ନୂଆଦିଲ୍ଲୀ: ସୁପ୍ରିମକୋର୍ଟରେ ଶୁକ୍ରବାର ଦିନ  ତିନି ଜଣ ନୂତନ ବିଚାରପତିଙ୍କୁ ମୁଖ୍ୟ ବିଚାରପତି ବି.ଆର. ଗଭାଇ ଶପଥ ପାଠ କରାଇବେ। ରାଷ୍ଟ୍ରପତି ଗୁରୁବାର ଦିନ କର୍ଣ୍ଣାଟକ ହାଇକୋର୍ଟର ମୁଖ୍ୟ ବିଚାରପତି ଏନ.ଭି. ଅଞ୍ଜାରିଆ, ଗୌହାଟି ହାଇକୋର୍ଟର ମୁଖ୍ୟ ବିଚାରପତି ବିଜୟ ବିଷ୍ଣୋଇ ଏବଂ ବମ୍ବେ ହାଇକୋର୍ଟର ବିଚାରପତି ଜଷ୍ଟିସ ଏ.ଏସ. ଚାନ୍ଦୁରକରଙ୍କୁ ସୁପ୍ରିମକୋର୍ଟର ବିଚାରପତି ଭାବରେ ନିଯୁକ୍ତ କରିଛନ୍ତି।

ଆଇନ ମନ୍ତ୍ରୀ ଅର୍ଜୁନ ରାମ ମେଘୱାଲ ଗୁରୁବାର ଦିନ ସେମାନଙ୍କର ନିଯୁକ୍ତି ଘୋଷଣା କରିଛନ୍ତି। ଏହି ବିଚାରପତିମାନେ ଶପଥ ନେବା ମାତ୍ରେ ସୁପ୍ରିମକୋର୍ଟରେ ବିଚାରପତିଙ୍କ ସଂଖ୍ୟା ମୁଖ୍ୟ ବିଚାରପତି ସମେତ ୩୪କୁ ବୃଦ୍ଧି ପାଇବ। ବିଚାରପତିଙ୍କ କୌଣସି ପଦବୀ ଖାଲି ରହିବ ନାହିଁ।

ସୁପ୍ରିମକୋର୍ଟରେ ମଞ୍ଜୁରୀପ୍ରାପ୍ତ ବିଚାରପତିଙ୍କ ସଂଖ୍ୟା ୩୪। କିନ୍ତୁ ଜୁନ୍ ୯ରେ ସୁପ୍ରିମକୋର୍ଟର ବିଚାରପତି ଜଷ୍ଟିସ ବେଲା ଏମ୍. ତ୍ରିବେଦୀ ଅବସର ନେବା ପରେ, ବିଚାରପତିଙ୍କ ଗୋଟିଏ ପଦବୀ ପୁଣି ଖାଲି ହୋଇଯିବ।

ପ୍ରଧାନ ବିଚାରପତି ବି.ଆର. ଗଭାଇଙ୍କ ଅଧ୍ୟକ୍ଷତାରେ ଗଠିତ ପାଞ୍ଚ ଜଣିଆ କଲେଜିୟମ୍ ଗତ ୨୬ ତାରିଖରେ ଅନୁଷ୍ଠିତ ବୈଠକରେ ଜଷ୍ଟିସ୍ ଅଞ୍ଜାରିଆ, ଜଷ୍ଟିସ୍ ବିଷ୍ନୋଇ ଏବଂ ଜଷ୍ଟିସ୍ ଚାନ୍ଦୁରକରଙ୍କୁ ସୁପ୍ରିମକୋର୍ଟର ବିଚାରପତି ଭାବରେ ପଦୋନ୍ନତି ଦେବାକୁ ସୁପାରିଶ କରିଥିଲେ। ପୂର୍ବତନ ମୁଖ୍ୟ ବିଚାରପତି ସଞ୍ଜିବ ଖାନ୍ନା, ଜଷ୍ଟିସ୍ ଅଭୟ ଏସ. ଓକା ଏବଂ ଜଷ୍ଟିସ୍ ହୃଷୀକେଶ ରାୟଙ୍କ ଅବସର ପରେ ସୁପ୍ରିମକୋର୍ଟରେ ବର୍ତ୍ତମାନ ତିନୋଟି ବିଚାରପତି ପଦବୀ ଖାଲି ପଡ଼ିଛି।

ଅଧିକ ପଢ଼ନ୍ତୁ: ଉତ୍ତରପ୍ରଦେଶକୁ କୁଆପଥର ମାଡ଼ ନେଇ ସତର୍କତା ଜାରି