ନ୍ୟୁୟର୍କ: ପାକିସ୍ତାନ ନିଜ ଆଚରଣରୁ ବିରତ ହୁଏ ନାହିଁ। ପ୍ରତିଥର ଜାତିସଂଘରେ ସତ ଶୁଣିବା ପରେ ସେ ନିଜ ପ୍ରକୃତି ପରିବର୍ତ୍ତନ କରୁ ନାହିଁ। ଜାତିସଂଘ ନିରାପତ୍ତା ପରିଷଦ ବିତର୍କରେ କଶ୍ମୀର ପ୍ରସଙ୍ଗ ଉଠାଇଥିବାରୁ ପାକିସ୍ତାନକୁ ସମାଲୋଚନା କରି ଭାରତ କହିଛି ଯେ ପାକିସ୍ତାନର କାର୍ଯ୍ୟକଳାପ ଭୁଲ ସୂଚନା ପ୍ରସାର ଏବଂ ଏକ ଖରାପ ଉତ୍ତେଜନା ସଦୃଶ। 

'ପରିବର୍ତ୍ତିତ ପରିବେଶରେ ମହିଳାମାନେ ଶାନ୍ତି ପ୍ରତିଷ୍ଠା କରୁଛନ୍ତି' ଶୀର୍ଷକ ୟୁଏନଏସସିର ଖୋଲା ବିତର୍କରେ ଯୋଗଦେଇ ଭାରତ ନିଜର ବୟାନ ଦେବା ସହ ବୈଠକ ଡକାଇଥିବାରୁ ସ୍ୱିଜରଲ୍ୟାଣ୍ଡକୁ ଧନ୍ୟବାଦ ଜଣାଇଛି। ଜାତିସଂଘ ନିରାପତ୍ତା ପରିଷଦ ବିତର୍କକୁ ସମ୍ବୋଧିତ କରି ନ୍ୟୁୟର୍କରେ ଜାତିସଂଘରେ ଭାରତର ସ୍ଥାୟୀ ପ୍ରତିନିଧି ପର୍ବତାନେନି ହରିଶ କଶ୍ମୀର ପ୍ରସଙ୍ଗ ଉଠାଇବା ପାଇଁ ପାକିସ୍ତାନକୁ ସମାଲୋଚନା କରି କହିଛନ୍ତି ଯେ ଏହା ଘୃଣ୍ୟ, ତଥାପି ଜଣେ ସମ୍ପୂର୍ଣ୍ଣ ଅନୁମାନ କରିପାରେ ଯେ ଏକ ପ୍ରତିନିଧି ଦଳ (ପାକିସ୍ତାନ) ଭୁଲ ସୂଚନା ଏବଂ ଅପପ୍ରଚାର ପ୍ରସାର କରିବା ପାଇଁ ତା'ର ଖରାପ ଉତେଜନା କୌଶଳ ଆପଣାଇଛି।

ଏହି ଗୁରୁତ୍ୱପୂର୍ଣ୍ଣ ବାର୍ଷିକ ବିତର୍କରେ ଏଭଳି ରାଜନୈତିକ ପ୍ରଚାର କରିବା ସମ୍ପୂର୍ଣ୍ଣ ଭୁଲ। ଆମେ ଭଲ ଭାବରେ ଜାଣିଛୁ ଯେ ସେହି ଦେଶରେ ସଂଖ୍ୟାଲଘୁ ସମ୍ପ୍ରଦାୟର ବିଶେଷକରି ହିନ୍ଦୁ, ଶିଖ ଏବଂ ଖ୍ରୀଷ୍ଟିଆନ ମହିଳାଙ୍କ ଅବସ୍ଥା ଦୟନୀୟ ରହିଛି। ପାକିସ୍ତାନରେ ସଂଖ୍ୟାଲଘୁ ସମ୍ପ୍ରଦାୟର ମହିଳାଙ୍କ ଦୟନୀୟ ସ୍ଥିତିର ଜବାବ ଇସଲାମାବାଦ ଦେବା ଉଚିତ ବୋଲି ସେ କହିଛନ୍ତି।

ପାକିସ୍ତାନକୁ ଟାର୍ଗେଟ କରି ହରିଶ କହିଛନ୍ତି ଯେ ସେହି ନିର୍ଦ୍ଦିଷ୍ଟ ଦେଶର ମାନବାଧିକାର କମିଶନଙ୍କ ତଥ୍ୟ ଅନୁଯାୟୀ ପ୍ରତିବର୍ଷ ସଂଖ୍ୟାଲଘୁ ସମ୍ପ୍ରଦାୟର ହଜାର ହଜାର ମହିଳା ଅପହରଣ, ବଳପୂର୍ବକ ଧର୍ମାନ୍ତରଣ ଏବଂ ବଳପୂର୍ବକ ବିବାହର ଶିକାର ହେଉଛନ୍ତି। ସେମାନଙ୍କୁ ଜୋରଜବରଦସ୍ତ ଧର୍ମପରିବର୍ତ୍ତନ ଆଡ଼କୁ ଠେଲି ଦିଆଯାଉଛି। ସେ କହିଛନ୍ତି, "ଯାହା ହେଉ, ମୁଁ ଆହୁରି ଅନେକ କିଛି କହିପାରିଥାନ୍ତା କିନ୍ତୁ ମୁଁ ସେଠାରେ ଶେଷ କରିବି। ୟୁଏନଏସସିରେ ଏକ ବିତର୍କ ସମୟରେ ପାକିସ୍ତାନ ପ୍ରତିନିଧି ତାଙ୍କ ମନ୍ତବ୍ୟରେ ଜମ୍ମୁ-କଶ୍ମୀର ବିଷୟରେ ଉଲ୍ଲେଖ କରିବା ପରେ ସେ ଏହି ମନ୍ତବ୍ୟ ଦେଇଛନ୍ତି।

ପରିଷଦର ୨୫ତମ ବାର୍ଷିକୀ ପାଳନ ଅବସରରେ ଭାରତ ମହିଳା, ଶାନ୍ତି ଓ ନିରାପତ୍ତା ଏଜେଣ୍ଡା ପ୍ରତି ଆମର ଅତୁଟ ପ୍ରତିବଦ୍ଧତାକୁ ଦୋହରାଇଛି। ଆମେ ବିଶ୍ୱାସ କରୁ ଯେ ସ୍ଥାୟୀ ଶାନ୍ତି ପାଇଁ ରାଜନୀତି, ଶାସନ, ଅନୁଷ୍ଠାନ ନିର୍ମାଣ, ଆଇନର ଶାସନ, ନିରାପତ୍ତା କ୍ଷେତ୍ର ଏବଂ ଅର୍ଥନୈତିକ ପୁନରୁଦ୍ଧାର ସମେତ ନିଷ୍ପତ୍ତି ନେବାର ସମସ୍ତ ସ୍ତରରେ ମହିଳାଙ୍କ ସମ୍ପୂର୍ଣ୍ଣ ସମାନ, ଅର୍ଥପୂର୍ଣ୍ଣ ଏବଂ ସୁରକ୍ଷିତ ଅଂଶଗ୍ରହଣ ଆବଶ୍ୟକ । କହିବା ବାହୁଲ୍ୟ ଯେ ସାଧାରଣ ଜନତା ଏବଂ ବିଶେଷକରି ମହିଳାମାନଙ୍କର ଅର୍ଥନୈତିକ ଓ ସାମାଜିକ କଲ୍ୟାଣ ସ୍ଥାୟୀ ଶାନ୍ତିର ଅବିଚ୍ଛେଦ୍ୟ ଅଙ୍ଗ ।