ନୂଆଦିଲ୍ଲୀ: ଆମେରିକା ନିଜର ଏଫ-୩୫ ଲଢୁଆ ବିମାନକୁ ନେଇ ଗର୍ବ କରିଥାଏ ଏବଂ ଏହାକୁ ଦୁନିଆର ସବୁଠୁ ଉନ୍ନତ ଲଢୁଆ ବିମାନ କହି ଆସିଛି । ମାତ୍ର ନିକଟ ଘଟଣାକ୍ରମରେ ଏହି ଜେଟକୁ ନେଇ ସମଗ୍ର ଦୁନିଆରେ ପ୍ରଶ୍ନ ଉଠିଛି । ଏହି କ୍ରମରେ ଆଜି ଆମେରିକା ବାୟୁସେନାର ଏଫ-୩୫ ଜେଟ୍ ଆଲାସ୍କାରେ ଦୁର୍ଘଟଣାଗ୍ରସ୍ତ ହୋଇଛି । ଦୁର୍ଘଟଣା ପୂର୍ବରୁ ପାଇଲଟ୍ ବିମାନକୁ ବଞ୍ଚାଇବା ପାଇଁ ଯଥା ସମ୍ଭବ ପ୍ରୟାସ କରିଛନ୍ତି ।
ବିମାନରେ ଯାନ୍ତ୍ରିକ ତ୍ରୁଟି ଠିକ୍ କରିବା ପାଇଁ ପାଇଲଟ ଆକାଶରେ ୫୦ ମିନିଟ୍ ଧରି ଲକହିଡ ମାର୍ଟିନର ୫ ଇଞ୍ଜିନିୟରଙ୍କ ସହ କନଫରେନ୍ସ କଲ୍ କରିଥିଲେ । ଯେବେ ଉଦ୍ୟମ ବିଫଳ ହେଲା ପାଇଲଟ ପାରଚୁଟ ସାହାଯ୍ୟରେ ବିମାନରୁ ଡେଇଁବାକୁ ପଡିଛି । ଏହା ପରେ ଆଲାସ୍କାର ରନେଓରେ ବିମାନ ଦୁର୍ଘଟଣାଗସ୍ତ ହେଇଥିଲା । ବିମାନର ହାଇଡ୍ରୋଲିକ ସିଷ୍ଟମରେ ବରଫ ଜମିବା କାରଣରୁ ଦୁର୍ଘଟଣା ଘଟିଥିବା ପ୍ରାରମ୍ଭିକ ତଦନ୍ତରୁ କୁହାଯାଇଛି ।
ଦୁର୍ଘଟଣା ପରେ ବିମାନଟି ରନେଓରେ ଖସି ଜଳି ଯାଉଥିବାର ଦୃଶ୍ୟର ଭିଡିଓ ସାମ୍ନାକୁ ଆସିଛି । ଭିଡିଓରେ ବିମାନଟି ଆକାଶରେ ଘୁରିବା ସହ ତଳେ ପଡି କେମିତି ଅଗ୍ନି ପିଣ୍ଡୁଳାରେ ପରିଣତ ହେଉଛି ତାହା ଦେଖିବାକୁ ମିଳିଛି । ବାୟୁସେନାର ଯାଞ୍ଚରୁ ଜଣା ପଡିଛି ଯେ, ଜେଟର ଆଗ ଏବଂ ଡାହାଣ ଲ୍ୟାଣ୍ଡିଂ ଗିୟରର ହାଇଡ୍ରୋଲିକ ଫ୍ଲୁଇଡରେ ଏକ ତୃତୀୟାଂଶ ପାଣିଥିଲା । ଯାହା ମାଇନଓ ୧୮ ଡିଗ୍ରୀ ସେଲସିୟସରେ ଜମି ବରଫ ହୋଇ ଯାଇଥିଲା । ଆଉ ଏହା ଏବେ ଲଢୁଆ ବିମାନ ଏଫ-୩୫ର ଦୁର୍ଘଟଣାର କାରଣ ପାଲଟିଛି ।
Also read: ଟ୍ରମ୍ପଙ୍କ ଟାରିଫ ୱାର ମଧ୍ୟରେ ଜିନପିଙ୍ଗଙ୍କୁ ଭେଟିବେ ପିଏମ ମୋଦୀ, ରବିବାର ହୋଇପାରେ ସାକ୍ଷାତ