ନୂଆଦିଲ୍ଲୀ: ଦିଲ୍ଲୀର ନେହେରୁ ପ୍ଲେସରେ ଥିବା ପୁଲିସ ଷ୍ଟୋରହାଉସରେ ଗୁରୁବାର ଅପରାହ୍ନରେ ଅଗ୍ନିକାଣ୍ଡ ଘଟି ଟ୍ରାଫିକ ପୁଲିସ ଦ୍ୱାରା ଜବତ କରାଯାଇଥିବା ୪୦୦ରୁ ଅଧିକ ଗାଡି ପୋଡ଼ି ପାଉଁଶ ହୋଇଯାଇଛି। ଘଟଣା ସମ୍ପର୍କରେ ଏକ ଏଫଆଇଆର ପଞ୍ଜିକୃତ ହୋଇଛି ବୋଲି ଅଧିକାରୀ କହିଛନ୍ତି। ଯାହା ଦ୍ଵାରା ଏହା ପଛରେ କୌଣସି ଷଡ଼ଯନ୍ତ୍ର ଅଛି କି ନାହିଁ ତାହା ଜଣାପଡିପାରିବ।

ଦିଲ୍ଲୀ ଟ୍ରାଫିକ୍ ପୁଲିସର ଜଣେ ଅଧିକାରୀଙ୍କ ଅନୁଯାୟୀ, ଦିଲ୍ଲୀ ଅଗ୍ନିଶମ ସେବାକୁ ଦିନ ପ୍ରାୟ ୨ଟା ବେଳେ ନେହେରୁ ପ୍ଲେସରେ ଥିବା ପୋଲିସ ଷ୍ଟୋରହାଉସରେ ନିଆଁ ଲାଗିବା ବିଷୟରେ ଏକ ଫୋନ୍ ଆସିଥିଲା। ପ୍ରତ୍ୟକ୍ଷଦର୍ଶୀଙ୍କ ଅନୁସାରେ, ଦୂରରୁ ଘନ ଧୂଆଁର ବାଦଲ ଦେଖାଯାଉଥିଲା ଏବଂ ନିଆଁ ଶୀଘ୍ର ଗାଡ଼ିଗୁଡ଼ିକୁ ଗ୍ରାସ କରିଥିଲା।

ପ୍ରାରମ୍ଭରେ, ଦିଲ୍ଲୀ ଅଗ୍ନିଶମ ସେବା କହିଥିଲା ଯେ ଷ୍ଟୋରହାଉସର ଖୋଲା ସ୍ଥାନରେ ପାର୍କିଂ ହୋଇଥିବା ଦୁଇ ଚକିଆ, ତିନି ଚକିଆ ଏବଂ ଚାରି ଚକିଆ ସମେତ ପ୍ରାୟ ୫୦ଟି ଗାଡ଼ି ନିଆଁରେ ପୋଡ଼ି ଯାଇଛି। ଦିଲ୍ଲୀ ପୁଲିସ ଏକ ବିବୃତ୍ତି ଜାରି କରି କହିଛି ଯେ ଅଗ୍ନିକାଣ୍ଡରେ ୪୦୦ରୁ ଅଧିକ ଗାଡ଼ି ପୋଡ଼ି ଯାଇଛି। "ଘଟଣା ସମୟରେ, ଜବତ ହୋଇଥିବା ୨,୬୬୭ଟି ଯାନବାହନ ୟାର୍ଡରେ ପାର୍କିଂ କରାଯାଇଥିଲା," ବିବୃତ୍ତିରେ କୁହାଯାଇଛି। ପ୍ରାୟ ୪୦୦ ଗାଡ଼ି ପୋଡ଼ି ପାଉଁଶ ହୋଇଗଲା। ଅଗ୍ନିକାଣ୍ଡର ପ୍ରକୃତ କାରଣ ଏପର୍ଯ୍ୟନ୍ତ ଜଣାପଡ଼ି ନାହିଁ।”

ଦିଲ୍ଲୀ ପୁଲିସର କହିବା ଅନୁସାରେ, ଏହି ଷ୍ଟୋରହାଉସଟି ଦିଲ୍ଲୀ ଟ୍ରାଫିକ ପୁଲିସର। ଟ୍ରାଫିକ୍ ପୋଲିସ ଦ୍ୱାରା ଜବତ ହୋଇଥିବା ବହୁ ସଂଖ୍ୟକ ଦୁଇ ଚକିଆ ଏବଂ ଚାରି ଚକିଆ ଯାନ ଏଥିରେ ରଖାଯାଇଥିଲା। ଦିଲ୍ଲୀ ପୁଲିସର ଭଣ୍ଡାର ଘରେ ନିଆଁ ଲାଗିବା ମାତ୍ରେ ଆକାଶରେ ଧୂଆଁର ବାଦଲ ବ୍ୟାପିଗଲା। ନିଆଁ ଏତେ ଭୟଙ୍କର ଥିଲା ଯେ ଏହା ଶୀଘ୍ର ଅନେକ ଗାଡ଼ିକୁ ଗ୍ରାସ କରିଦେଲା।

ପୋଡ଼ି ଯାଇଥିବା ଗାଡ଼ି କ୍ଷେତ୍ରରେ ଦିଲ୍ଲୀ ପୁଲିସ କୌଣସି କ୍ଷତିପୂରଣ ନଦେବାର ବ୍ୟବସ୍ଥା ଅଛି। କେବଳ ବୀମା ରାଶି ଦାବି କରାଯାଇପାରିବ। ସେ କହିଛନ୍ତି ଯେ ଅଗ୍ନିକାଣ୍ଡର କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।

ଅଧିକ ପଢ଼ନ୍ତୁ: ବଲିଉଡ୍‌ ଅଭିନେତା ମନୋଜ କୁମାରଙ୍କ ପରଲୋକ