ନୂଆଦିଲ୍ଲୀ: ସୋମବାର ୟୁଏଇ ରାଷ୍ଟ୍ରପତି ଶେଖ ମହମ୍ମଦ ବିନ୍ ଜାଏଦ ଅଲ୍ ନାହୟାନ ଭାରତ ଗସ୍ତରେ ଆସିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସମସ୍ତ ପ୍ରଟୋକଲ ଭାଙ୍ଗି ତାଙ୍କୁ ଦିଲ୍ଲୀ ବିମାନବନ୍ଦରରେ ସ୍ୱାଗତ କରିଥିଲେ। ସ୍ଵଳ୍ପ ଗସ୍ତ ସମୟରେ, ଦୁଇ ଦେଶ ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା କରିଛନ୍ତି।

ବୈଦେଶିକ ସଚିବ ବିକ୍ରମ ମିଶ୍ରି କହିଛନ୍ତି  ଯେ ଭାରତ ଏବଂ ୟୁଏଇ ପଶ୍ଚିମ ଏସିଆର ବର୍ତ୍ତମାନର ପରିସ୍ଥିତି ଉପରେ ବିସ୍ତୃତ ଆଲୋଚନା କରିଛନ୍ତି। ଗସ୍ତ ସମୟରେ, ଉଭୟ ଦେଶ ସୀମାପାର ଆତଙ୍କବାଦକୁ ଦୃଢ଼ ଭାବରେ ନିନ୍ଦା କରିଛନ୍ତି ଏବଂ ଏହା ବିରୁଦ୍ଧରେ ସେମାନଙ୍କର ଦୃଢ ଆଭିମୁଖ୍ୟ ଦୋହରାଇଥିଲେ।

BRICS ସଭାପତିତ୍ୱ ପାଇଁ ସମର୍ଥନ

ବୈଦେଶିକ ସଚିବ ୟୁଏଇ ରାଷ୍ଟ୍ରପତିଙ୍କ ଭାରତ ଗସ୍ତକୁ ଅତ୍ୟନ୍ତ ବାସ୍ତବ ଏବଂ ଠୋସ୍ ବୋଲି ବର୍ଣ୍ଣନା କରିଛନ୍ତି। ଯଦିଓ ଏହି ଗସ୍ତ ମାତ୍ର ତିନି ଘଣ୍ଟା ଧରି ଚାଲିଥିଲା। ମିଶ୍ରିଙ୍କ ଅନୁଯାୟୀ, ସ୍ଵଳ୍ପ ଅବଧି ସତ୍ତ୍ଵେ ଏହି ଗସ୍ତରେ ରଣନୈତିକ, ଆଞ୍ଚଳିକ ଏବଂ ବିଶ୍ୱସ୍ତରୀୟ ପ୍ରସଙ୍ଗ ଉପରେ ଗଭୀର ଆଲୋଚନା ହୋଇଛି। ସେ ଏହା ମଧ୍ୟ କହିଛନ୍ତି ଯେ ୟୁଏଇ ଭାରତର ବ୍ରିକ୍ସ ସଭାପତିତ୍ଵକୁ ସମର୍ଥନ କରିଛି।

ବ୍ୟାପକ ପଦକ୍ଷେପ

ବୈଦେଶିକ ସଚିବ ସ୍ପଷ୍ଟ କରିଛନ୍ତି ଯେ ଭାରତ-ୟୁଏଇ ପ୍ରତିରକ୍ଷା ସହଯୋଗ ଉପରେ ବ୍ୟାପକ ଆଲୋଚନା କରିଛନ୍ତି। ମିଶ୍ରିଙ୍କ ଅନୁଯାୟୀ, ଦୁଇ ଦେଶ ମଧ୍ୟରେ ପ୍ରତିରକ୍ଷା ସହଯୋଗ ଆଞ୍ଚଳିକ ସଂଘର୍ଷରେ ହସ୍ତକ୍ଷେପ କରିବା ପରିବର୍ତ୍ତେ ଦ୍ୱିପାକ୍ଷିକ ରଣନୈତିକ ସହଭାଗୀତାକୁ ମଜବୁତ କରିବା ଉପରେ କେନ୍ଦ୍ରିତ ରହିଛି। 

