବସିଥିବା ଜଗଜିତ୍ ସିଂହ ଦଲେୱାଲ ଏବଂ ଅନ୍ୟ ନେତାମାନେ ଏହି ବୈଠକରେ ଉପସ୍ଥିତ ରହିବେ। 

ସୂଚନାଯୋଗ୍ୟ, ପୂର୍ବରୁ ଫେବ୍ରୁଆରି ୧୪ ତାରିଖରେ ଚଣ୍ଡିଗଡ଼ରେ ପଞ୍ଚମ ପର୍ଯ୍ୟାୟ ବୈଠକରେ କେନ୍ଦ୍ରମନ୍ତ୍ରୀ ଯୋଗ ଦେବାର ଥିଲା। କିନ୍ତୁ ଅନିବାର୍ଯ୍ୟ କାରଣରୁ ଏହି ବୈଠକରେ କୃଷିମନ୍ତ୍ରୀ ଯୋଗଦେଇ ପାରିନଥିଲେ। ଗତବର୍ଷ ଦିଲ୍ଲୀ ଅଭିମୁଖେ କୃଷକ ପଦଯାତ୍ରା ବେଳେ ଜୀବନ ହରାଇଥିବା ଶୁଭକର୍ଣ୍ଣଙ୍କ ବାର୍ଷିକୀ ଅବସରରେ ଶୁକ୍ରବାର କୃଷକ ନେତାମାନେ ଶମ୍ଭୁ ଏବଂ ଖାନୁରୀରେ ଶକ୍ତି ପ୍ରଦର୍ଶନ କରିଥିଲେ। ସନ୍ଧ୍ୟାରେ ଏକ କ୍ୟାଣ୍ଡେଲ ଶୋଭାଯାତ୍ରା ଅନୁଷ୍ଠିତ ହୋଇଥିଲା। ଖାନୁରୀରେ ଦଲେୱାଲ ଶୁଭକର୍ଣ୍ଣଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରି କହିଛନ୍ତି ଯେ ବର୍ଷେ ବିତିଯାଇଥିଲେ ମଧ୍ୟ ତାଙ୍କ ମୃତ୍ୟୁ ପାଇଁ ଦାୟୀ ପୁଲିସ ଅଧିକାରୀଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ। 

ଶମ୍ଭୁରେ ଶ୍ରଦ୍ଧାଞ୍ଜଳି କାର୍ଯ୍ୟକ୍ରମ ପରେ କୃଷକ ନେତା ସରୱାନ ସିଂହ ପାନ୍ଧେର କହିଛନ୍ତି ଯେ ଯଦି ଶନିବାର କେନ୍ଦ୍ର ସରକାରଙ୍କ ସହ ବୈଠକରୁ କୌଣସି ସୁଫଳ ନ ମିଳେ ତେବେ ଆମେ ଫେବ୍ରୁଆରି ୨୫ ରେ ଶମ୍ଭୁରୁ ହରିୟାଣା ଅଭିମୁଖେ ପଦଯାତ୍ରା କରିବୁ। ଗତ ସପ୍ତାହରେ ଚଣ୍ଡିଗଡ଼ରେ ମିଳିତ କୃଷକ ମୋର୍ଚ୍ଚା ଏବଂ କେନ୍ଦ୍ର ସରକାରଙ୍କ ମଧ୍ୟରେ ହୋଇଥିବା ପଞ୍ଚମ ପର୍ଯ୍ୟାୟ ଆଲୋଚନା ମଧ୍ୟ ବିନା ଫଳାଫଳରେ ଶେଷ ହୋଇଥିଲା, କାରଣ ସେମାନେ ସମସ୍ତ ଫସଲପାଇଁ ସର୍ବନିମ୍ନ ସହାୟକ ମୂଲ୍ୟର ଗ୍ୟାରେଣ୍ଟି ଉପରେ ଗୁରୁତ୍ୱାରୋପ କରିଥିଲେ। 

କେନ୍ଦ୍ରମନ୍ତ୍ରୀ ପ୍ରହ୍ଲାଦ ଯୋଶୀ କହିଛନ୍ତି ଯେ ଗତ ସପ୍ତାହର ବୈଠକ ପରେ ଗଣମାଧ୍ୟମ ସହ କଥାବାର୍ତ୍ତା ବେଳେ ସୌହାର୍ଦ୍ଦ୍ୟପୂର୍ଣ୍ଣ ବାତାବରଣରେ ବୈଠକ ଅନୁଷ୍ଠିତ ହୋଇଥିଲା। ଅନ୍ୟପକ୍ଷରେ ମିଳିତ କୃଷକ ମୋର୍ଚ୍ଚା ନେତା ସରୱାନ ସିଂହ ପାନ୍ଧେର କହିଛନ୍ତି ଯେ କେନ୍ଦ୍ର ସରକାର ଦାବି କରୁଛନ୍ତି ଯେ ଆମେ ଗତ ୧୦ ବର୍ଷ ମଧ୍ୟରେ ଏମଏସପିରେ କୃଷକଙ୍କ ଫସଲ କିଣିଛୁ। ୨୦୦୪ରୁ ୨୦୧୪ ମଧ୍ୟରେ ଫସଲ ମୂଲ୍ୟ ଶହେ ପ୍ରତିଶତ ପର୍ଯ୍ୟନ୍ତ ବୃଦ୍ଧି ପାଇଥିବା ବେଳେ ମୋଦୀ ସରକାରଙ୍କ ୧୦ ବର୍ଷ ମଧ୍ୟରେ ଏହି ସମାନ ଫସଲର ମୂଲ୍ୟ ୫୭ ପ୍ରତିଶତ ବୃଦ୍ଧି ପାଇଥିବା ବେଳେ ମୁଦ୍ରାସ୍ଫୀତି ୫୯ ପ୍ରତିଶତ ବୃଦ୍ଧି ପାଇଛି।

ଅଧିକ ପଢ଼ନ୍ତୁ: କିଟ୍ କାଣ୍ଡରେ ରାଜନୀତି ସରଗରମ, କଂଗ୍ରେସ ଆଣିଲା ମୁଲତବୀ ପ୍ରସ୍ତାବ