ୱାଶିଂଟନ: ଆମରେିକୀୟ ରାଜ୍ୟ ଟେକ୍ସାସରେ ହୋଇଥିବା ଭୟଙ୍କର ବନ୍ୟାରେ ଏପର୍ଯ୍ୟନ୍ତ ୨୧ ଜଣ ଶିଶୁ ସମେତ ଅତି କମରେ ୬୭ ଜଣଙ୍କର ମୃତ୍ୟୁ ହୋଇସାରିଛି। ଗ୍ରୀଷ୍ମ ଶିବିରରୁ ନିଖୋଜ ଥିବା କିଛି ଝିଅଙ୍କୁ ଉଦ୍ଧାର ପାଇଁ ଅପରେଶନ ଜାରି ରହିଛି। ଏହାରି ମଧ୍ୟରେ ଆମେରିକାର ପ୍ରଥମ ମହିଳା ମେଲାନିଆ ଟ୍ରମ୍ପ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ପୋଷ୍ଟ କରି ଏହି ଦୁଃଖଦ ଘଟଣା ଉପରେ ଶୋକ ପ୍ରକାଶ କରିଛନ୍ତି।

ସେ ଲେଖିଛନ୍ତି, ଟେକ୍ସାସର ପିତାମାତାଙ୍କ ପାଇଁ ମୋର ହୃଦୟ ଦୁଃଖିତ। ମୁଁ ଆପଣମାନଙ୍କୁ ମୋର ପ୍ରାର୍ଥନାରେ ସାମିଲ କରୁଛି ଏବଂ ତୁମର ଶକ୍ତି, ସାନ୍ତ୍ୱନା ଏବଂ ଧୈର୍ଯ୍ୟ କାମନା କରୁଛି। 

ଅନ୍ୟପଟରେ ମେଲାନିଆଙ୍କ ଏହି ବାର୍ତ୍ତାକୁ ଲୋକମାନେ ପସନ୍ଦ କରି ନାହାନ୍ତି। ସୋସିଆଲ ମିଡିଆରେ କଠିନ ସମାଲୋଚନା ପାଇବା ଆରମ୍ଭ କରିଥିଲେ। ଅନେକ ଲୋକ ଏହାକୁ 'ଆନୁଷ୍ଠାନିକ ଏବଂ ବାହାକ ପ୍ରତିକ୍ରିୟା' ବୋଲି କହିଥିଲେ।

ଏହି ବିପର୍ଯ୍ୟୟ ପାଇଁ ଲୋକମାନେ କେବଳ ମେଲାନିଆ ନୁହେଁ, ବରଂ ଟ୍ରମ୍ପ ପ୍ରଶାସନକୁ ମଧ୍ୟ ଦାୟୀ କରିଛନ୍ତି। ଅନେକ ଉପଭୋକ୍ତା ମନେ ପକାଇ ଦେଇଛନ୍ତି ଯେ ଟ୍ରମ୍ପ ସରକାର ବିପର୍ଯ୍ୟୟ ପରିଚାଳନା ଓ ପାଣିପାଗ ପୂର୍ବାନୁମାନ ବଜେଟ୍ ହ୍ରାସ କରିଛନ୍ତି, ଯାହା ରିଲିଫ୍ କାର୍ଯ୍ୟକୁ ପ୍ରଭାବିତ କରିଛି। ଟେକ୍ସାସ ଡେମୋକ୍ରାଟିକ୍ ସାଂସଦ ଜୋଆକ୍ୱିନ୍ କାଷ୍ଟ୍ରୋ ସିଏନଏନକୁ କହିଛନ୍ତି ଯେ ଜାତୀୟ ପାଣିପାଗ ସେବାରେ କର୍ମଚାରୀ ଅଭାବ ଭଳି ଜିନିଷ ବନ୍ୟା ଭଳି ପରିସ୍ଥିତିରେ ଘାତକ ସାବ୍ୟସ୍ତ ହୋଇପାରେ। ସେ କହିଛନ୍ତି, ଯଦି ପାଣିପାଗ ବିଶ୍ଳେଷଣ ଏବଂ ପୂର୍ବାନୁମାନ ପ୍ରଦାନ କରିବା ପାଇଁ ପର୍ଯ୍ୟାପ୍ତ ଲୋକ ନାହାଁନ୍ତି, ତେବେ ଏହା ବଡ଼ ଦୁଃଖଦ ଘଟଣା ଘଟାଇପାରେ। ମେଲାନିଆ ଟ୍ରମ୍ପଙ୍କ ପୋଷ୍ଟ ଉପରେ କ୍ରୋଧିତ ଲୋକମାନେ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି। ଜଣେ ଉପଭୋକ୍ତା ଲେଖିଛନ୍ତି, ଯେତେବେଳେ ସେମାନଙ୍କ ପିଲାମାନେ ମରୁଥିଲେ, ତୁମେ ବାଲକୋନିରେ ନାଚୁଥିଲ। ଅନ୍ୟ ଜଣେ ଉପଭୋକ୍ତା କହିଛନ୍ତି, ପ୍ରାର୍ଥନା ଘର ତିଆରି କରେ ନାହିଁ। ସହାନୁଭୂତି ସେହି ଜିନିଷଗୁଡ଼ିକୁ ଫେରାଇ ଆଣେ ନାହିଁ ଯାହା ତୁମ ସ୍ୱାମୀଙ୍କ ସରକାର ନେଇଯାଇଥିଲା। 

ଏହି ଦୁର୍ଘଟଣା ପରେ ଫେଡାରାଲ ଜରୁରୀକାଳୀନ ପରିଚାଳନା ସଂସ୍ଥାକୁ ସକ୍ରିୟ କରାଯାଇଛି। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବିପର୍ଯ୍ୟୟ ଘୋଷଣା କରିବା ପରେ ପ୍ରଶାସନ ରିଲିଫ୍ ସାମଗ୍ରୀ ଏବଂ ସମ୍ବଳ ପଠାଇବା ଆରମ୍ଭ କରିଛି। ଆମେରିକା ତଟରକ୍ଷୀ ବାହିନୀ ହେଲିକପ୍ଟର ଏବଂ ବିମାନ ମଧ୍ୟ ରିଲିଫ୍ ଏବଂ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି, ବିଶେଷକରି ଗ୍ରୀଷ୍ମ ଶିବିରରୁ ନିଖୋଜ ଝିଅମାନଙ୍କୁ ଖୋଜୁଛନ୍ତି।

ଅଧିକ ପଢ଼ନ୍ତୁ: ନିଶ୍ଚୟ ଥରି ଉଠିବେ ଇଂଲଣ୍ଡର ଏହି ଖେଳାଳି!