ନୂଆଦିଲ୍ଲୀ: ଫ୍ରାନ୍ସରେ ଚାଲିଥିବା ତୀବ୍ର ପ୍ରଦର୍ଶନ ଏବଂ ସରକାରଙ୍କ ପକ୍ଷରୁ ଲାଗୁ ହୋଇଥିବା କର୍ଫ୍ୟୁ କାରଣରୁ ସେଠାକାର ପରିସ୍ଥିତି ଅତ୍ୟନ୍ତ ଉତ୍ତେଜନାପୂର୍ଣ୍ଣ ରହିଛି। ଏହି ସ୍ଥିତିକୁ ଦୃଷ୍ଟିରେ ରଖି ଫ୍ରାନ୍ସସ୍ଥିତ ଭାରତୀୟ ଦୂତାବାସ ସେଠାରେ ବାସ କରୁଥିବା ଏବଂ ଭ୍ରମଣରେ ଥିବା ଭାରତୀୟ ନାଗରିକମାନଙ୍କ ପାଇଁ ଏକ ସତର୍କତାମୂଳକ ଆଡଭାଇଜରି ଜାରି କରିଛି।

ଭାରତୀୟ ଦୂତାବାସର କଡ଼ା ଚେତାବନୀ

ଦୂତାବାସ ପକ୍ଷରୁ ଜାରି କରାଯାଇଥିବା ନିର୍ଦ୍ଦେଶାବଳୀରେ ଭାରତୀୟମାନଙ୍କୁ ସର୍ବଦା ସତର୍କ ଓ ସାବଧାନ ରହିବାକୁ ପରାମର୍ଶ ଦିଆଯାଇଛି। ବଡ଼ଧରଣର ଜନଗହଳି କିମ୍ବା ଏକାଠି ଭିଡ଼ ଜମାଇବା ସ୍ଥାନରୁ ଦୂରେଇ ରହିବାକୁ କୁହାଯାଇଛି। ବିଶେଷ କରି ଯେଉଁ ଅଞ୍ଚଳଗୁଡ଼ିକରେ ପ୍ରଦର୍ଶନ ଜାରି ରହିଛି, ସେସବୁ ସ୍ଥାନକୁ ନଯିବା ପାଇଁ କୁହାଯାଇଛି। ଏଥିସହିତ, ଫ୍ରାନ୍ସର ସ୍ଥାନୀୟ ପ୍ରଶାସନ ଏବଂ କର୍ତ୍ତୃପକ୍ଷଙ୍କ ଦ୍ୱାରା ଜାରି କରାଯାଇଥିବା ସମସ୍ତ ନିର୍ଦ୍ଦେଶକୁ କଡ଼ାକଡ଼ି ଭାବେ ପାଳନ କରିବାକୁ ଅପିଲ୍ କରାଯାଇଛି। ଭାରତୀୟ ନାଗରିକମାନଙ୍କୁ ସ୍ଥାନୀୟ ଗଣମାଧ୍ୟମ ଜରିଆରେ ନିଜକୁ ସର୍ବଦା ଅପ୍-ଡେଟ୍ ରଖିବାକୁ ଦୂତାବାସ ପକ୍ଷରୁ କୁହାଯାଇଛି।

ଅନ୍ୟପକ୍ଷରେ, ଫ୍ରାନ୍ସର ରାଷ୍ଟ୍ରପତି ଇମାନୁଏଲ୍ ମାକ୍ରୋଁ ଦାବି କରିଛନ୍ତି ଯେ ଦେଶରେ ହୋଇଥିବା ହିଂସାତ୍ମକ ପ୍ରଦର୍ଶନ ସମୟରେ କୃତ୍ରିମ ପ୍ରଜ୍ଞା ବା ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI) ର ଅପବ୍ୟବହାର କରାଯାଇଛି।  ଦୋହାଠାରେ ସାମ୍ବାଦିକମାନଙ୍କ ସହ କଥାବାର୍ତ୍ତା ବେଳେ ସେ ସ୍ପଷ୍ଟ କରିଛନ୍ତି ଯେ ଏହି ଦଙ୍ଗାଗୁଡ଼ିକର କୌଣସି ଧର୍ମ ବିଶେଷ ସହ ସଂପୃକ୍ତି ନାହିଁ।

ମାକ୍ରୋଁଙ୍କ କହିବାନୁଯାୟୀ, ଆନ୍ତର୍ଜାତୀୟ ସ୍ତରରେ ସୂଚନାଗୁଡ଼ିକ ସହ ଜାଣିଶୁଣି ଛେଡ଼ଛାଡ଼ କରାଯାଇଛି, ଯାହାଫଳରେ ଅନେକ ବିଦେଶୀ ନେତା ଏଆଇ ଜରିଆରେ ତିଆରି ହୋଇଥିବା ଜାଲ୍ (Fake) ଭିଡ଼ିଓ ଦେଖି ଭୁଲ୍ ଏବଂ ଅଣଦାୟିତ୍ୱପୂର୍ଣ୍ଣ ବୟାନ ଦେଇଛନ୍ତି। ଫ୍ରାନ୍ସରେ ପ୍ରକୃତରେ ଯାହା ଘଟିନାହିଁ, ଏଆଇ ମାଧ୍ୟମରେ ସେଭଳି ଭ୍ରାମକ ଫଟୋ ଓ ଭିଡ଼ିଓ ପ୍ରସ୍ତୁତ କରାଯାଇଥିଲା ବୋଲି ସେ କହିଛନ୍ତି।