ନ୍ୟୁୟର୍କ: ଜାତିସଂଘ ସାଧାରଣ ସଭା ଅଧିବେଶନରେ ଯୋଗଦେବା ପାଇଁ ଆମେରିକାର ନ୍ୟୁୟର୍କରେ ପହଞ୍ଚିଥିବା ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ଶରୀଫଙ୍କୁ ପୁଣି ଥରେ ନିନ୍ଦା ଓ ଅପମାନର ସାମ୍ନା କରିବାକୁ ପଡ଼ିଛି। ନ୍ୟୁୟର୍କର ରାସ୍ତାଘାଟ ଓ ସାଧାରଣ ସ୍ଥାନଗୁଡ଼ିକରେ ଶେହବାଜ ଶରୀଫଙ୍କ ବିରୋଧରେ ଆପତ୍ତିଜନକ ପୋଷ୍ଟର ଏବଂ ବ୍ୟାନର ଲଗାଯାଇଥିବା ଦେଖିବାକୁ ମିଳିଛି।

ଭାଇରାଲ ହେଉଥିବା ଭିଡିଓ ଏବଂ ଫଟୋ ଅନୁଯାୟୀ, ନ୍ୟୁୟର୍କ ରାସ୍ତାରେ ଲଗାଯାଇଥିବା ପୋଷ୍ଟରଗୁଡ଼ିକରେ ଶେହବାଜଙ୍କୁ 'ଚୋର' ଏବଂ 'ବୁଟ୍ ପଲିସ୍' ବୋଲି ଆକ୍ଷେପ କରାଯାଇଛି। ଆର୍ଥିକ ସଙ୍କଟ ଦେଇ ଗତି କରୁଥିବା ପାକିସ୍ତାନର ପ୍ରଧାନମନ୍ତ୍ରୀ ଦାମୀ ବିମାନରେ ଆମେରିକା ଗସ୍ତ କରିବା ଏବଂ ବିଦେଶୀ ଋଣ ଉପରେ ଚଳୁଥିବା ନେଇ ଏହି ପୋଷ୍ଟର ମାଧ୍ୟମରେ କଟାକ୍ଷ କରାଯାଇଛି।

ସୂଚନାଯୋଗ୍ୟ ଯେ, ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ୍‌ଙ୍କ ଦଳ (PTI)ର ସମର୍ଥକମାନେ ଆମେରିକାରେ ଶେହବାଜ ଶରୀଫଙ୍କ ବିରୋଧରେ ପ୍ରତିବାଦ ଓ ବିକ୍ଷୋଭ ପ୍ରଦର୍ଶନ କରୁଛନ୍ତି। ଜାତିସଂଘ ମୁଖ୍ୟାଳୟ ବାହାରେ ମଧ୍ୟ ପାକିସ୍ତାନୀ ପ୍ରବାସୀମାନେ ଏକାଠି ହୋଇ ସରକାର ବିରୋଧୀ ନାରାବାଜି କରିବା ସହ ଏହି ସରକାର ସେମାନଙ୍କର ପ୍ରତିନିଧିତ୍ୱ କରୁନଥିବା ଅଭିଯୋଗ ଆଣିଛନ୍ତି।

ବିଶ୍ୱମଞ୍ଚରେ ଜାତିସଂଘ ଅଧିବେଶନରେ ଯୋଗଦେବା ପୂର୍ବରୁ ଆମେରିକା ମାଟିରେ ନିଜ ଦେଶର ନାଗରିକ ଓ ବିରୋଧୀଙ୍କ ଦ୍ୱାରା ଏଭଳି ପୋଷ୍ଟର ସାମ୍ନା କରିବା ପାକିସ୍ତାନୀ ପ୍ରଧାନମନ୍ତ୍ରୀଙ୍କ ପାଇଁ ଏକ ବଡ଼ ଲଜ୍ଜାଜନକ ପରିସ୍ଥିତି ସୃଷ୍ଟି କରିଛି।