ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଏକ ସାକ୍ଷାତକାରରେ କହିଛନ୍ତି ଯେ ସେ ରୁଷ-ୟୁକ୍ରେନ ଯୁଦ୍ଧକୁ ଶେଷ କରିବାକୁ ଚାହୁଁଛନ୍ତି ଏବଂ ଯୁଦ୍ଧର ଫ୍ରଣ୍ଟଲାଇନ୍କୁ ଯଥାବତ୍ ରଖିବା ପାଇଁ ପ୍ରସ୍ତୁତ ଅଛନ୍ତି, ଅର୍ଥାତ୍ ରୁଷ ୟୁକ୍ରେନର ଯେତିକି ଅଂଶ ଅକ୍ତିଆର କରିସାରିଛି, ସେତିକି ଅଂଶ ଛାଡ଼ିବାକୁ ଜେଲେନସ୍କି ପ୍ରସ୍ତୁତ ଅଛନ୍ତି। ହେଲେ ରୁଷ ଏକ ବଡ଼ ରଣନୀତି ଅଧୀନରେ ୟୁକ୍ରେନ ଉପରେ ପୁନର୍ବାର ଆକ୍ରମଣ ପାଇଁ ପ୍ରସ୍ତୁତି ଚଳାଇଛି।

ଫକ୍ସ ନ୍ୟୁଜ୍  ସାକ୍ଷାତକାରରେ ଯେତେବେଳେ ଜେଲେନସ୍କିଙ୍କୁ ପଚରାଗଲା ଯେ କ’ଣ ସେ ଏପରି ଏକ ଶାନ୍ତି ଚୁକ୍ତିକୁ ସ୍ୱୀକାର କରିବେ ଯେଉଁଥିରେ ବର୍ତ୍ତମାନର ସ୍ଥିତାବସ୍ଥା ବଜାୟ ରହିବ, ଯାହା ଅଧୀନରେ ୟୁକ୍ରେନ ପାଖରେ ତା’ର ୭୫ ପ୍ରତିଶତ କିମ୍ବା ତା’ଠାରୁ ଅଧିକ ଅଞ୍ଚଳ ରହିବ, ଜେଲେନସ୍କି ଜବାବରେ କହିଥିଲେ, "ହଁ"। ୟୁକ୍ରେନ ରାଷ୍ଟ୍ରପତି କହିଛନ୍ତି ଯେ ବର୍ତ୍ତମାନ ଆମକୁ ସ୍ଥିତିକୁ ଫ୍ରିଜ୍ କରିବାର ଆବଶ୍ୟକତା ରହିଛି ଏବଂ ମୋତେ ଲାଗୁଛି ଏହି ଯୁଦ୍ଧକୁ ଶେଷ କରିବାର ଏହା ହିଁ ବାସ୍ତବ ରାସ୍ତା। ଆମେ ଏହାକୁ ‘ସିଜଫାୟାର୍’ କହୁଛୁ।

ଜେଲେନସ୍କି ଆଶା ପ୍ରକାଶ କରିଥିଲେ ଯେ ରୁଷରେ ଆମେରିକୀୟ ଦୂତ ଷ୍ଟିଭ୍ ୱିଟକଫଙ୍କ ବୈଠକରୁ ସକାରାତ୍ମକ ଫଳାଫଳ ମିଳିବ ଏବଂ ସେ କିଭ୍, ୱାଶିଂଟନ୍ ଏବଂ ମସ୍କୋର ନେତାଙ୍କ ମଧ୍ୟରେ ଆଲୋଚନାକୁ ସମର୍ଥନ କରିଥିଲେ। ସେ ଜଣାଇଥିଲେ ଯେ ନୋର୍ୱେର ଓସଲୋଠାରେ ୱିଟକଫଙ୍କ ସହ ତାଙ୍କର ଆଲୋଚନା ଫଳପ୍ରଦ ରହିଥିଲା ଏବଂ ୟୁକ୍ରେନ କୂଟନୀତି ପାଇଁ ସମ୍ପୂର୍ଣ୍ଣ ପ୍ରସ୍ତୁତ।

ରୁଷ ୟୁକ୍ରେନ ପାଇଁ ୭୦୦ ବାଲିଷ୍ଟିକ୍ ମିସାଇଲ୍ ଜମା କଲା

ଅନ୍ୟପକ୍ଷରେ ୟୁକ୍ରେନ ସହ ଦୀର୍ଘ ଯୁଦ୍ଧ ପାଇଁ ରୁଷ ପ୍ରସ୍ତୁତି ଚଳାଇଛି। ସେ ୟୁକ୍ରେନ ଉପରେ ଆକ୍ରମଣ ପାଇଁ ୭୦୦ ବାଲିଷ୍ଟିକ୍ ମିସାଇଲ୍ ଏବଂ ୬୦୦୦ ରୁ ଅଧିକ ଆଟାକ୍ ଡ୍ରୋନ୍ ଜମା କରିଛି। ମସ୍କୋ ପ୍ରତିମାସରେ ପ୍ରାୟ ୧୦,୦୦୦ ଡ୍ରୋନ୍ ତିଆରି କରୁଛି ଏବଂ ନିଜର ଅସ୍ତ୍ରଶସ୍ତ୍ର ଭଣ୍ଡାରକୁ ବୃଦ୍ଧି କରୁଛି, ଯାହାଦ୍ୱାରା ୟୁକ୍ରେନର ଏୟାର ଡିଫେନ୍ସ ସିଷ୍ଟମକୁ ଚକମା ଦେଇପାରିବ।