ଭାରତ-ୟୁଏଇ ପ୍ରତିରକ୍ଷା ସହଯୋଗ

ଏହା ବ୍ୟତୀତ, ଭାରତ ଏବଂ ସଂଯୁକ୍ତ ଆରବ ଏମିରେଟ୍ସ ପ୍ରତିରକ୍ଷା କ୍ଷେତ୍ରରେ ଏକ ଢାଞ୍ଚା ଚୁକ୍ତିନାମାକୁ ଚୂଡ଼ାନ୍ତ ରୂପ ଦେବାକୁ ରାଜି ହୋଇଛନ୍ତି। ବୈଦେଶିକ ସଚିବ କହିଛନ୍ତି ଯେ ଏହି ଚୁକ୍ତିନାମା ଭାରତ-ୟୁଏଇ ରଣନୈତିକ ସହଭାଗୀତାକୁ ପରିଭାଷିତ କରିବ।

LoI ସ୍ୱାକ୍ଷରିତ

ଏକ ଇଣ୍ଟେଣ୍ଟ ପତ୍ର (LoI) ମଧ୍ୟ ସ୍ଵାକ୍ଷରିତ ହୋଇଛି। ପ୍ରସ୍ତାବିତ ଢାଞ୍ଚା ଚୁକ୍ତିନାମା ପ୍ରତିରକ୍ଷା ସହଯୋଗ, ସଂସ୍ଥାଗତ ଆଲୋଚନା ଏବଂ ଦୀର୍ଘକାଳୀନ ସହଭାଗୀତା ପାଇଁ ଏକ ଆନୁଷ୍ଠାନିକ ଢାଞ୍ଚା ସ୍ଥାପନ କରିବ। ଏହି ପଦକ୍ଷେପ ଦ୍ଵିପାକ୍ଷିକ ପ୍ରତିରକ୍ଷା ସମ୍ପର୍କକୁ ଏକ ନୂତନ ଦିଗଦର୍ଶନ ଦେବ।

ଦ୍ୱିପାକ୍ଷିକ ବାଣିଜ୍ୟ ୧୦୦ ବିଲିୟନ ଡଲାର ଅତିକ୍ରମ

ସେ କହିଛନ୍ତି ଯେ ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ବାଣିଜ୍ୟ ୧୦୦ ବିଲିୟନ ଡଲାର ଅତିକ୍ରମ କରିଛି ଏବଂ ୨୦୩୨ ସୁଦ୍ଧା ଏହାକୁ ଦ୍ୱିଗୁଣିତ କରିବାର କ୍ଷ୍ୟ ରଖିଛି। କୃତ୍ରିମ ବୁଦ୍ଧିମତ୍ତା (AI) କୁ ସହଯୋଗର ଏକ ପ୍ରାଥମିକତା କ୍ଷେତ୍ର ଭାବରେ ଚିହ୍ନଟ କରାଯାଇଛି। ୟୁଏଇ ସହିତ ସହଭାଗୀତାରେ ଭାରତରେ ଏକ ସୁପରକମ୍ପ୍ୟୁଟିଂ କ୍ଲଷ୍ଟର ପ୍ରତିଷ୍ଠା ପାଇଁ ସହଯୋଗ କରିବାକୁ ନିଷ୍ପତ୍ତି ନିଆଯାଇଛି। ସେ ଆହୁରି ମଧ୍ୟ କହିଛନ୍ତି ଯେ ୟୁଏଇ ଭାରତରେ ଡାଟା ସେଣ୍ଟର କ୍ଷମତା ବିସ୍ତାର କରିବାରେ ନିବେଶ କରିବାକୁ ମଧ୍ୟ ବିଚାର କରିବ।