ୟୁକ୍ରେନର ନିପ୍ରୋପେଟ୍ରୋଭସ୍କ ଉପରେ ଗତ ୨୪ ରୁ ୪୮ ଘଣ୍ଟା ମଧ୍ୟରେ ରୁଷର ଲଗାତାର ଭୀଷଣ ବିମାନ ଆକ୍ରମଣ ଜାରି ରହିଛି। ଏହି ଆକ୍ରମଣ ଯୋଗୁଁ ଅନେକ ଅଞ୍ଚଳରେ ଭୀଷଣ ନିଆଁ ଲାଗିଯାଇଛି ଏବଂ ଧନଜୀବନର ପ୍ରଚୁର କ୍ଷତି ହୋଇଛି। ଏହା ପୂର୍ବରୁ ମଧ୍ୟ ରୁଷୀୟ ଗାଇଡେଡ୍ ବିମାନ ବୋମା ଦ୍ୱାରା ଆକ୍ରମଣ କରାଯାଇଥିଲା, ଯେଉଁଥିରେ ଅନେକ ଘର କ୍ଷତିଗ୍ରସ୍ତ ହୋଇଥିଲା। ରୁଷୀୟ ଡ୍ରୋନ୍ ଏବଂ ମିସାଇଲ୍ ଆକ୍ରମଣ ଡୁବନୋସ୍ଥିତ ଏପିସେଣ୍ଟର୍ ଶପିଂ ସେଣ୍ଟରକୁ ଲକ୍ଷ୍ୟ କରିଥିଲା। ଆକ୍ରମଣ ଯୋଗୁଁ ତାହା ସମ୍ପୂର୍ଣ୍ଣ ମାଟିରେ ମିଶିଯାଇଥିଲା ଏବଂ ସେଠାରେ ଭୀଷଣ ନିଆଁ ଲାଗିଯାଇଥିଲା। ରୁଷ ପ୍ରତିରକ୍ଷା ମନ୍ତ୍ରଣାଳୟ ଦାବି କରିଛି ଯେ ସେମାନେ ଡୁବନୋରେ ୟୁକ୍ରେନର ଏକ ଲଜିଷ୍ଟିକ୍ସ ସେଣ୍ଟରକୁ ନିଶାନା କରିଛନ୍ତି।

ରୁଷ ୧୫ ଟି ଏନର୍ଜି ଫ୍ୟାସିଲିଟିକୁ ଛାରଖାର କଲା

ୟୁକ୍ରେନ ସେନା ରୁଷ କବଜାରେ ଥିବା ଡୋନେସ୍କରେ ଏନର୍ଜି ଫ୍ୟାସିଲିଟି ଉପରେ ଆକ୍ରମଣ କରିଥିଲା। ସାମ୍ପ୍ରତିକ ଆକ୍ରମଣରେ ରୁଷ, ୟୁକ୍ରେନର ପ୍ରାୟ ୧୫ ଟି ଏନର୍ଜି ଫ୍ୟାସିଲିଟିକୁ ଛାରଖାର କରିଦେଇଛି। ଏହି ସେଣ୍ଟରଗୁଡ଼ିକରୁ ୟୁକ୍ରେନର ବିଭିନ୍ନ ଅଞ୍ଚଳକୁ ବିଜୁଳି ଯୋଗାଇ ଦିଆଯାଉଥିଲା। ସେହିପରି, ୟୁକ୍ରେନ ମଧ୍ୟ ପଲଟା ଆକ୍ରମଣ କରୁଛି ଏବଂ ସେ ରୁଷର ତାମ୍ବୋଭସ୍ଥିତ ନିକୋଲସ୍କୋୟେ ଅଏଲ୍ ପମ୍ପିଂ ଷ୍ଟେସନ୍ ଉପରେ ଡ୍ରୋନ୍ ଆଟାକ୍ କରିଛି। ପମ୍ପିଂ ଷ୍ଟେସନ୍ ଉପରେ କେତେକ ଘଣ୍ଟା ଧରି ଡ୍ରୋନ୍ ଆକ୍ରମଣ ଚାଲିଥିଲା। ଏହି ଷ୍ଟେସନ୍ ମୁଖ୍ୟ ତେଲ ପାଇପ୍ ଲାଇନ୍ ସିଷ୍ଟମ୍ ର ଅଂଶବିଶେଷ ଏବଂ ତେଲ ଓ ହାଲୁକା ପେଟ୍ରୋଲିୟମ୍ ଉତ୍ପାଦର ପରିବହନରେ ସାମିଲ ରହିଛି।